حب المصريين لفايزة ابو النجا خلاها عبد الناصر .. و صندوق العزة و الكرامة لمحمد حسان

1. March 10, 2012

   و انت بتعمل المرتبات تلاقي خانة لخصم الفلوس
   
   صندوق العزة و الكرامة
   
   و حد تاني مسميه
   
   صندوق في حب مصر —
   

   
   March 10, 2012
2. الموظف الفلولي : لا البلد خلاص ده احنا بقينا اسوأ من الاستعمار

   March 8, 2012

   
   
   كان فيه حريقة امبارح في غمرة تحت كوبري اكتوبر
   الموظفة : اكيد دي عزبة ابو حشيش دي منطقة عشوائية هناك كلها بلطجية
   
     ام العريف : هما السكان هناك اللي حرقوها بعد ما سمعوا عن الشقق الجديده بتاعة الحكومة اللي هتبقي علي اخر السنة
   
   الخبر ف الاهرام النهارده
   حريق بأحد مخازن مرتجعات مخافظة القاهرة في غمرة

    
   

   March 8, 2012

   ا
   
   نظر الموظف الفلولي في الجريدة ثم قال : الست دي خدت حب من المصريين ملوش حل .. دي عبد الناصر الجديد (فايزة ابو النجا)

ولو سافرت من الامارات لاسبانيا يبقي هتعدي علي المحيط

1. February 29, 2012

   الموظف المفتي : اصل المنتخب الاوليمبي سافر من الامارات لاسبانيا فده خلاهم مرهقين
   
     (ام العريف) : لاء دي مش بعيدة حوالي 3 ساعات يادوب هيعدوا المحيط
    
2. February 29, 2012
   

   الموظف البزرميط : هو الندر حرام اصلا ... بس لو لو ندرت ندر لازم تعمله

بنت عمي اتخطفت . . قلة ادب

February 28, 2012

بعد أن انهي الموظف التابع للفلول  مكالمة المحمول .. اعلن النبأ

هو: بنت عمي اتخطفت

هما : ازاي؟

هو : كانت نازلة تجيب فينو الساعة 6 المغرب و مرجعتش لحد باليل و بعدين ناس كلموا عمي و طلبوا منه فدية ..و دفعلهم و رجعت
هما: هي بنت عمك دي قد ايه ؟
هو : في الاعدادية
......
تاني يوم

هما : هي بنت عمك اتخطفت ازاي

هو: واحدة عملت بتسألها علي عنوان و كمموها بمخدر حطوها في عربية

هما : اخبار بنت عمك ايه ؟

هو : كويسة .. انا كلمتها امبارح و هزأتها

هما : ليه

هو: علشان تاخد بالها

هي وصلت اننا نلعب في الشيخ محمد حسان ؟

February 27, 2012

الموظف الفلولي : لاء و طالعين دلوقتي يقولوا الشيخ حسان عنده قصور و عنده عربية بكام .. هي وصلت للعب في الشيخ حسان ؟.

February 27, 2012

الموظف الصعيدي  (اللي كان لحد امبارح بيقول ان شفيق اهبل و انه اداري بس ميفهمش في السياسة و انه هينتخب عمرو موسي ..النهارده قرر انه هينتخب شفيق بعد حواره مع لميس الحديدي )
: ولما المذيعة قالتله ان بتوع التحرير رافضينك قالها ده نص بتوع التحرير بيكلموني .. فعلا هما بيكلموه .. 

ملحوظة : الموظف  الصعيدي  كان مؤيد لمبارك حتي النهاية ثم قلب عليه بعد ما مشي و في نفس الوقت متوقفش عن شتيمة اللي في التحرير قبل التنحي و بعده

February 27, 2012

  (ام الفلول) : انا مش عايزة شفيق يمسك البلد ولا عايزة عمر سليمان ... انا مستخسراهم في البلد دلوقتي .. مستخسراهم في الشعب ده !!َ

هنجمع لمصر تبرعات الف مليار جنيه و المسلماني بيقول اسرائيل باعتلنا نحل

February 18, 2012

ابونضارة : وهي التبرعات دي هتكمل 12 مليار جنيه فلوس المعونة

الموظف الفلولي : انت عارف المبلغ المطلوب انه يتجمع كام ؟

ابو نضارة: لاء

الموظف الفلولي : الف مليار جنيه

ابو نضارة : و الناس هتجيب الفلوس دي كلها منين

الموظف الفلولي : ماهو مش بس المصريين اللي في مصر هيشتركوا ..المصريين اللي بره هيدفعوا مقابل ان الدولة هتديهم اراضي

المديرة : المصريين اللي بره هما اللي عارفين قيمة مصر فعلا

February 19, 2012

ام الفلول : اصل المعونة الامريكية دي مش بتيجي فلوس دي بتبقي مشاريع
الموظفة الصعيدية : اه ..زي مشروع توشكي

February 26, 2012

ا (ام العريف) تعليقا علي حادث ابو الفتوح : ده هو اللي مدبر الحادثة دي ..اصل محدش يعرفه لازم يعمل كده
.........
الموظف الفلولي : امبارح شفت احمد المسلماني بيقول ان اسرائيل بعتتلنا نحل مريض علشان تقلل من انتاج العسل بتاعنا
......

ويتني هيوستون اخت مايكل جاكسون .. و ودن صابرين حرام

February 14, 2012 near Cairo

الموظفة الثورية : احسن يستاهل (مبارك) ماهو كان ممكن يعمل زي كل الدنيا يسرقنا بس يخلي الشعب برضه يعيش كويس ساعتها محدش كان هيعمله حاجه
  التابع للفلول: ايوه مظبوط صح

الموظفة الثورية تستكمل : لكن يسرق هو وولاده و صحابه المليارات و احنا نقعد نقوله المنحة يا ريس ..يستاهل

February 15, 2012 near Cairo

العايقة: حط كريم يمكن تبيض زي مايكل جاكسون

الموظف الفلولي : اه ده اخته لسه ميتة من يومين (ويتني هيوستون)

الموظفة الصعيدية : لاء دي واحدة تانية مش قريبته اصل الزنوج كتير في امريكا

February 16, 2012 near Cairo

في نقاش حاد عن باروكة صابرين اللي فوق الحجاب و هل تعتبر محجبة ولا لاء حسمه
 الموظف التابع للفلول  : يا جماعة انتوا بتتكلموا في ايه ؟ مادام ودنها باينة تبقي مش محجبة

 
 بعد كام اسبوع

نفس الموظف لزميله : باقولك انا نزلت فيلم شارع الهرم من ع النت بس مش عايز يشتغل

و زي ما اتقال في الدين " اذهب فانت برص"

الموظف التابع للفلول : السلحفاة اللي انت الي انت اديتهاني ماتت

الموظف البزرميط  : لا دي تلاقيها في البيات الشتوي

الموظفة الصعيدية : هو صحيح السلحفاة دي بتكون بني ادم و اتسخط بتكون بني ادم يتقاله كوني من فوقيكي حجر و من تحتيكي حجر ؟

الموظف البزرميط: لاء ده البرص هو اللي بيكون بني ادم اتسخط فيه حاجة في الدين (اذهب فانت برص)

الموظف الصعيدي  : لاء غلط يا ابني .. مش الرسول ده سيدنا ابراهيم علشان البرص كان بيساعد ان النار تولع فيه و فيه حديث ان اللي يموت برص ياخد حسنة

 

February 11, 2012 near Cairo

موظف  : ده فيه مسيرة في العباسية لتأييد الجيش عاملها توفيق عكاشة
الموظف الفلولي : الشعب كله مع الجيش محدش ضده غير ولاد كلب او مأجورين

February 12, 2012 near Cairo

ما أن خرجت الموظفة المسيحية (العايقة)  قال الموظف الفلولي : هيموتوا من الغيظ علشان العصيان المدني منفعش .. طبعا عايزين البلد تقع و ياخدوا حتة