لو الحامل اكلت شطة المولود ينزل اشقر

April 1, 2012 near Cairo

الموظف الفلولي شقيق ظابط الشرطه : اخويا بيقوللي مسكوا كميات مهولة من 

مخابرات اجنبية في ميدان التحرير بس ماعلنوش عنهم 

موظف : اكيد يهود و امريكان

فلولي : لاء و المان و من ايران و تركيا

April 1, 2012 near Cairo

الموظف الصعيدي(اللي مراته حامل) : قالولي ممكن اخلي المدام تاكل شطه علشان الطلق ييجي

الموظفه الصعيديه: لاء بنت خالتي كلت شطة كتير و محصلش حاجه .. غير انه بيخلي المولود ينزل من غير شعر و بعدين يطلعله شعر اصفر في الاول

حواديت دبح البنات في الصعيد

March 23, 2012 near Cairo

الموظفه الصعيديه : امبارح جوزي حكالي علي حكاية حصلت في بلد اسمها جهينه في سوهاج .. واحد عنده 3 بنات بس مراته ماكانتش بايته معاه .. غديت عليه واحده غلبانه قالتله عايزة مكان ابات فيه .. فخلاها تبات في البيت .. و بعدين صحي يصلي الفجر فسمعها بتتكلم في الموبايل بتقول "تعالوا انا خلصت خلاص " فاستغرب ان معاها موبايل .. دخل عليها لقاها دبحت البنات التلاته .. فنادي اهالي البلد و استنوا الناس اللي جايين معاهم لقوهم جايين في عربيه مرسيدس فخمه و معاهم ايس بوكس .. فالاهالي مسكوهم .. و الراجل قام حاططهم في (الضراسه) -مطحنه كبيره - و قام كلم المأمور قاله انا تحت امرك .. فلما جه المأمور و عرف القصه قاله ولا كأني شفت حاجه ..تمت

ويتني هيوستون اخت مايكل جاكسون .. و ودن صابرين حرام

February 14, 2012 near Cairo

الموظفة الثورية : احسن يستاهل (مبارك) ماهو كان ممكن يعمل زي كل الدنيا يسرقنا بس يخلي الشعب برضه يعيش كويس ساعتها محدش كان هيعمله حاجه
  التابع للفلول: ايوه مظبوط صح

الموظفة الثورية تستكمل : لكن يسرق هو وولاده و صحابه المليارات و احنا نقعد نقوله المنحة يا ريس ..يستاهل

February 15, 2012 near Cairo

العايقة: حط كريم يمكن تبيض زي مايكل جاكسون

الموظف الفلولي : اه ده اخته لسه ميتة من يومين (ويتني هيوستون)

الموظفة الصعيدية : لاء دي واحدة تانية مش قريبته اصل الزنوج كتير في امريكا

February 16, 2012 near Cairo

في نقاش حاد عن باروكة صابرين اللي فوق الحجاب و هل تعتبر محجبة ولا لاء حسمه
 الموظف التابع للفلول  : يا جماعة انتوا بتتكلموا في ايه ؟ مادام ودنها باينة تبقي مش محجبة

 
 بعد كام اسبوع

نفس الموظف لزميله : باقولك انا نزلت فيلم شارع الهرم من ع النت بس مش عايز يشتغل

و زي ما اتقال في الدين " اذهب فانت برص"

الموظف التابع للفلول : السلحفاة اللي انت الي انت اديتهاني ماتت

الموظف البزرميط  : لا دي تلاقيها في البيات الشتوي

الموظفة الصعيدية : هو صحيح السلحفاة دي بتكون بني ادم و اتسخط بتكون بني ادم يتقاله كوني من فوقيكي حجر و من تحتيكي حجر ؟

الموظف البزرميط: لاء ده البرص هو اللي بيكون بني ادم اتسخط فيه حاجة في الدين (اذهب فانت برص)

الموظف الصعيدي  : لاء غلط يا ابني .. مش الرسول ده سيدنا ابراهيم علشان البرص كان بيساعد ان النار تولع فيه و فيه حديث ان اللي يموت برص ياخد حسنة

 

February 11, 2012 near Cairo

موظف  : ده فيه مسيرة في العباسية لتأييد الجيش عاملها توفيق عكاشة
الموظف الفلولي : الشعب كله مع الجيش محدش ضده غير ولاد كلب او مأجورين

February 12, 2012 near Cairo

ما أن خرجت الموظفة المسيحية (العايقة)  قال الموظف الفلولي : هيموتوا من الغيظ علشان العصيان المدني منفعش .. طبعا عايزين البلد تقع و ياخدوا حتة

ارانب بترعص و ناقصات عقل و دين و مرشح جنتل

January 11, 2012

الموظف البزرميط : و علي رأي المثل اللي بيقول ان الستات دول ناقصات عقل و دين 

January 10, 2012 near Cairo

الموظف الفلولي : احنا هننتخب شفيق
العايقة : هو ذوق ذوق و .... جنتل

January 9, 2012 near Cairo
 الموظفة الصعيدية  : مبحبش اكل الارانب و انا صغيرة في الصعيد كنت باشوفها بترعص في الحلة

موظفة  : بترقص ازاي ؟

الموظفة الصعيدية : لاء بترعص يعني بتنبض

ام الفلول : اصل الارانب روحها طويلة

صيع التحرير نضربهم بالنار

نوفمبر 2011

احداث محمد محمود

 

المديرة : كل اللي في الميدان دول صيع
التابع للفلول  : المفروض يضربوهم بالالي و ياخدوا عاطل علي باطل
موظف  : مش قوي كده 
التابع للفلول : اصل حتي اللي واقف يتفرج ده واقف ليه ؟
الموظفة الصعيدية  : انا سمعت واحدة بتقول انهم بياخدوا فلوس من قناة الجزيرة و العربية و القنوات الاجنبية —

لبن معيز في عينك

                                                                                                          من يوميات ديسمبر 2009

                               

ام العريف بترمي ميه سخنة في البلكونة

التابع للفلولي : سمي يا استاذة علشان الجن

.........................................

الموظفة الصعيدية : هوه احنا اكتر في السكان ولا الصين؟

............................................

الموظفة الصعيدية : لبن المعيز مليان فوايد في علاج الامراض و منها امراض العيون و بيحطوا نقطة من اللبن في العين المصابة।

.....................

ام العريف : يعني مش هيدونا يوم اجازة بدل راس السنة الهجرية علشان جه يوم جمعة .. ماهو ده لو كان اجازة تانية كانوا ادوا يوم بداله .. خلاص مبقاش فيه اسلام