بورتريهات مكتوبة عن الموظفين

                            العايقة

خمسين سنة مسيحية متجوزة و عندها ولد و بنت ساكنة في عين شمس و عيلتها من الضاهر اصلا , حاصلة علي معهد سكرتارية ,  تحب الدلع و المعاكسة و الكلام اللي فيه ايحاءات , ضحكتها بتجيب لحد اخر الطرقة , بتلبس لبس مكشوف في حدود ما يسمح بيه مجال الشغل , ينطبق عليها مثل الغجرية ست جيرانها عندها استعداد للردح علي سبيل الهزار اللي هو بروفة للتحذير , مش متدينة لكن احيانا بتكون طائفية  من كتر الهجوم المضاد , بتستخدم كتير من المصطلحات الاسلامية سواء بجد او بهزار (لا اله الا الله) (كسبنا صلاة النبي) (لا حول الله) , متحبش النكد و تعشق الفرفشة و الرقص ان امكن ,  كانت مؤيدة لمبارك و ضد "المسخرة بتاعة الثورة" ثم مؤيدة بالطبع لاحمد شفيق.

                       ام العريف

في النصف الثاني  من الخمسينات من العمر , ساكنة في مساكن شيراتون , عندها ولدين , سافرت مع جوزها اعارة لليبيا و ده عمل نقلة مادية ليها ,معاها بكالوريوس تجارة  , و بتفتي في كل المواضيع من الطب للسياسة للدين بكل ثقة , مش متدينة و لكنها طائفية جدا , تستخدم الدين كوسيلة للتنفيس ضد الاخرين (المسيحيين)  , ضد الثورة و مع نظريات المؤامرة بكل اشكالها , انتخبت الاخوان في مجلس الشعب ثم انتخبت شفيق في انتخابات الرئاسة

                     الصعيدية

في اوائل الاربعينات متجوزة و عندها ولدين , انتقلت من الصعيد الي السكن في حدائق القبة , حاصلة علي بكالريوس تجارة , طائفية جدا , و محبة للقصص الخرافية اللي بتحكيها علي انها قصص واقعية  , كانت ضد النظام السابق لفساده و لكن مع عدم تأييد واضح للثورة , انتخبت الاخوان في مجلس الشعب ثم انتخبت حمدين في الجولة الاولي

                       أم الفلول

في الاربعينات , لم تتزوج , منوفية , تسكن في فيصل و لكنها اصلا من شبرا , اقل طائفية من زملائها و لكن ذلك لا يمنع من الاشتراك في قليل منها , مؤيدة للنظام السابق باستماتة لدرجة أنها اصيبت بالاكتئاب عند تنحي مبارك , تهاجم الثورة و كل الثورات بشراسة بالغة حتي الان , تؤمن بالطبقية و بأن العدالة الاجتماعية هي شعار يرفعه الحاقدون علي من هم اكثر منهم مالا .لم تشارك في انتخابات مجلس الشعب و انتخبت احمد شفيق في الرئاسة .

                  الموظفة الثورية

في اواخر الخمسينات , تسكن في العباسية  , متزوجة و عندها بنت واحدة , برغم تأييدها للثورة اللي السبب الرئيسي فيه هو جوزها المهندس اللي علي المعاش و اللي هو معارض لمبارك من قبل الثورة , الا انها طائفية , كانت تقوم بدور المدافع الوحيد عن الثورة في المكتب , انتخبت الاخوان في مجلس الشعب , و محمد مرسي في جولة الاعادة .

                       الموظف التابع للفلول

في منتصف الثلاثينات , متزوج و لديه ولد و بنت , منوفي و والده ظابط جيش متقاعد , يسكن في عزبة الهجانة و اصلا من شبرا ,كان ضد الثورة لكن لما مبارك مشي شتمه علي انه حرامي و بعدين شتم الثورة و اللي ضد المجلس العسكري  , محب للاستقرار بشكل عام , انتخب الاخوان في مجلس الشعب و عمرو موسي في المرحلة الاولي و شفيق في الاعادة .

                    الموظف المفتي

في اواخر العشرينات و ليسانس اداب قسم جغرافيا , اشتغل صحفي قبل كده في جرنال قومي مغمور , متزوج و عنده بنتين , ساكن في ضواحي مدينة نصر , محب للافتاء في كل المواضيع و علشان كده كتير بيصطدم مع ام العريف , مكانش مع النظام السابق بس كان بيتكلم علي ان شباب الثورة (الكويس) مبقوش موجودين , مانتخبش لا في انتخابات مجلس الشعب ولا الرئاسة.

                     الموظف الصعيدي

من سوهاج اصلا و ساكن في فيصل , في منتصف التلاتينات , متجوز و عنده ولد , كان ضد الثورة  لحد اخر لحظة و انه اللي عملوها عملاء , ثم شتم مبارك اللي نهب البلد , اقنع الناس اللي في المكتب انها تنتخب الاخوان المسلمين , و بعد كده كان مؤيد لعمرو موسي ثم لعمر سليمان لما اترشح , ثم كان بيقنع المكتب انهم ينتخبوا احمد شفيق علشان يقضي علي الاخوان .

                     الموظف البزرميط

في اواخر العشرينات , عازب , من عين شمس , يفخر بانه الاكتر صياعة و انه بيروح البيت بعد الفجر  و انه بيشرب بيرة و بيروح اماكن للسهر في شارع الهرم , في نفس الوقت كان متحمس جدا لانتخاب حازم ابو اسماعيل و انتخب الاخوان في مجلس الشعب و محمد مرسي في انتخابات الرئاسة .

                           أم العيال

في اواخر التلاتينات , متجوزة و عندها 5 عيال منهم توأم , ساكنة في السواح , كانت ضد الثورة و لسه بتترحم علي ايام مبارك بسبب الامن , بتحب تتبع حد في  اختيارها في الانتخابات , انتخبت الاخوان في مجلس الشعب و ندمت زي الباقيين , انتخبت حمدين صباحي في الجولة الاولي , و شفيق في الجولة التانية من انتخابات الرئاسة .

                          المديرة

في اواخر الخمسينات , ارملة , عندها ولد و بنت و احفاد ,   مكانتش مع الثورة لكن بعد تنحي حسني شافت انه ده جزاء الفساد , ثم كانت مؤيدة للمجلس العسكري , انتخبت الاخوان في مجلس الشعب  و بعد كده طالبت بان المفروض يعتقلوهم و يرجعوهم جحورهم , انتخبت  حمدين صباحي في الجولة الاولي , و مانتخبتش حد في الجولة التانية .

الفلولي

في اوائل الاربعينات , متزوج, و عنده ولد و بنت , خاله كان عضو مجلس شعب عن الحزب الوطني ,أخوه ظابط شرطة ,خريج مدارس فرنسية ثم كلية تجارة عين شمس , والده صاحب محل أحذية في روض الفرج حيث نشأ , يعيش حاليا في مدينة العبور , بطبيعة الحال مؤيد لنظام مبارك و ضد 25 يناير , انتخب أحمد شفيق في الجولتين الأولي و التانية