هنجمع لمصر تبرعات الف مليار جنيه و المسلماني بيقول اسرائيل باعتلنا نحل

February 18, 2012

ابونضارة : وهي التبرعات دي هتكمل 12 مليار جنيه فلوس المعونة

الموظف الفلولي : انت عارف المبلغ المطلوب انه يتجمع كام ؟

ابو نضارة: لاء

الموظف الفلولي : الف مليار جنيه

ابو نضارة : و الناس هتجيب الفلوس دي كلها منين

الموظف الفلولي : ماهو مش بس المصريين اللي في مصر هيشتركوا ..المصريين اللي بره هيدفعوا مقابل ان الدولة هتديهم اراضي

المديرة : المصريين اللي بره هما اللي عارفين قيمة مصر فعلا

February 19, 2012

ام الفلول : اصل المعونة الامريكية دي مش بتيجي فلوس دي بتبقي مشاريع
الموظفة الصعيدية : اه ..زي مشروع توشكي

February 26, 2012

ا (ام العريف) تعليقا علي حادث ابو الفتوح : ده هو اللي مدبر الحادثة دي ..اصل محدش يعرفه لازم يعمل كده
.........
الموظف الفلولي : امبارح شفت احمد المسلماني بيقول ان اسرائيل بعتتلنا نحل مريض علشان تقلل من انتاج العسل بتاعنا
......

ويتني هيوستون اخت مايكل جاكسون .. و ودن صابرين حرام

February 14, 2012 near Cairo

الموظفة الثورية : احسن يستاهل (مبارك) ماهو كان ممكن يعمل زي كل الدنيا يسرقنا بس يخلي الشعب برضه يعيش كويس ساعتها محدش كان هيعمله حاجه
  التابع للفلول: ايوه مظبوط صح

الموظفة الثورية تستكمل : لكن يسرق هو وولاده و صحابه المليارات و احنا نقعد نقوله المنحة يا ريس ..يستاهل

February 15, 2012 near Cairo

العايقة: حط كريم يمكن تبيض زي مايكل جاكسون

الموظف الفلولي : اه ده اخته لسه ميتة من يومين (ويتني هيوستون)

الموظفة الصعيدية : لاء دي واحدة تانية مش قريبته اصل الزنوج كتير في امريكا

February 16, 2012 near Cairo

في نقاش حاد عن باروكة صابرين اللي فوق الحجاب و هل تعتبر محجبة ولا لاء حسمه
 الموظف التابع للفلول  : يا جماعة انتوا بتتكلموا في ايه ؟ مادام ودنها باينة تبقي مش محجبة

 
 بعد كام اسبوع

نفس الموظف لزميله : باقولك انا نزلت فيلم شارع الهرم من ع النت بس مش عايز يشتغل

و زي ما اتقال في الدين " اذهب فانت برص"

الموظف التابع للفلول : السلحفاة اللي انت الي انت اديتهاني ماتت

الموظف البزرميط  : لا دي تلاقيها في البيات الشتوي

الموظفة الصعيدية : هو صحيح السلحفاة دي بتكون بني ادم و اتسخط بتكون بني ادم يتقاله كوني من فوقيكي حجر و من تحتيكي حجر ؟

الموظف البزرميط: لاء ده البرص هو اللي بيكون بني ادم اتسخط فيه حاجة في الدين (اذهب فانت برص)

الموظف الصعيدي  : لاء غلط يا ابني .. مش الرسول ده سيدنا ابراهيم علشان البرص كان بيساعد ان النار تولع فيه و فيه حديث ان اللي يموت برص ياخد حسنة

 

February 11, 2012 near Cairo

موظف  : ده فيه مسيرة في العباسية لتأييد الجيش عاملها توفيق عكاشة
الموظف الفلولي : الشعب كله مع الجيش محدش ضده غير ولاد كلب او مأجورين

February 12, 2012 near Cairo

ما أن خرجت الموظفة المسيحية (العايقة)  قال الموظف الفلولي : هيموتوا من الغيظ علشان العصيان المدني منفعش .. طبعا عايزين البلد تقع و ياخدوا حتة

السلفيين بياخدوا فلوس من ايران و 6 ابريل بتاخد تمويل من المانيا

February 8, 2012 near Cairo

ام العيال : بنفكر نأخر طهور الولد اصل صحته لسه ضعيفة

 موظفة : لاء دي فرصة دلوقتي اصل الولد لحد سن40 يوم مبيحسش !

February 9, 2012 near Cairo

تعليقا علي ادان ممدوح اسماعيل في مجلس الشعب
 
موظفة : ده غاوي شهرة

الموظفة ثورية : هاتيلي واحد سلفي بيفهم اصلا

  الفلولي : ممدوح اسماعيل ده من شبرا عندنا ده نصاب دولي

ام الفلول : و بياخد فلوس من ايران .. كلهم بياخدوا فلوس من ايران و الاخوان كمان

February 11, 2012 near Cairo

الموظف الفلولي : اصلا 6 ابريل دي كل اعضاءها في القاهرة ميجوش اربعين واحد ..هما بس بياخدوا تمويل من المانيا اصل المانيا دلوقتي هي تابع امريكا في اوروبا بدل انجلترا علشان انجلترا امريكا ضحكت عليهم في تقسيم العراق .. اصل ميركل دي من اصل يهودي

البورسعيدية كلهم اوساخ و يا ريت اسرائيل تحتل القنال

February 1, 2012 near Cairo

الموظفة العايقة : ابعتيلي كده من موبايلك اغنية مشربتش من نيلها

الموظفة الثورية : انتي قلبتي اغاني وطنية ولا ايه ؟

العايقة : اهي حاجة شخللة كده

February 5, 2012 near Cairo

ام الفلول  : هما بتوع بورسعيد السبب البورسعيديه دول كلهم اوساخ هما و الاسماعالاوية و السوايسة .. كل خط القنال ده مينفعهمش غير ان اسرائيل تخش تموتهم

February 8, 2012 near Cairo

الموظفة : بيقولوا فيه عصيان مدني 

ام الفلول : العصيان المدني ده تبع امريكا .. عاملينه علشان منظمات المجتمع المدني

مرة موظف أدن قبل ميعاد الادان علشان يغيظ زميله

January 31, 2012 near Cairo

المديرة: عملتي ايه خلصتي الورق بتاعك ؟

  الموظفة المسالمة: اه خلصوني بسرعه قوي و سهلوا عليا و الموظفة خلصتني بسرعه و قالتلي اي خدمة مع انها ( و اشارت باصابعها بعلامة الصليب ) تصوري ؟

...............

الموظفين : ايه الدوشة اللي بره دي ؟

الموظف الصعيدي  : اصل الساعي بيشتكي من عامل الاساسنسير انه بيضايقه و بيشتمه و قطع من سفنج الكرسي بتاعه علشان يمسح بيه الاسانسير .. ده بينزل يدن الضهر قبل ميعاده علشان ميخليش الساعي يدن

January 30, 2012 near Cairo

المديرة : اه مدير الادارة عامل قسطرة في القلب اكيد كان عنده قبلها ضيق في

  (ام العريف) : ضيق في التنفس

  المديرة: ضيق في الشرايين

العفاريت و الموظفين و مصابي الثورة

January 29, 2012 near Cairo

 الفلولي : احنا عندنا موظف في القسم اللي تحت حاطط نفسه من ضمن المصابين و قايل ان عينه طارت

العايقة : بس هما هيكشفوا عليه

  الفلولي : ماهو بقي مع الصوت العالي و كده .. ده اصلا لما كان بيتخانق مع مديره بيروح يعتصم في خيمة في التحرير .. علشان تعرفي ان كل اللي في التحرير دول عندهم امراض نفسية

January 23, 2012 near Cairo

الفلولي: العفاريت بتبقي منتشرة قوي في اسكندرية

موظف  : ليه؟

ام الفلول : علشان الشقق المتأجرة دي بيكون فيها حصل جرايم و كده

  العايقة : زمان كان فيه ولد عندنا في المنطقة كان بيقف يعاكس البنات و بعدين الناس اشتكت لاخوه فمرة راح اتخانق معاه و طلع مطوة و ضربه بيها .. واحد جارنا نقله في عربيته للاسعاف بس مات في العربية .. فضل كل يوم في نفس الميعاد يسمع اصوات غريبة في العربية .. و قعد يشغل فيها قران بس برضه فضل ده يحصل .. و معرفش يبيع العربية ولا يركبها .. و لسه راكنها لحد دلوقتي مبيستعملهاش