مسيحية بتقول الرسول عليه الصلاة و السلام !

August 7, 2014 · Cairo ·

الموضوع كان عن شهر رمضان و عبد الباسط عبد الصمد و الشيخ محمد رفعت لحد ما وصل لفوازير آمال فهمي (العايقة مكانتش موجودة )

أم العريف : آمال فهمي مسيحية

الفلولي : انا مرة سمعتها في لقاء بتقول الرسول عليه الصلاة و السلام انا شاكك في المعلومة دي ..عرفتيها منين؟

أم العريف : حد قالها ..

الفلولي : مين ؟

أم العريف : حد قالها في التليفزيون

الفلولي : طب ابقي اتأكديلنا من المعلومة دي

أم العريف : هاتأكد منها ازاي هاشوف بطاقتها ؟

واضح إن فيه .. توء سفاهم

August 6, 2014 · Cairo ·

النقاش كان بين البزرميط و أم العريف وهو كان بيقول ان البنوك زودت الفايدة علي القروض و قللت فايدة الايداع ..المهم و هما بيتناقشوا البزرميط قال جملة و كملها عادي و هي كانت بترد عليه عادي لولا اني وقفت الكلام و قولتله ثانية واحدة ايه اللي انت بتقوله ده ..الجملة كانت

" لاء ماهي الزايدة فادت علي القروض "

المستشارة الألمانية أنجيلا ماكريل

July 15, 2014 · Cairo ·

العايقة بعد ما خلصت تليفون ضايقها شوية تبتدي تدندن بصوت مسموع للمكتب

" بعدين و يااكي ..احييه في هوااكي "

—

July 14, 2014 · Cairo ·

" عن نهائي كأس العالم 2014 "

الفلولي : و بوتين كان موجود في النهائي امبارح

أم العريف : ايوه ماهي روسيا اللي هتنظم الدورة اللي جاية كان هو و رئيسة المانيا.. ماكريل

هو اللي مات مسيحي ..عقبال الباقي

July 10, 2014 · Cairo ·

تدحل" أم العريف" المكتب ..تلاحظ أن العايقة (مسيحية ) ترتدي اللون الاسود ..تنتظر حتي خروجها ثم تسأل :هو مين اللي مات لها ؟

تأتي الاجابة : جوز أختها

ترد علي الفور : عقبال الباقي

بنتي بتقولي انت مش انتخبت السيسي ..اشرب

July 7, 2014 · Cairo ·

الموظفين و البنزين (3)

بتاريخ الخامس من يوليو 2014

الفلولي : انا كنت ناوي اتبرع بمبلغ في آخر رمضان لحساب تحيا مصر بس بعد الزيادة دي هادي المبلغ ده لأي حد تاني محتاج ماهي الحكومة خدت فلوسها خلاص

التابع للفلول : انا بنتي عندها 6 سنين بتقولي انت مش انتخبت السيسي ..اشرب

أنا أي حاجة يقولها السيسي موافقة عليها

July 6, 2014 · Cairo ·

الموظفين و البنزين (2)

أم العيال : امبارح الست بتقولي السيسي غلي الحاجة انا ندمانه اني انتخبته ..معرفتش ارد عليها

أم العريف : قوليلها احنا دلوقتي محتاجين فلوس فبدل ما ناخد قرض من البنك و ندفع فوايد بنعمل جمعية أصل دي مش هتفهم لو قولتيلها الاقتصاد

أم العيال : اه حلوة دي أصل مكنتش فاهمة القرار بس أنا أي حاجة يقولها السيسي موافقة عليها

ماذا حدث للموظفين عند زيادة اسعار البنزين ؟

July 5, 2014 · Cairo ·

الموظفين و البنزين (1)

النهارده داخل المكتب لقيت الموظف الفلولي بيشتكي من ان الميكروباص اللي بييجي بيه الشغل زاد و ان كل حاجة هتغلي بعديه الموظف المفتي نفس الشكوي بعديهم جه الموظف (التابع للفلول ) منفجر من زيادة الاسعار بنزين و سولار و فراخ و بيض و لسه اوتوبيس المدرسة و امبارح كان مروح قعد ساعتين علشان كل ما حول الاتحادية مقفول و انقسم المكتب الي

الموظفين التابع للفلول و المفتي ضد قرار الزيادة و انه كده الفقير هو اللي هيتضر و ان كده السيسي بيفقد شعبيته

أم الفلول و المديرة الجديدة ..دي ظروف بلدنا و الحالة بايظة بقالها 3 سنين و الواحد يحمد ربنا و يبص للي اقل منه

و الفلولي في النص شوية يقول ده ضروري علشان نقف قدام امريكا و شوية يقول بس كده الدنيا هتبقي صعبة جدا