كوسة و ملوخية في مكتب الحكومة

April 19 · 2015

تعليقا علي صورة الموظفة اللي اتصورت و هي بتقور الكوسة

الموظف الصعيدي : انا لما كنت في سوهاج كان فيه موظفة كانت تجيب الخضار تعمله مرتين في الاسبوع.. كانت تجيب الملوخية تقطفها و تخرطها في المكتب

لو الواد الصغير حط صباع رجله في بقه يبقي ..

October 2, 2014 · Cairo · 

بعد حوار طويل  بين "أم العيال " عندها 5 اطفال و الموظف الصعيدي متجوز من حوالي 3 سنين و عنده ولدين ..اشتمل الحوار علي عبارات " العيال عزوة " و "كل عيل بييجي برزقه " و "ربنا يرزق الناس بالعيال " كان ختامه

الصعيدي : فعلا .. ده انا لقيت ابني وهو صغير بيحط صباع رجله في بقه (فمه ) و يمصه ..سألت.. قالولنا ده كده هيجيله أخ ... و فعلا بعديها ربنا رزقنا بالتاني

أنا أي حاجة يقولها السيسي موافقة عليها

July 6, 2014 · Cairo ·

الموظفين و البنزين (2)

أم العيال : امبارح الست بتقولي السيسي غلي الحاجة انا ندمانه اني انتخبته ..معرفتش ارد عليها

أم العريف : قوليلها احنا دلوقتي محتاجين فلوس فبدل ما ناخد قرض من البنك و ندفع فوايد بنعمل جمعية أصل دي مش هتفهم لو قولتيلها الاقتصاد

أم العيال : اه حلوة دي أصل مكنتش فاهمة القرار بس أنا أي حاجة يقولها السيسي موافقة عليها

الجيش بيحدف أجهزة كهربائية علي المحتفلين بالدستور

January 26, 2014 · Cairo ·

(احتفالات الاستفتاء علي الدستور )

أم العيال : امبارح سبت العيال لماما و خدت بنت منهم و خدت جوزي و رحنا الاتحادية ..كان حكيم خلص قولت يا ريتني رحت من بدري ..و بعدين جوزي جاتله رسالة ع الموبايل انه طيارات الجيش في التحرير بتوزع هدايا قالي ده انتي فقرية

التابع للفلول : اه ده بيبقي فيها اجهزة كهربائية

الصعيدية : بيحدفوها ع الناس ؟

أم العريف : لاء بيوزعوها بالكيلوباترا ..بالهليكوبتر

التابع للفلول : بتبقي كروت و بيقولك فيها تكسب ايه

كل ما يمكن أن تأكله في مكتب حكومي من الكشري للبيض و الرمُان

 —

December 10, 2013 · Cairo ·

من خلال مشاهدتي الفعلية اليكم قائمة بما شاهدته من أكل في مكان العمل

-السندوتشات بانواعها من فول و طعمية و بطاطس و باذنجان و بابا غنوج و جمبري

- أو عيش من الفرن بلدي او فينو و معاه طعمية سايبة أو عجة

- أو فطير من الفرن و معاه جبنة قديمة (بيتي ) تقوم باحضارها احدي الموظفات

-أو كشري و ده مش بيبقي كتير

_أو بيض مسلوق

-وجبة استثنائية تتوفر بعد العيد الكبير (سندوتشات لحمة) بتعملها واحدة من الموظفات

-وجبة استثنائية تتوفر بعد عقيقة عند موظفة ..نصيب كل موظف من الرز و اللحمة في علبة بلاستيك

= عند الاحتفال بمناسبة عند حد من الموظفين بيجيب جاتوه و حاجة ساقعة و في بعض الأحيان معاه باتون ساليه

= مكملات للاكل مخللات من جزر و خيار و باذنجان أو طماطم و خيار و يتم تقطيعهم في المكتب

- الحلو ..ممكن يكون كيكة موظفة عاملاها أو ممكن فطير بسكر و مرة فيه موظفة جابتلنا عاشورا

-الفاكهة ممكن تفاح (مصري طبعا ) أو جوافة ..و مؤخرا أم العيال جابت رمان متفرط في علبة بلاستيك

-المشروبات ..شاي و نيسكافيه و قرفة و جنزبيل و كاكاو و كابتشينو .. كله بيتم عمله بالاستعانة بالبراد اللي بيشتغل بالكهربا

يا طنط هنوقع البلد و الشرطة و ناخد تمويل 100 جنيه

November 29, 2013 · Cairo · 

أم العيال : انا مجيتش امبارح اصلي كنت بازور اولياء الله الصالحين ..قالولنا علشان البنت الصغيرة شكلها محسوده خدتها و رحنا السيدة عيشة و السيدة نفيسة و السيدة زينب و بير الخضيري

- ايه بير الخضيري ده ؟

- ده بير موجود في مقام الخضيري جنب ابن طولون كنت باروحه و انا صغيرة ..خدت البنت و غسلت وشها و رجلها بمية البير

November 28, 2013 · Cairo · 

ام الفلول : ديموقراطية ايه اللي تطبقها في عقول مختلفة ده عامل و ده جاهل

November 27, 2013 · Cairo · 

ام العريف : انا امبارح كنت في ميدان طلعت حرب و بعدين دخلت في حته استخبي من الميه (استخدام الشرطة لخراطيم المياه ) فلقيت واحد من اللي كانوا في المظاهرة فباقوله انتوا بتعملوا كده ليه قالي ..يا طنط احنا حطوا اسامينا في لسته (قايمة ) و كل واحد فينا هياخد 100 جنيه ..قولتله و ينفع كده توقعوا البلد و الشرطة ..قالي ماهم هيدوا كل واحد 100 جنيه

موظفة : ماهو زياد بهاء الدين جاله ملايين الدولارات و بيوزعهم

الثانوية العامة ..شهادة طبعا ..طب بكالريوس تجارة ؟

July 30, 2013 near Cairo

من المواضيع المعقدة جدا عند الموظفين .. موضوع عايزين نلم فلوس لفلان الموضوع بيبتدي بالجواز و المرض و الولادة وصولا للحج و العمرة و النجاح في الدراسة و بيدخل فيه برضه استلطاف فلان لفلان او انه ده دفعله و ده مدفعش

برغم ان الفلولي كان اشترك في الدفع لزميلتين ولادهم نجحوا في ثانوية عامة الا انه لما قالوا هنلم علشان ابن فلانة خد بكالريوس تجارة قال مش هادفع 

الفلولي : اصل المفروض اننا ندفع في الشهادات بس

الموظفين : ما هي دي شهادة ده بكالريوس

الفلولي : لاء اصل الثانوية عامة شهادة لكن ما دام دخل الجامعة كده كده هيتخرج و بعدين البكالريوس ده ملوش فايدة ماهو هياخده و يقعد في البيت 

*معلومة  الفلولي حاصل علي بكالريوس تجارة 

مفيش واحدة محترمة تنزل مظاهرة ..و أمريكا عاوزة تقتل مرسي

July 24, 2013 near Cairo

ام العريف : الستات بتوع المنصورة الاخوان هما اللي قتلوهم منهم فيهم

العايقة : معقولة ؟

ام العريف : ماهو اللي هيضربهم ده هيقولك مش هما قابضين فلوس 

July 21, 2013 near Cairo

الفلولي : و هي امريكا عاوزه تعرف مكان مرسي ليه .. ماهو علشان تقتله زي ما قتلت صدام حسين لانه كان معاه المستندات اللي بينه و بين امريكا —

July 20, 2013 near Cairo

مقتل سيدات في المنصورة

خبر جه في رسالة ع الموبايل عن وفاة 3 في احداث امبارح

البزرميط : اه دول 3 ستات من الاخوان 

المديرة : و هما ايه اللي ينزلهم مظاهرة او مسيرة مع الاخوان مفيش واحده محترمة تنزل مظاهرات 

البزرميط : يبقي الستات اللي بتنزل مظاهرات التحرير و الاتحادية مش محترمين

المديرة : اه مش محترمين

العايقة باستنكار : ازاي يعني ؟ 

July 16, 2013 near Cairo

ام العريف : دول معترضين علي كمال ابو عيطة بتاع القوي العاملة بيقولوا كان بيشتغل مأذون

السكس تحت الحجاب ..و تبادل الزوجات عند الشيعة

July 5, 2013 near Cairo

حدث في يوم 2\7

الموظفة اللي معانا في القسم بس من اوضة تانية بعد ما ابدت فرحها بانه مرسي خلاص هيمشي :

شوفتوا حسن شحاتة الشيعي اللي مات ..ده مات موتة يستاهلها

العايقة : بس مينفعش حد يموت حد علشان مختلف معاه في الدين (خايفة علي نفسها )

الموظفة : طب هو ينفع في اي ديانة يبقي فيه تبادل زوجات ؟ ده الموته دي شوية عليه

July 4, 2013 near Cairo

واحدة جت وقفت علي الباب وشاورت ل (ام العريف) علشان تطلعلها بره الاوضة .. هي محجبة بس طالع من تحت الايشارب قصة طويلة مصبوغة اصفر مخلية الحجاب شيء رمزي

ام العريف طالعالها بره الاوضة فجت جنب العايقة اللي مصمصت شفايفها و هي مستغربة و مستنكرة 

العايقة : و ده من ايه ده ؟

ام العريف و هي مبتسمة : السكس 

تزوير في استمارات تمرد .. والموظفة بتحسس دلوقتي

May 15, 2013 near Cairo

الموظف الفلولي النهارده كان جايب معاه استمارات (تمرد) و خلي ناس توقع عليها

ام العريف : اه انا ابني امبارح بيقولي انا وقعت عليها بس غيرت اخر رقمين في الرقم القومي

May 13, 2013 near Cairo

واحدة من قسم تاني : ايه ده انتي بقيتي بتلبسي نضاره للقراية ؟

العايقة : اه الواحد بقي مش شايف اللي قدامه راجل ولا ست .. الواحد بيحسس دلوقتي

تفجيرات بوسطن وزلزال ايران ..أحسن يستاهلوا..و سلامة الجلة من النجاسة

April 17, 2013 near Cairo

 http://ar.wikinews.org/wiki/جنوب_شرق_إيران_يهزها_أقوى_زلزال_منذ_40_سنة،_وتشعر_به_دول_الجوار

- شفتوا الزلزال بتاع ايران

ام العيال : احسن .. يشربوا

April 16, 2013 near Cairo

حادث بوسطن

- شوفتوا التفجيرات بتاعة امريكا

الفلولي : تلاقي كوريا الشمالية هي اللي وراها

الصعيدية :بالسلامة

العايقة : بالسلامة ازاي ؟

الصعيدية : نخلص من امريكا و بعدها اسرائيل

ام الفلول : تلاقيهم هما اللي عاملينها علشان يضربونا

ام العريف : اه زي 11 سبتمبر امريكا هي اللي عاملاها 

April 11, 2013 near Cairo

عادة الموظف المفتي بيحب يتكلم عن حاجات مقرفة زي الروايح الكريهة , بس امبارح ام العيال قامت هي بالموضوع ده و كانت برضه بتتكلم عن حاجة مقرفة فقام قايلها

- كفاية بقي قرفتينا

العايقة : سلامة الجلة من النجاسة —

هيودوا جوزها المشرحة ..و لو مش عايز تخلف بنات قول

March 22, 2013 near Cairo

الفلولي : و كنت مع مراتي عند الدكتورة فلما شافت السونار قالتلها ان المولود بنت ..فمراتي بصيت لي كده خايفة اكون زعلت او حاجه

العايقة : ايه هترجعها يعني؟

March 19, 2013 near Cairo

الصبح جالنا الخبر انه زوج الموظفة الثورية توفي ..هو كان نقلوه المستشفي من اسبوع بعد تدهور حالته الصحية ,,جاله تليف في انسجة الرئة وهو مدخن شره من زمان ( .. و كنا عارفين انه كان في مستشفي النزهه الدولي بس قالوا انهم هينقلوه من مستشفي الجلاء ..لمسجد الرحمن الرحيم علشان يصلوا عليه

- هما مش كانوا قالوا انه كان في مستشفي النزهة

ام العريف : يبقي نقلوه منها علشان مفيهاش مشرحة

التابع للفلول مقدرش يستحمل :مشرحة ايه يا حاجه ؟ ده هو هيتحط في تلاجه و كل المستشفيات فيها تلاجات

العايقة (متوترة) : مش عارفة اجمع الارقام اللي في الكشف

التابع للفلول وهو بيبص ناحية ام الفلول : ده هي اللي مش عارفه تجمع —

الاخوان بيتاجروا في الحشيش ..و العايقة في اليوم العالمي للنسوان

March 11, 2013 near Cairo

المديرة : امبارح ابني و هو رايح الشغل لقي ناس موقفين الطريق و مبيخلوش عربية تعدي غير لما تدفع 100 جنيه يا اما يكسروا القزاز و العربية و كانوا بيشتموا الناس بيقولوهم بقي انتوا بتركبوا عربيات بميت الف جنيه و احنا مش لاقيين ناكل

و بنته (حفيدة المديرة) اتعورت امبارح كانت في باص المدرسة و كانوا بيوقفوا العربيات و السواق بتاع الباص هرب منهم و هو بيهرب فيه ولاد وقعوا علي الارض و المشرفه اتعورت بطوبة اتحدفت عليهم 

*******

العايقة و هي بتتصفح الفيس بوك بتاعها علي التليفون : مصورين ابن مرسي و هو بيشرب جوزه ..يا تري بيشرب فيها ايه؟

ام العريف : حتي لو فيها حشيش ماهو الحشيش عندهم حلال ..هي علاقاتهم بافغانستان ليه ماهو علشان تجارة الحشيش ..امال هما جايبين فلوسهم دي كلها منين؟ 

March 9, 2013 near Cairo

العايقة : امبارح كان اليوم العالمي للنسوان ..كان نفسي انزل بس جوزي قالي لاء

الموظف المفتي : بس انتي مبتحبيش الحاجات اللي كلها ستات دي

العايقة : لاء ماهو هيبقي فيه رجاله هاروح جنبهم —

March 9, 2013 near Cairo

 "بعد رد فعل الالتراس علي الجكم في قضية مذبحة بورسعيد "  

المديره :و هما ليه يروحوا يحرقوا نادي الشرطة و اتحاد الكورة ما يروحوا الاتحادية عند مرسي

ام الفلول : و علي فكرة الاخوان هما اللي ورا مذبحة بورسعيد 

المسيحيات عرايا و مصر بتصدر غاز لاستراليا

February 28, 2013 near Cairo

ام العريف :كانوا جايبين واحد امبارح في التليفزيون بيقول قطر ايه دي اللي مدينها اهتمام ..تيجي ايه فلوس قطر مع شماختنا ؟ — 

February 25, 2013 near Cairo

- ده النهارده قضية ابو اسلام

= مش ده اللي قال علي المسيحيات عرايا ؟

-= بيقولوا انه كان مسيحي و اسلم 

البزرميط : اه ماهو علشان كده عارفهم 

February 23, 2013 near Cairo

المديره : منه لله طنطاوي هو السبب في اللي احنا فيه دلوقتي

ام الفلول : ده هو كان متفق مع الاخوان علي كده من قبل الثورة اصلا

February 19, 2013 near Cairo

الفلولي : امبارح جاتلي فاتورة الغاز زيادة 18 جنيه

ام العريف : يعني هما يغلوا علينا و يدوا الغاز لاسرائيل و الاردن و استراليا برخص التراب ؟ —

مرة واحد طلق مراته علشان سمت بنتها جومانا ..و التانية قالت لجوزها عند أمك

December 31, 2012 near Cairo

الموظف الثوري \ اخواني : انا ابن خالي كان مسافر و عامل توكيل لمراته علشان تسمي بنته لما تولد قامت سميتها جومانا و هما كانوا متفقين علي جانا .. قام طلقها 

December 29, 2012 near Cairo

العايقة : مش انت قولتلنا انه  اللي مسك المكان اللي احنا شغالين فيه مش اخوان ؟

الفلولي : لاء هو اخوان بس من الخلايا النايمه

العايقة : و جاي يصحي هنا ؟ 

December 27, 2012 near Cairo

ام العيال : كنت زمان اقشر لجوزي السمك ..دلوقتي باحطهوله زي ما هو و اقوله لو مش عايز تاكل بلاش .. بيقولي ده امي كانت بتجيبلي الاكل في السرير ..قولتله ...ده عند امك — 

December 23, 2012 near Cairo

النهارده العايقة 

جابت معاها كزبرة و قعدت تقطفها علي المكتب و تبتعمل ده في همة و نشاط .. و بعد ما خلصت بصتلنا و قامت قايلة 

" ها تاكلوا يا ولاد دلوقتي ولا تستنوا لما بابا ييجي؟ "

December 23, 2012 near Cairo

الموظفة الصعيدية :مراة اخويا ولدت و ابنها دخل الحضانة (للمولودين حديثا) ..هي السبب خلت الدكتور يولدها بدري عن ميعادها علشان تولد يوم 12-12-2012 

رقص و قلة أدب في الفرح ..ماتيجوا نشوف

September 6, 2012 near Cairo

المديره : رحت فرح امبارح ايه البنات لابساه ده ؟ و قعدوا يرقصوا رقص حاجه قلة ادب .. و مامت العروسة دي ولا فيفي عبده هي اتحجبت بس علشان بنتها لما اتحجبت قالتلها مش هينفع اكون انا محجبة و انتي لاء.. ده ابني ودا وشه الناحيه التانيه و قعد نص ساعه و مشي

......................
اليوم التالي

موسيقي اغنية حبيبي يا عيني ماليه المكتب و موظف و موظفة قاعدين بيفرجوا علي فيديو للبنات اللي كانت بترقص في الفرح علي موبايل المديره

المديره : بكره اجيبلكم اللي صورته بنتي ده هي شاطرة في التصوير 

صعيدي و يهودي و شيوعي في مكتب حكومي

September 3, 2012 near Cairo

من عادة (أبو نضارة) انه ياخد معاه الشغل كتب علشان يقراها في وقت الفراغ اللي بيكون مش قليل , و مرة من المرات كان بيقرا كتاب لنعوم تشومسكي
و شاف الموظف الصعيدي الكتاب و بص علي اسم المؤلف  و كان تعليقه

الموظف الصعيدي :  "ايه ده انت بتقرا كتاب لواحد يهودي" .. و قام ماسك الكتاب و رافعه في ايده و قال بصوت عالي للمكتب كله 
 "الحقوا يا جماعه ده بيقرا كتاب لواحد يهودي"

و اخيرا سأل السؤال المنتظر

انت قاعد بتقرا كتب كلها ليهود .. انت شيوعي ؟

تبع الراجل اللي في روسيا ده اللي اسمه ... لينين 

و فيها ايه ان الهام شاهين تتباس و تتكلم عن الاسلام ؟ ..و ملابسنا الداخلية موجودة

August 29, 2012 near Cairo

البياعة اللي سنها فوق السبعين  : معايا حبل غسيل عايزين ؟

العايقه : لاء احنا عندنا الهدوم كلها .. كل الاحجام .. داخلي و خارجي

August 29, 2012 near Cairo

الموظفة الثورية \اخوانية : ينفع واحده بتتعرا و تتباس زي الهام شاهين تتكلم عن الاسلام ؟

ام العريف : و ماله .. ما هي مبسوطه كده 

عن الموظفين الغلابة اللي بيشتروا موبايلات بالالاف .. و البياعة اللي معاها 35 الف جنيه

1. May 13, 2012 near Cairo
    ععن
    قضية موظفين المجتمع المدني الامريكان اللي سافروا من مصر
    ام الفلول عن قضية الامريكان : عبد المعز ده كان بينفذ .. الجيش هو اللي مشاهم .. الجيش حما البلد من مصيبه سوده .. احنا منقدرش نقف قدام امريكا .. ده الكونجرس بهدل اوباما علشان الامريكان دول —
2. 
   
   

   May 13, 2012 near Cairo

   الموظفة(عن ابنها) : ده احنا جبناله لما نجح في الاعدادية موبايل ب الفين جنيه
3. 
   

   
   May 9, 2012 near Cairo

   ام العيال النهارده كانت بتشتري موبايلين لعيالها اللي في اعدادي و ابتدائي ب 1200 جنيه
   
   بياعة البسكوت و كروت الشحن بتقول انها ناوية تحج ب 35 الف جنيه لتاني مره