أنا أي حاجة يقولها السيسي موافقة عليها

July 6, 2014 · Cairo ·

الموظفين و البنزين (2)

أم العيال : امبارح الست بتقولي السيسي غلي الحاجة انا ندمانه اني انتخبته ..معرفتش ارد عليها

أم العريف : قوليلها احنا دلوقتي محتاجين فلوس فبدل ما ناخد قرض من البنك و ندفع فوايد بنعمل جمعية أصل دي مش هتفهم لو قولتيلها الاقتصاد

أم العيال : اه حلوة دي أصل مكنتش فاهمة القرار بس أنا أي حاجة يقولها السيسي موافقة عليها

مرسي هيهرب لاثيوبيا ..و قطع الميه و الكهربا هيقضي علي الشعب

June 27, 2013 near Cairo

ام الفلول : الاخوان قاطعين عننا الكهربا و الميه و مفيش بنزين

الموظفة الصعيدية : عايزين يقضوا علي الشعب و تيجي حماس تاخد بيوتنا و اماكنا و شغلنا

العايقة : و رجالتنا 

June 26, 2013 near Cairo

الفلولي : بيقولوا يمكن مرسي يهرب علي اديس ابابا 

.................

 دول جايبين فيديو لفضل شاكر و هو ماسك سلاح 

ام العريف : ايوه ده انضم لحزب الله 

June 25, 2013 near Cairo

الموظف الصعيدي : ام حازم ابو اسماعيل تبقي اخت ابو ايمن نور يعني عمة ايمن نور

ام الفلول : اصلا ابو حازم ابو اسماعيل ده كان في الحزب الوطني و كان من ضمن نواب القروض

.........................

الموظف المفتي : جواهر اللي بتغني تبقي بنت احمد منيب 

رجع الانابيب اللي انت خدتها يا مرسي

June 26, 2012 near Cairo

الفلولي : المجلس العسكري اجتمع مع شفيق قبل النتيجه و قاله معلش هنعلن انك خسران .. النتيجه اتغيرت الساعة 2 و نص .. المجلس العسكري خاف من الاخوان .. شفت مسكوا 3 قنابل عند واحد سني في طوخ .. دول كانوا ناويين يفجروا الكنايس لو مرسي خسر—


June 25, 2012 near Cairo

ام العريف في الموبايل مخاطبة ابنها المؤيد لمرسي :مش هاجيبلك الجرنال ما الجرايد مرميه علي الرصيف محدش بيجيبها .. ماهو موجود في كل حته (مرسي) مش هادخله بيتي كمان
June 25, 2012 near Cairo
ام العريف : اه دلوقتي بقي مرسي هيرجع البنزين بعد ما اخد الانابيب و اخد البنزين علشان يبين الرخاء

اغنية عبد الوهاب لست قدري

March 26, 2012 near Cairo

الموظف الفلولي : عرفتوا مين اللي ورا ازمة البنزين و السولار .. الاخوان

الموظفين : ازاي؟

الموظف الفلولي :بيدوا سواقين النقل عشرين الف جنيه علشان يرموا السولار و البنزين في الصحرا علشان يسقطوا الحكومه .. امن الدولة كشفت الموضوع —

March 25, 2012

الموظف وهو بيحل الكلمات المتقاطعه : فيه اغنيه لعبد الوهاب اسمها لسه بدري ؟


ابو نضارة  : قصدك لست أدري

الموظف : ادري بالقاف ولا بالالف ؟