تزوير في استمارات تمرد .. والموظفة بتحسس دلوقتي

May 15, 2013 near Cairo

الموظف الفلولي النهارده كان جايب معاه استمارات (تمرد) و خلي ناس توقع عليها

ام العريف : اه انا ابني امبارح بيقولي انا وقعت عليها بس غيرت اخر رقمين في الرقم القومي

May 13, 2013 near Cairo

واحدة من قسم تاني : ايه ده انتي بقيتي بتلبسي نضاره للقراية ؟

العايقة : اه الواحد بقي مش شايف اللي قدامه راجل ولا ست .. الواحد بيحسس دلوقتي

المخابرات و المقلاع .. و انا بحب الملك علشان اضطهد المسيحيين

April 29, 2013 near Cairo

«المصري اليوم» تنشر تفاصيل 5 مكالمات «سرية» بين «الإخوان» و«حماس» خلال الثورة "المقلاع  خلف المتحف "

http://www.details/309048almasryalyoum.com/news/

ام الفلول : اه ماهما حماس اللي ورا كل اللي حصل ماحنا قولنا كده

الفلولي : طب مش هاقولك فين الشرطة ..طب كانت فين المخابرات ..كان فين الجيش .. الخبر ده زعلني مبسطنيش

May 5, 2013 near Cairo

هكذا احتفل الموظفون بعيد القيامة في غياب العايقة

- طب وهو موضوع انك تهني المسيحين في عيدهم ده حلال ولا حرام ؟

الفلولي (المتربي في شبرا وسط المسيحيين علي حد قوله) :ده كلام فاضي .. ايام الملك اللي بيقولوا عليه مش كويس مع انه عمل حاجات كويسة كانت شهادة المسيحي قدام المحاكم نص شهادة ..هو ده الصح مش تقوليلي تهنئة

سرقة و تعذيب لمسلمين ..بس المسيحيين حرامية أصلا

April 28, 2013 near Cairo

الموظف الصعيدي : ده حصل موقف في الشركة (اللي بيشتغل فيها بعد الضهر و صاحبها

مسيحي) .. الاوفيس بوي اللي في الشركة هو من عين شمس راح المخزن الساعة 6 الصبح و كان بيسرق البضاعة .. و كان موقف العربية اللي هو محمل عليها .. جه اتوبيس مدرسة مكانش عارف يعدي فبيقوله وسع الطريق علشان اعرف اعدي ..قاله حاضر و خلاه يعدي ..اتاري سواق الاوتوبيس ده يعرف صاحب الشركة لانه كان شريك في المدرسة دي ..فبيكلمه يقوله ينفع يعني علشان تنقلوا البضاعة تركنوا في نص الشارع .. قاله ازاي ؟ قاله ده كان واحد من عندكم بيحمل النهارده الصبح .. قام صاحب الشركة عمل محضر و رحنا لمدير امن شرق القاهرة .. قام ودانا لقسم مصر الجديدة ..قالولنا ليه بس عملتوا المحضر .. و جم الشركة .. و خدوا الولد قام هرب منهم و هو بيجري خبط في تاكسي قاموا مسكوه و خدوه قسم مصر الجديدة ..عجنوه هناك .. و هو هناك اتصل بشريكه بيقوله فين البضاعة ده انا مقبوض عليا في القسم قام صاحبه قافل الموبايل 

- مسيحي الولد ده ؟

الصعيدي : لاء مسلم بس اصلا المسيحيين دول معندهمش حلال و حرام هما حرامية اصلا

الثورية\ متعاطفة مع الاخوان حاليا : ده احنا كل اللي بنقرا عنهم بيطلعوا مسلمين مبنشوفش مسيحي بيسرق ولا بيشحت

الصعيدي : بس المسيحين مفيش عندهم حاجة اسمها حلال و حرام 

تفجيرات بوسطن وزلزال ايران ..أحسن يستاهلوا..و سلامة الجلة من النجاسة

April 17, 2013 near Cairo

 http://ar.wikinews.org/wiki/جنوب_شرق_إيران_يهزها_أقوى_زلزال_منذ_40_سنة،_وتشعر_به_دول_الجوار

- شفتوا الزلزال بتاع ايران

ام العيال : احسن .. يشربوا

April 16, 2013 near Cairo

حادث بوسطن

- شوفتوا التفجيرات بتاعة امريكا

الفلولي : تلاقي كوريا الشمالية هي اللي وراها

الصعيدية :بالسلامة

العايقة : بالسلامة ازاي ؟

الصعيدية : نخلص من امريكا و بعدها اسرائيل

ام الفلول : تلاقيهم هما اللي عاملينها علشان يضربونا

ام العريف : اه زي 11 سبتمبر امريكا هي اللي عاملاها 

April 11, 2013 near Cairo

عادة الموظف المفتي بيحب يتكلم عن حاجات مقرفة زي الروايح الكريهة , بس امبارح ام العيال قامت هي بالموضوع ده و كانت برضه بتتكلم عن حاجة مقرفة فقام قايلها

- كفاية بقي قرفتينا

العايقة : سلامة الجلة من النجاسة —

الشيعة معتصمين في جامع الحسين .. و مرسي مخبي الظواهري في الطيارة

April 10, 2013 near Cairo

ام العريف :ده واحد بيقولي امبارح الشيعة ماليين جامع الحسين و مش عارفين يطلعوهم

و بصت لجرنال الوطن قدامها و اضافت :اهو قرية كاملة في اسيوط اسمها الحسينية اتشيعت

..

ده كان  عنوان الخبر :

الوطن | سلفيون: ظهور أول «حسينية» بأسيوط.. وأفرادها يجتمعون سراً 

April 10, 2013 near Cairo

 الموظف الفلولي اللي درس في مدارس فرنساوي و اتربي مع المسيحيين في شبرا

الموظف التابع للفلول : تعرف دكتور امراض صدرية و يكون بيعالج اطفال ؟

الفلولي : فيه واحد في شبرا _ ووطي صوته علشان متسمعوش العايقه - هو مسيحي بس كويس 

April 1, 2013 near Cairo

الموظف الصعيدي : شوفتوا مرسي عمل ايه في باكستان جاب الظواهري معاه ..و داه الهند و قعد في الطيارة 24 ساعة

ام الفلول : و جابوا بعد كده علي مصر — 

بنتك هتجيب عيال من الموبايل .. و دين المونوكير

March 29, 2013 near Cairo

الموظفة الصعيدية : باقول لجوزي هما الاخوان دول كام يعني ؟ قالي 4 او 5 مليون

- : و احنا 90 مليون

الموظفة الصعيدية ( في تحفز): يعني ميقدروش يطلعوهم من البلد ؟ 

March 27, 2013 near Cairo

اصطباحة العايقه

التابع للفلول : ده البنت (بنته في ابتدائي) طول الوقت الموبايل معاها تقعد تلعب غليه جيمز او علي ودنها حاطه السماعات

العايقه : امال عايزها تجيب منه عيال ؟ 

March 26, 2013 near Cairo

الموظفة الصعيدية للبياع اللي بيعرض في المكتب : معاك مونوكير اسلامي؟ 

........................

ام العريف : فيه قاضي عايز يتبرع بجزء من مرتبه ل "شهداء مصابي الثورة"

....................................

ام العريف : مرة اشرف عبد الباقي كان بيصور جنبنا فيلم "اريد حلا"

هيودوا جوزها المشرحة ..و لو مش عايز تخلف بنات قول

March 22, 2013 near Cairo

الفلولي : و كنت مع مراتي عند الدكتورة فلما شافت السونار قالتلها ان المولود بنت ..فمراتي بصيت لي كده خايفة اكون زعلت او حاجه

العايقة : ايه هترجعها يعني؟

March 19, 2013 near Cairo

الصبح جالنا الخبر انه زوج الموظفة الثورية توفي ..هو كان نقلوه المستشفي من اسبوع بعد تدهور حالته الصحية ,,جاله تليف في انسجة الرئة وهو مدخن شره من زمان ( .. و كنا عارفين انه كان في مستشفي النزهه الدولي بس قالوا انهم هينقلوه من مستشفي الجلاء ..لمسجد الرحمن الرحيم علشان يصلوا عليه

- هما مش كانوا قالوا انه كان في مستشفي النزهة

ام العريف : يبقي نقلوه منها علشان مفيهاش مشرحة

التابع للفلول مقدرش يستحمل :مشرحة ايه يا حاجه ؟ ده هو هيتحط في تلاجه و كل المستشفيات فيها تلاجات

العايقة (متوترة) : مش عارفة اجمع الارقام اللي في الكشف

التابع للفلول وهو بيبص ناحية ام الفلول : ده هي اللي مش عارفه تجمع —