و فيها ايه ان الهام شاهين تتباس و تتكلم عن الاسلام ؟ ..و ملابسنا الداخلية موجودة

August 29, 2012 near Cairo

البياعة اللي سنها فوق السبعين  : معايا حبل غسيل عايزين ؟

العايقه : لاء احنا عندنا الهدوم كلها .. كل الاحجام .. داخلي و خارجي

August 29, 2012 near Cairo

الموظفة الثورية \اخوانية : ينفع واحده بتتعرا و تتباس زي الهام شاهين تتكلم عن الاسلام ؟

ام العريف : و ماله .. ما هي مبسوطه كده 

خلي شهر رمضان ينفعك ..و أنا اللي منعت الاسطول الامريكي يدخل قناة السويس

August 28, 2012 near Cairo

بعد العيد

 موظفة : ما تخلي الساعي يجيبلك فطار

العايقه : لاء انا مبكلموش .. باقوله صباح الخير قالي في رمضان لاء .. خلي رمضان ينفعك — 

August 27, 2012 near Cairo

ام العريف : امبارح كان قائد القوات البحرية اللي مرسي شاله كان بيقول ان امريكا كانت جاهزة بالاسطول بتاعها قريب من مصر كذا مره و انه هو اللي منعهم انهم يدخلوا قناة السويس

ام الفلول : اه ماهما عاوزين يعملوا فينا زي العراق 

August 27, 2012 near Cairo

العايقه :ده امبارح قدام القصر كانوا بيهتفوا مصر اتباعت لفلسطين .. بقي مرسي بقفل المعابر بتاعة غزه 6 ايام بس و يرجع يفتحها ؟! 

اوعي تدوس علي لسان واحد ميت ..والا

August 26, 2012 near Cairo

بعد نقاش و لخبطه بين مين اول واحد طلع الفضاء و بين اول واحد نزل علي القمر ارمسترونج

الموظفه الثورية : امبارح مات اول واحد طلع القمر

ام العريف : اه عملوله صلاة في الجامع .. لما كان فوق شاف الجامع النبوي و الكعبه منورين و سمع الادان —

August 22, 2012 near Cairo

الصعيدي : عارفين ايه بيفضل في جسم الانسان لما يموت حته كده في اخر العمود الفقري و ربنا بيخلق الناس منها يوم القيامه

الفلولي : اللي بيفضل من جسم الانسان هو اللسان .. اصل انا دفنت ناس كتير .. اللسان ده بيبقي عامل زي الابره زي الشوكه كده بس اوعي تدوس عليه .. لو دوست عليه حياتك تبقي كلها نكد 

اسكندر مات ..يللا بالسلامة ..و يا رب اسرائيل تحارب مرسي

August 22, 2012 near Cairo

مدير الادارة : الاستاذ اسكندر توفي

التابع للفلول : احسن يللا بالسلامه

هو كان طالع معاش بقاله قد ايه ؟

المدير : 12 سنه

ام العريف : ده كده متأخر 12 سنه ده طوّل  .. ماهو علشان تلاقيه بياكل لحم مقدد و بياكل الزيت 

August 22, 2012 near Cairo

الصعيدي : انا جالي شغل في الكويت بس المرتب ضعيف

البزرميطي : اه السكن هناك غالي قوي ممكن يوصل لالف دينار في اليوم —

August 22, 2012 near Cairo

  الفلولي : نازل 24 ؟ " مظاهرة24 اغسطس اللي دعي ليها محمد ابو حامد"

الصعيدي : انا عايز اسيب البلد دي .. عارف هي هتخرب علي مرسي امتي ؟ لما يزور ايران ساعتها اسرائيل مش هتسكتله 

الفلولي : انا بقي عايزه لما يحارب يروح يحارب برجالته .. ما دام هتتورط في حرب حارب انت و رجالتك بقي 

المشيرطنطاوي اخد جزاؤه ..و قطر كلها اسرائليين و امريكان

August 16, 2012 near Cairo

الموظف المفتي : امبارح كانت ليلة القدر

ام العريف: ايوه السما كانت صافيه امبارح

August 14, 2012 near Cairo

http://www.almaany.com/home.php?language=arabic&lang_name=عربي&word=ردينة

الموظف المفتي : معني اسم ردينه .. دي كانت السحابه اللي بتظلل الرسول

.................................

ام العريف : بنت اختي هناك في قطر .. المدرسين هناك كلهم اسرائليين و امريكان

..............................

ام الفلول :طنطاوي هو اللي طلع الاخوان و خد جزاؤه .. ربنا 

 بيسلطهم علي بعض

August 13, 2012 near Cairo

الموظف المفتي : مش مهم رأي الدكتور... اه الحوامل يصوموا ..ده هما بينبسطوا علشان و هما حوامل بيقدروا يصوموا الشهر كله — 

السعوديين بيحبوا مصر علشان القلع ..و جاسوس مرسي الكمساري كشفه

August 13, 2012 near Cairo

الموظفة الثورية : ماهو بعد اللي حصل في سينا ده كان لازم مرسي يشيل وزير الدفاع

ام الفلول : ماهو اصلا العملية دي بتدبير من مرسي و حماس علشان يشيلهم 

.....

ام الفلول : ده السعوديين من بعد الثورة دي مبقوش يحبونا .. بس قبل كده كانوا بيحبونا

العايقه : هما كانوا بيحبونا علشان كانوا بييجوا يقلعوا عندنا .. الواحد يقول الصراحة

August 8, 2012 near Cairo

ام العريف : ده كل الناس بتشتم مرسي

التابع للفلول : بس لسه فيه ناس بتدافع عنه

ام العريف : اه هما زارعين ناس في الاتوبيسات تدافع عنه .. الكمساري مرة قال لواحد بيدافع عنه انت بتركب الاتوبيس من غير هدف 

August 7, 2012 near Cairo

الفلولي :الشهيد ده يتدفن بجزمته و بدمه مبيتغسلش و جسمه مبيتحللش

ام العريف : يفضل كده لحد يوم القيامه 

مرسي هو اللي قتل الجنود في رفح .. لاء ده الجيش هو اللي عملها

August 7, 2012 near Cairo

(عن مذبحة الجنود في رمضان )

ام الفلول : اللي هربوا من السجون هما اللي عملوا العملية دي بالاتفاق مع مرسي

البزرميط : ده الجيش هو اللي عاملها 

August 6, 2012 near Cairo

تذكر : ام العيال مخلفة 5 عيال

ابو العريف : ام العيال بتضحك مع جوزها في الموبايل .. ايه انتوا مبتضحكوش في البيت ؟

العايقه : هيضحكوا ازاي هو فيه مكان ؟ 

August 6, 2012 near Cairo

http://www.masrawy.com/news/egypt/politics/2012/August/3/5231982.aspx

بعد حادث فندق فيرمونت 

ام الفلول : البلطجي بتاع الكورنيش اللي مات ده مرسي كان مديله عفو و طلع من السجن علشان حسن سير و سلوك

ده رجال الاعمال بيخلوا البلطجيه يحموهم و عرف بيدولهم ايه 

عربية مرسيدس و ميتين الف جنيه لكل واحد