الجيش بيحدف أجهزة كهربائية علي المحتفلين بالدستور

January 26, 2014 · Cairo ·

(احتفالات الاستفتاء علي الدستور )

أم العيال : امبارح سبت العيال لماما و خدت بنت منهم و خدت جوزي و رحنا الاتحادية ..كان حكيم خلص قولت يا ريتني رحت من بدري ..و بعدين جوزي جاتله رسالة ع الموبايل انه طيارات الجيش في التحرير بتوزع هدايا قالي ده انتي فقرية

التابع للفلول : اه ده بيبقي فيها اجهزة كهربائية

الصعيدية : بيحدفوها ع الناس ؟

أم العريف : لاء بيوزعوها بالكيلوباترا ..بالهليكوبتر

التابع للفلول : بتبقي كروت و بيقولك فيها تكسب ايه

موظفة بتسخر من القرآن ..و موظفة اتسرقت في المكتب

January 23, 2014 · Cairo ·

أم العريف اتسرقت .الجزء التاني

أم العريف (بضحك ) : امبارح روحت و حكيت لجوزي ع اللي حصل ..لقيته طالع البلكونة و بيكلم ابني ع الموبايل و الدنيا هادية علشان الجيران تسمع و بيقوله امك اتسرقت

و الواد التاني و هو لسه داخل من البيت قاموا حكوا له قال ده انا هاكتبها ع الفيس بوك قولتله الاكل لسه ما اتعملش لو كتبتها مفيش اكل النهارده

January 20, 2014 · Cairo ·

أم العريف اتسرقت

الصبح دخل بياع بكرتونة بيبيع كوبايات ازاز و بينما بيفاصل مع الموظفين في سعر الدستة ..طلبت منه أم العريف فكة 100 جنيه قالها حاضر هافكهالك طلع من الاوضة و ساب الكرتونة اللي فيها حوالي 6 دست"جمع دستة" كوبايات و مرجعش لحد ما مشينا

أم العريف : و ايه يعني 100 جنيه ولا يهمني

January 19, 2014 · Cairo ·

أ م الفلول : لاء و كاتبة علي الفيس بوك ( الموظفة الاخوانية \ الثورية) بتقول بتريقة امال لو ما كانوش خير اجناد الارض

أم العريف : كمان بتتريق ع القرآن !

نسبة مشاركة المصريين في استفتاء الدستور أكبر من مشاركة الأمريكان و الانجليز

January 18, 2014 · Cairo ·
الاستفتاء علي الدستور 2

الفلولي أحس بخيبة أمل في موضوع نسبة المشاركة و في عدم مشاركة الشباب

1 الفلولي : شوفتوا الست اللي عندها 113 سنة و راحت صوتت ولا اللي مقطوع ايديه الاتنين و صمم انه يروح ..دول مش عايزين حاجة من البلد خلاص مش الشباب اللي عايزين ياخدوا 200 جنيه في مظاهرات الاخوان

2 الفلولي : لاء نسبة 38% مشاركة دي مش قليلة دي نسبة المشاركة في الدستور البريطاني و الامريكي مازادتش عن حاجة و تلاتين في الميه

التابع للفلول مندهشا و مصدقا : ياه

واحدة مسيحية هتقول ايه للدستور يعني ؟ وواحد مخلص جيش هيقول ايه للدستور ؟

January 15, 2014 · Cairo ·

الموظفين و الاستفتاء علي الدستور (1)

العايقة متعودة في الاستحقاقات الانتخابية انها تروح اللجنة بدري قوي تقف اول واحدة و تدلي بصوتها و بعد كده تيجي ع الشغل علشان لو روحت ممكن تكسل تنزل تاني

بعد ما جت و شتمت القاضي علشان اتأخر في الوصول للجنة

أم العيال : ها و قولتي ايه بقي نعم ولا لاء

العايقة (باستنكار و استغراب ) : واحدة مسيحية هتقول لاء ؟!

..

ابن أم العريف اللي خلص تجنيده السنة اللي فاتت أمه حاولت تقنعه انه يقول نعم قالها انه هيروح و يقول لاء هو و اصحابه

الحمد الله الدستور مفيهوش حرية للشيعة ..الواد ابني فاشل في الغش

January 14, 2014 · Cairo · 

الموظفة الصعيدية : ده الاخوان بيقولوا ان الدستور ده بيدي حق للشيعة في ممارسة شعائرهم

أم الفلول : لاء الحرية دي للديانات السماوية بس

التابع للفلول : يعني لا بوذية ولا هندوس ولا شيعة

أم العيال : مادام السيسي قال انزلوا يبقي هنقول نعم حتي لو فيه ايه

January 12, 2014 · Cairo · 

أم العيال : لما اضحككم الواد ابني عمل موقف ( تضحك )

العايقة : هي هتضحك الاول ؟

أم الفلول : لاء دي بتمهدلنا الحكاية

أم العيال : اصلي كل ما افتكر اضحك ..الواد امتحاناته قربت فالمُدرسة الخصوصية بتاعته اديتله مجموعة امتحانات يحلها ..فالواد لانه فاشل جه يادوب قبل ما المُدرسة تيجي بسرعة و راح يغش و ينقل من الاجابات بتاعة الامتحانات دي فمن استعجاله قام كاتب في الاجابة "علي الطالب الاجابة علي الاسئلة " يعني الواد فاشل حتي انه يغش

البياعة المسيحية اديتني شنطة عليها جماجم و صلبان ..و أثيوبيا دفعت رشوة مليار دولار لمرسي

January 7, 2014 · Cairo ·

الموظفة الصعيدية بتحب تجيب شنط اللي هي ممكن تحط فيها حاجات و تتمسك في الايد مش الشنط النسائية اللي بتتحط علي الكتف , و ده كان المدخل اللي خلاها تتعامل مع البياعة المسيحية اللي بتجيب شنط كويسة اللي غالبا مكانتش هتفضل تتعامل معاها

أول شنطة

الصعيدية : شوفتوا البياعة اشتريت منها شنطة و لما روحت البيت لقيت الشنطة محطوط عليها جماجم و صلبان اعمل ايه دلوقتي ارجعالها ؟ ( الحقيقة ان الشنطة عليها جماجم و عليها تاج ملكي جواه فيه صليب )

تاني شنطة

الصعيدية ماسكة شنطة من دول

الثورية \ اخوانية حاليا : ده ايه العلم اللي علي الشنطة ده ؟ علم بريطانيا ؟

الصعيدية : باينه

ام الفلول و موظفة تانية : مش عارفين

(الحقيقة ان الشنطة عليها علم امريكا )

January 4, 2014 · Cairo ·

الفلولي : ده فيه جرنال اثيوبي من يومين نشر ان مرسي اخد من اثيوبيا مليار دولار علشان يوافق علي سد النهضة ..و قالوله لو انكرت هنطلع الورقة ..و هشام قنديل هو اللي استلم منهم الفلوس

بابا الفاتيكان قال لأمريكا مكتوب علي جبهة محمد مرسي انه شيطان

January 1, 2014 · Cairo · 

بمناسبة العام الجديد و

الفلولي : حد شاف الست اللي بتتنبأ اللي بتيجي علي القاهرة و الناس اسمها ..

ام الفلول: اسمها جو عياد

الفلولي : انا مبصدقش في الحاجات دي بس بحب اشوفها ..دي 

 v قالت ان مرسي مكتوب علي قورته (جبهته) حرف ال  بالانجليزي   و الحرف ده يعني الشيطان ..انتي مش كنتي بتشوفي الكهربا و هي بتقطع ..اللي عرف موضوع الشيطان ده كان بابا الفاتيكان و قال لامريكا  ,فامريكا قالت لمرسي متجيش

اللي عاجبني في ابراهيم عيسي انه ثابت علي موقفه .. روحي اشربي معاهم حاجات غريبة

أم العيال : امبارح الواد ابني (10 سنين ) شاف الاعلان بتاع يا قلبها بيقول لابوه ..ماما اهيه

.

-- أغنية يا قلبها -- العروسة

أغنية يا قلبها -- العروسة

December 29, 2013 · Cairo · Edited ·

أم الفلول : لا محمود سعد و مني الشاذلي دول كانوا بتوع البرادعي و قلبوا ..الوحيد اللي مغيرش موقفه ..ابراهيم عيسي !!

December 29, 2013 · Cairo ·

العايقة اخدت بكره و بعده من اجازاتها العارضة اللي هيكون فيهم ليلة راس السنة

موظفة : و هتقضي راس السنة فين ؟

العايقة :غالبا في البيت

ام العريف : ليه مش كنتي بتروحي لاختك ؟

العايقة : لاء اصلهم بيشربوا حاجات غريبة كده

أم العريف "مشجعة " : لاء روحي