أمريكا تخابرت مع مرسي و هددت شفيق بالقتل و عاوزه تقسم مصر

July 9, 2012 near Cairo

ام الفلول : و هو مرسي كانوا قابضين عليه ليه يوم 28 يناير علشان قضية تخابر مع امريكا 

July 9, 2012 near Cairo

الصعيدية : شفيق كان ناجح بس امريكا اتدخلت و هددوه بالقتل

July 9, 2012 near Cairo

ام الفلول : و هي امريكا قلبت علي مبارك ليه؟

الصعيدي : علشان مكانش معاها

 ام الفلول : علشان كان ضد مخططها بتاع تقسيم مصر

ما تيجي يا جميل نعمل وحدة وطنية و نبوس بعض

July 9, 2012 near Cairo
الفلولي :ماهو المجلس العسكري سلم البلد للاخوان لانه خايف من الدم اللي ممكن يسيل


ام الفلول : ماهو كده كده دم يبقي تبتدي دم من الاول 


July 9, 2012 near Cairo


ام العريف : محدش موافق علي رجوع البرلمان غير الاخوان و السلفيين .. و 6 ابريل ماهما واخدين فلوس منهم 


July 7, 2012 near Cairo



الفلولي : عايزين نعمل وحده وطنيه بقي

العايقه : ايه ... نبوس مع بعض ؟ —

قصة رعب من مقابر روض الفرج

July 5, 2012 near Cairo

قصة  قصيرة من قصص الرعب  من قصص الفلولي من روض الفرج تنتمي لاجواء ادجار الان بو

الفلولي : فيه واحد بقي في المنطقة جلد جفونه كبير قوي نازل علي وشه مخبيه متقدرش تشوف وشه ..لانه ده كان نزل القبر كان عايز يشوف الملايكه و هي بتحاسب الناس 

ام الفلول : اه اسمع عنه 

ضبة بتاع السمين .. اللي سب الدين لامام الجامع في رمضان

July 5, 2012 near Cairo

قصتان قصيرتان من الموظف الفلولي في اجواء روض الفرج

قصة 1

كان عندنا واحد زمان الله يرحمه بقي كان اسمه ضبة بتاع السمين .. كان تخين قوي و كان عمره ما ركعها .. مع انه كان كبير في السن .. و بعدين مرة قالوله انت كبرت ولازم تصلي .. راح معاهم الجامع علشان يصلي العشا و كانوا في رمضان .. قام الامام لضم التروايح مع العشا .. و ضبه ده قاعد طالع نازل .. قام بعد ما الصلاة خلصت ..وقف في الجامع و مزعق للامام .. يلعن دين اللي يجيلك تاني يا اخي 

الجهاد الديموقراطي و طماطم بالحموضة

July 5, 2012 near Cairo

العايقه : الاخوان هما اللي موتوا الولد بتاع السويس ده

ام الفلول : لاء دول السلفيين اصل فيه جماعات كتير .. ده فيه جماعه منهم اسمها الجهاد الديموقراطي —
July 3, 2012 near Cairo

موظفه : بيقولوا ان شفيق هيعمل حزب جديد لما يرجع

الفلولي :هو عنده 71 سنه و الفيلم ده علي بال ما يخلص هيكون عنده 75 سنه .. اصل ده فيلم اللي عاملاه المخابرات 

July 1, 2012 near Cairo


ام العريف : انا شفت في التليفزيون ان الطماطم مفيدة للوش بتقطعيها شرايح زي الخيار دي كلها املاح و حموضة — 

لو اشتريت بارفان البنت هتبوسك .. و عاملين عروض و تخفيضات علي السلاح ؟

June 30, 2012 near Cairo

ام العريف : امبارح كانوا بيوزعوا عندنا كوكا كولا ببلاش

الصعيدي :ايوه دي اسمها حملة دعاية ..من اسبوع كده عند نادي هليوبلس كان فيه بنات بتبيع بارفانات و كان اللي بيشتري بيبوسوه .. الكميه خلصت في نص ساعه

ام العريف : و عرفت ازاي ؟

الصعيدي : سمعت

June 29, 2012 near Cairo

ام العريف : امبارح اتصل بيا واحد اعرفه من مرسي مطروح .. هو بيروح ليبيا كتير .. قالي مش عايزه حاجه .. عايزة سلاح اجيبلك

الصعيديه : اه انا عايزة .. هاتيلي ورقة بالانواع و الاسعار

ام العريف: بتهزري ؟

الصعيديه : لاء باتكلم جد —

ايه الهبل ده واحد حلم ان الرسول قال ان مرسي هيبقي الريس ..اقولكم انا بقي علي الحلم بتاعي

June 26, 2012 near Cairo

ام العيال : شفتي في الجرنال واحد بيقول انه حلم ان الرسول جاله و قاله ان مرسي هيبقي الريس

ام العريف : ده اي كلام .. انا بقي اللي كنت حلمت انه المطار بقي بيتوضب و حلو قوي .. و ده معناه ان شفيق هيكسب و هو كسب فعلا بس دي حاجه سياسيه 

June 26, 2012 near Cairo

الموظفة الثورية : شفتوا توفيق عكاشه امبارح ده اتجنن .. بيشتم في الجيش و في المشير

ام الفلول : هو شتم المجلس العسكري مش الجيش

الموظف الصعيدي : وهو المشير انزل (بالضمه علي الالف و كسرة علي الزين) يعني ؟

رجع الانابيب اللي انت خدتها يا مرسي

June 26, 2012 near Cairo

الفلولي : المجلس العسكري اجتمع مع شفيق قبل النتيجه و قاله معلش هنعلن انك خسران .. النتيجه اتغيرت الساعة 2 و نص .. المجلس العسكري خاف من الاخوان .. شفت مسكوا 3 قنابل عند واحد سني في طوخ .. دول كانوا ناويين يفجروا الكنايس لو مرسي خسر—


June 25, 2012 near Cairo

ام العريف في الموبايل مخاطبة ابنها المؤيد لمرسي :مش هاجيبلك الجرنال ما الجرايد مرميه علي الرصيف محدش بيجيبها .. ماهو موجود في كل حته (مرسي) مش هادخله بيتي كمان
June 25, 2012 near Cairo
ام العريف : اه دلوقتي بقي مرسي هيرجع البنزين بعد ما اخد الانابيب و اخد البنزين علشان يبين الرخاء

امريكا نجحت مرسي علشان ولاده في الجيش الامريكي

June 25, 2012 near Cairo
الموظف الصعيدي : و الله لو حصل حرب انا مليش دعوه .. عايز الصراحه انا عايز البلد دي تخرب —

June 25, 2012 near Cairo

ام العريف : حماس فرحانين قوي بفوز الاخوان اصل حماس المعتقل بتاعهم هناك .. (قصدها معقلهم) —


June 24, 2012 near Cairo

الموظفه الصعيديه : شكلهم هينجحوا شفيق

الفلولي : ان شاء الله

الصعيديه : امريكا عايزه مرسي اصل ولاده في الجيش الامريكي

الفلولي : لاء هما يخشوا السنه الجايه

يا ريت كل واحد فينا يخلف 5 عيال

June 24, 2012 near Cairo

الموظف المفتي : ولو مرسي كسب اللي هيحكمك

 المرشد .. مش المرشد بتاع مصر لاء بتاع امريكا —

June 24, 2012 near Cairo

ام العريف : ده مرسي بيقولك هيعين احمد ماهر بتاع 6

 ابريل وزير اقتصاد يفهم ايه ده في الاقتصاد

الموظف البزرميط : لا ء يفهم ده عنده في حسابه  عشرين

 مليار 

دولار  

 

         

June 24, 2012 near Cairo

بعد وصلة من الشكوي من العيال و عددهم و همومهم يبدأ 

الموظفون في التعاطف مع أم العيال و تطييب خاطرها 

وصولا الي

الموظف المفتي ل ام العيال :عايز اقولك يا ريت انا كان

 عندي ال 5 عيال دول  

لو المشير طنطاوي اعدم الشعب كله يبقي معاه حق

June 23, 2012 near Cairo

ام الفلول : دول شتموا المشير شتيمه امبارح في التحرير .. لو المشير ده اعدم الشعب كله يبقي معاه حق —

June 23, 2012 near Cairo
العايقه : ايه اللي يخلي حمدي قنديل يطلع امبارح مع مرسي مش فاهمه

الفلولي : واعدينه يبقي وزير اعلام

June 23, 2012 near Cairo

العايقة : وائل غنيم ده عايز مننا ايه .. و مادام هو عميل سايبينه ليه؟

الفلولي : ده مراته امريكيه يهوديه ..و كانوا عايزين يعملها (ثورة يعني) في الامارات — with