ممكن يحصل تقفيش في المكتب

September 19, 2014 · Cairo ·

كان حصل مشكلة في الاوضة التانية للقسم بتاعنا

الموظف الصعيدي : طب انا هاروح هناك اشوف ايه الحكاية

الموظف المفتي : لاء لو رحت انت ممكن يحصل قفش

العايقة : قفش ولا تقفيش ؟

الموظف المفتي : لاء القفش حاجة ( و سكت شوية يفكر) و التنفيش حاجة تانية

اتناشر % أكبر من اربعتاشر % بس انت اللي مش عارف تحسبها

September 14, 2014 · Cairo ·

الموظفة اللي من مكتب تاني : و انتوا اشتريتوا شهادات قناة السويس ؟

التابع للفلول : ممعناش فلوس اصلا

الموظفة : يعني لو كان معاكم كنتوا اشتريتوا ؟شايفين انه مشروع كويس ؟

التابع للفلول : آه طبعا

الموظفة : ده فيه ناس اخدوا قروض بفايدة 14% علشان يشتروا الشهادات

التابع للفلول و الموظف المفتي يظهر عليهم الاقتناع بالكلام

...

بعد ما الموظفة مشيت

أبو نضارة : بس فيه حاجة مش منطقية في الكلام ده ما انت لو خدت قرض ب 14% و الفايدة ب 12% فانت كده خسران

التابع للفلول : لاء كسبان لانك هتاخد المبلغ كامل في الآخر

ليسانس حقوق بدرجة جيد جدا مع مرتبة الامتياز

September 12, 2014 · Cairo ·

أم العريف : لاء فعلا تعيينات النيابة دي كان فيها كوسة انا زميل ابني "ليسانس حقوق " كان جايب جيد جدا مع مرتبة الامتياز و ماخدوهوش

September 8, 2014 · Cairo ·

في اول الاسبوع اللي فات

التابع للفلول : قطع الكهربا و رجوعها بوظلي التلاجه و قبليها بوظلنا اسانسير العماره

أم العريف ( عايزه تخفف من الموقف ) : روح اعمل محضر لوزارة الكهربا في القسم

..

بعد يومين

أم العريف : اصل العيال عندي مش فاضيين مشغولين بيصلحوا الكمبيوتر الكهربا لما قطعت بوظت كارت الشاشة

تطور في الحكومة ؟ أعوذ بالله

August 28, 2014 · Cairo ·

مديرة الادارة قررت انها تعمل تغيير في نظام الشغل و التغيير ده هيعمل مشكلة و وقت اكتر في القسم عندنا

موظفة : هي بتقول انها كده بتعمل تطور

أم الفلول : لو عايزين يعملوا تطور فعلا يسهلوا ...يجيبوا اجهزة كمبيوتر

أم العريف :تطور ده يبقي في بنوك أو في وزارة لكن هنا دي حكومة ..الحكومة مينفعهاش تطور

ما بلاش نحضر كتب الكتاب في الكنيسة

August 21, 2014 · Cairo ·

عندنا زميلة تانية من القسم بتاعنا بس في مكتب تاني هي عكس العايقة ..قبطية متدينة جدا محافظة جدا في لبسها و كلامها و في الحفاظ علي الشعائر الدينية .. و بمناسبة جواز بنتها فعزمت المكتب علي الفرح و علي حنة بنتها

موظفة : ده الفرح هيكون في كنيسة في الزمالك و الحنه في قاعة في المطرية

أم العيال : آه ما تيجوا نروح القاعة دي قريبة ..انا باقول نروح الحنة بلاش كتب الكتاب

أبوك رايح يموت في النادي

August 18, 2014 · Cairo ·

والد الموظف الفلولي كزملكاوي اصيل ورث ابنه حب الزمالك ..و راح انتخب مرتضي منصور مع ابنه .. ..وهو بيفسح حفيده جاتله أزمة قلبية و علي بال ما جم ينقلوه المستشفي كان توفي

أم الفلول قالت انها لما كلمت الفلولي تعزيه قالتله : أبوك ده كان راجل نزيه قوي رايح يموت في النادي

ملحوظة : بعد كده عرفنا انه مات في نادي هوليليدو مش الزمالك

عايزة تقللي المصنعية ..طب ما تلاغي المهندس

August 17, 2014 · Cairo ·

العايقة اللي اشترت عربيتها الأولي من 3 سنين ..بعد مشاكل مع العربية و الميكانيكية قررت تروح التوكيل علشان تصلح العربية و كانت النتيجة انها عرفت ان قطع الغيار بس اتكلفت 900 جنيه و الاجمالي بعد "المصنعية " 1300 جنيه ..اللي هو طبعا مبلغ كبير

أم العريف (بتتكلم بجد ) : ممكن تنزلي من مبلغ المصنعية ...بصي لما تشوفي المهندس ..لاغيه

الفلولي مؤكدا بس بهزار : آه اغريه