ماهي حاطة صورة للسيسي في أوضة النوم !

November 21, 2013 · Cairo · 

بعد 30 يونيو و تعبيرا عن تأييد اغلب الموظفين ل السيسي  الفلولي و ام العيال كل واحد فيهم جاب بوستر للسيسي و حطوه علي الحيطة مع بوستر قديم كان الفلولي حاطه لعبد الناصر من جرنال الوطن تحت عنوان "احنا اسفين يا زعيم "  من حوالي اسبوعين جه تفتيش من الوزارة و لما شافوا الحاجات دي امروا بانها تتشال "هنا مكان للشغل بس " و اتشالت فعلا

الموظف المفتي : ده انا قولت انتي اخدتي البوستر ده و حطيتيه عندك في البيت
العايقه : ماهي حاطه صورة للسيسي في اوضة النوم
أم العيال : لاء انا حاطه صورة السيسي في الصالون ..بس لو حطيتها في اوضة النوم جوزي مش هيعترض

صالح سليم اتعمي من كتر شرب الخمرة .

November 20, 2013 · Cairo · 

ام العيال بعد ما قعدت تشغل تسلم الايادي علشان تاخد منها حتة مختلفة تخليها رنتها

ام العيال : انت بتخش ع النت

الصعيدي : ايوه

ام العيال : عايزاك تجيبلي كل الاغاني اللي عن السيسي

November 13, 2013 · Cairo · 

الحوار اللي جاي ده بين ان موضوع الفلول و الاخوان و كل القصص دي ما هي الا انتماء شكلي للمصريين ..الانتماء الحقيقي 

هو الاهلي و الزمالك

 بعد

.. نقاش و مكايدة عن الاهلي و الزمالك بين الفلولي و ام الفلول     اتهم فيه الفلولي حسن حمدي انه حرامي ..و هي كانت بتعايره بالبلطجة بتاعة مرتضي منصور  وصولا  للحوار التالي

الفلولي : عارفه مين آخر واحد زار صالح سليم في لندن .؟

ام الفلول : لاء معرفش

الفلولي : كان حمادة امام و قال ان صالح سليم اتعمي من كتر شرب الخمرة ..الفلولي مستكملا ..ده وصل بيه انه كان بيشرب صندوق خمره و ميسكرش

انا مؤيد للسيسي و خايف قناصة أمريكان يقتلوا مرسي بكره

November 11, 2013 · Cairo · 
في لحظة معينة كان فيه 4 موظفات في المكتب في نفس الركن ماسكين ما بين تابليت و سمارت فون و بيبصوا فيه
الفلولي : ايه يا عم ده ؟
أبو نضارة : دي الحكومة الاليكترونية


November 4, 2013 · Cairo · 
الموظفة الصامتة المتابعه لتوفيق عكاشه : المخابرات المصرية هي اللي كشفت انه امريكا بتتجسس علي دول العالم ..و احنا الدولة الوحيدة اللي مقدروش يتجسسوا علينا
الفلولي : و الكلام ده كان بمساعدة مرسي بحيث انه يبقي قريب من اوروبا
 —

November 3, 2013 · Cairo · 
الفلولي : الخوف بكره مش من الاخوان ..الخوف من قناصة امريكان او امريكا مأجراهم علشان يقتلوا مرسي علشان ميقولش علي اسرار اتفاقه مع امريكا

السيسي جاب الببلاوي علشان صديق البرادعي و فاشل

October 29, 2013 · Cairo · 
العايقة : عدلي منصور ده راجل كويس و هو عارف انه مؤقت فمش هيعمل حاجات كتير ..لكن اللي فاشل و ملوش لازمة هو التاني ده اللي اسمه الببلاوي انا مش فاهمه هو ليه لسه قاعد ده فاشل
الفلولي : انا اقولك السيسي ليه مخلي الببلاوي ..هو اصلا جاب الببلاوي ليه علشان يرضي الغرب ..مين اكتر اتنين اصحاب الببلاوي و بيسمع كلامهم ..احمد كمال ابو المجد بتاع المصالحة و البرادعي ..فالسيسي سايب الببلاوي علشان يفشل و الشعب يقول مش عاوزينه ساعتها يمشيه و يجيب حد بداله

باسم يوسف بيموتنا من الضحك ..باسم يوسف خاين و عميل.. موتوه

October 26, 2013 · Cairo · 

ملحوظة ..كل اللي هيتكلموا دول كانوا بيموتوا في باسم يوسف و بيموتوا من الضحك من افيهات باسم يوسف ايام مرسي ... 

)1)

الفلولي : امبارح قعدت اشتم باسم يوسف ع الفيس بوك كل الفيس بوك كان بيشتمه ..هو عايزها فوضي ؟

العايقة : طب التاني (مرسي) كان بيعمل حاجات لكن ده كويس ..هو عايزها ميغه ؟

مشهد 2

العايقة بعد ما بصت علي التابلت بتاعها : جايبين صورة باسم يوسف و عليه جزمة

ام الفلول : هو عايز ايه بالظبط

الفلولي : انا اقولك ما هو ده تبع خطة الفوضي الخلاقة بتاعة كوندليزا رايس ..انك تعتبري باسم يوسف علشان بيهاجم الاخوان معاكي و تثقي في كلامه .. و بعد كده ميخليش أي رمز يطلع في البلد

October 26, 2013 · Cairo · 

مشهد 3

الفلولي : لاء و باسم يوسف بيلمح انه انقلاب و قال لما يقول اللي بيحكم مصر يجيب صورة السيسي و بعدين يقولك لاء مش ده و يقوم جايب صورة عدلي منصور عايز يقول انها زي ايأم المرشد و مرسي

العايقة : وهو ليه يغلط في الراجل (عدلي منصور ) ده راجل محترم و مبيعملش حاجه

التابع للفلول و هو بيضحك : ماهي المشكلة انه مبيعملش حاجة

و انا ع القهوة شوفت واحد بشورت و واحدة لابسة قميص نوم و بتتخانق معاه

October 25, 2013 · Cairo · 

ام العريف : عجبني لوا في التليفزيون بيقول المتاسلمين لو مش عاجبهم البلد يروحوا قطر ماهي واسعة عليهم هناك

October 13, 2013 · Cairo · 

:http://www.almasryalyoum.com/news/details/328990

 الفلولي عن زلزال 92

:

يوميها كنت رايح اصلح حاجة في روض الفرج و  كان المحل قافل فقعدت استني الراجل علي القهوة ساعة ما حصل الزلزال فشوفت موقف ..

 و احنا قاعدين ع القهوة و نلاقيلك واحد لابس شورت و واحده لابسه قميص نوم و هي بتقوله بتسيبني و تجري يا ابن الكلب بتسيبني و تجري يا ابن الكلب .. طلع بقي ان دي مراته و انه ساعة الزلزال نزل جري من البيت و سابها

انتحاري من تايلاند يفجر نفسه في سيناء و موظفة اسمها أسماء و أبوها اسمه " المراجعين "

October 9, 2013 · Cairo · 

امبارح قعدت محتار لما الموظف الصعيدي قال انه تفجير الطور مكانش بعبوة ناسفة ده كان عن طريق انتحاري من" تايلاند" فجر نفسه جايين هنا يموتوا نفسهم احنا ناقصين" ..لحد ما قريت الخبر النهارده

>>>>

كشفت المعاينة المبدئية التى أجرتها النيابة لموقع حادث تفجير مديرية الأمن بجنوب سيناء، عن أن الهجوم تم تنفيذه بسيارة ربع نقل دوبل كابينة ماركة تويوتا "تايلاندى،" حيث اقتحمت البوابة الفرعية من ناحية البحر، وانفجرت فور وصولها بوابة المديرية، وبداخلها منفذ العملية الذى لم يتم التعرف على هويته حتى الآن.

ا: http://shorouknews.com/news/view.aspx…

October 1, 2013 · Cairo · 

احنا بنراجع علي كشوف بيعملها موظفين تانيين ..منهم موظف اول مرة اتعامل معاه كان عامل كشف بمبالغ المفروض هيقبضها ناس في قسم معين ..الكشف فيه اسامي الناس اللي في القسم ... فمكتوب في الورقة اسامي ناس بعديها مكتوب "اسماء المراجعين " و تحتها اسامي الموظفين المراجعين اللي هياخدوا فلوس

انا : ايه اللي انت عامله ده انت مدي فلوس ل " اسماء المراجعين 

" هو : ماهي قدامها مبلغ اهو

 اعتبرها واحدة اسمها "أسماء" و ادالها مبلغ