أم العيال : انا كان زماني شغالة في المخابرات .. و الرقص علي أنغام "مهرجان العلبة الذهبية " في المكتب

September 29, 2013 · Cairo · 
النهارده حصل مشكلة في الشغل مع الباشمهندسة موظفة شابة خريجة "مودرن اكاديمي " (هندسة ) و قالت ساعتها انها غلطانه انها جت عندنا و ان مكانها مش هنا "باعتبارها مهندسة "
ام العيال : مانا لو كنت ذاكرت اكتر في معهد اللاسلكي كان زماني شغالة في المخابرات ولا في شركة بترول
التابع للفلول : ايه ده انتي كنتي مع ميدو مشاكل في المعهد ؟

September 26, 2013 · Cairo · 
امبارح كان ممكن تدخل المكتب تلاقي الموظفة الثورية \ اخوانية و معاها بنتها اللي هي موظفة برضه معانا بس في قسم تاني و اللي بتجيب معاها ابنها اللي عنده سنة الشغل.. كنت هتشوف المشهد ده
الموظفة و بنتها و حاطين الولد علي المكتب بيلاعبوه و الموظف البزرميط مشغل اغنية المهرجانات " العلبة الذهبية " و الولد بيرقص علي انغامها

ضربوا اللوا بالرصاص في كرداسة من فيلا ابو تريكة

September 24, 2013 · Cairo · 

- ده حسن مالك راح لهشام طلعت مصطفي الزنزانه كان عايز ياخد منه نص مشاريعه

الفلولي : اه راحوله الزنزانة ساوموه

ام العريف : لاء مسمموهوش

September 23, 2013 · Cairo · 

ام العريف : شوفتوا .. اللي ضرب اللوا بالرصاص ضربوا من فيلا ابو تريكة

موظف : بس ابو تريكه من ناهيا مش كرداسه

ام العريف : لاء و قالوا ان الضرب من جوه الفيلا مش من فوق السطوح

المفروض يولعوا في كرداسة كلها ..و طارق سويدان يبقي بتاع السويدي

September 21, 2013 · Cairo ·

ام الفلول : و اهالي كرداسة كانوا قاعدين بيتفرجوا علي الظباط و هما بيتعذبوا ..المفروض يولعوا في كرداسه كلها

الفلولي : صح فيه لوا كان بيقول المفروض يفحصوا الناس اللي ماسكين صور السيسي .. كان المفروض الاهالي ينزلوا يحموا الاقسام زي ما حصل في اسكندرية

September 10, 2013 · Cairo · 

العايقه : مين طارق سويدان ده ؟

 (ام العريف : ده بتاع السويدي ( تقصد الشركة

التابع للفلول : ده كويتي و كان في قناة رسالة و صاحبها طرده منها علشان اخوان 

عمل في ليلة الدخلة خلي العروسة مغمي عليها

September 18, 2013 · Cairo · 

- انت مش كان المفروض هتيجي اول امبارح بعد ما حضرت فرح اخو مراتك في اسكندرية

الموظف المفتي : اصلا الفرح قعد لحد الساعة 3 الصبح و بعدين لقينا العريس تعب معرفناش عنده ايه وديناه لدكتور سأل هو خد ترامادول ولا ايه ..قالوا لاء ده ملوش في الحاجات دي .. قال يبقي ممكن يبقي واخد دور برد في المعده و لقيناه بيقول انه شايف الشقة بتاعته كلها سواد و انه مش طايق .. قام خاله سمع كده قال ده يبقي معمولهم عمل و راح جاب شيخ و جابه هو و عروسته و لما ابتدي يقرا قران العروسة اغمي عليها .. هما معمولهم عمل و الشيخ قالهم علي حاجات يقروها و جابلهم ميه مقري عليها علشان يشربوها

ام العريف : و انت كنت معاهم لما كان الشيخ بيقرا

المفتي : لاء

ام العريف : هتلاقيه و الشيخ بيقرا قران بيقعد يتتاوب يتتاوب

الباشمهندسه : طب ما يطلعوا عمرة احسن

البزرميط : تلاقي حد في العيلة عاملهم عمل

العايقة : اه ماهو لو حد عامل عمل يبقي علي العريس و العروسة الاتنين

الوحدة الوطنية هي اننا ننزل نحمي كنايس المسيحيين أعداء الاسلام

August 30, 2013 · Cairo 

ام العيال : بس انا شايفة الموضوع ده (30 يونيو) قربنا من المسيحيين ..عندنا المسلمين بقوا ينزلوا يحموا الكنايس

التابع للفلول : برضه هيفضل عدوك هو عدو دينك

ام العريف : احنا بنكرههم اه بس المعاملة تبقي كويسة 

August 29, 2013 · Cairo · 

ام العريف : شوفتوا اخو اوباما طلع اخوان و عايش في كينيا و متجوز 12 واحدة

و انفعلت علي عمرو حمزاوي و هي بتقوله : فين حقوق الانسان يا حمار يا أعمي

August 25, 2013 · Cairo · 

و بعد ما اتقال الكلام بتاع ابن المرشد مماتش و بنت البلتاجي عايشة و انهم بياخدوا اي جثث مجهولة و يقولوا عليها كده و بعدين حد يقول لاء انه بنت البلتاجي ماتت فعلا

العايقة سألت سؤال  معبر" بس هي ازاي ماتت و طلعت بعد كده   في التليفزيون تقول انها مماتتش ؟ 

August 25, 2013 · Cairo · 

الفلولي : ده مبهدلين عمرو حمزاوي و محمود سعد علشان اللي قالوه امبارح

ام العريف منفعلة كأن عمرو حمزاوي واقف قدامها : ده معترض علي فض اعتصام رابعة و يقولك حقوق الانسان .. (الانفعال يتزايد ) فين حقوق الانسان يا حمار يا اعمي البصر و البصيرة 

أم ايمن بتقول ان الكعبة نصها بيوت دعارة ..و عسكري اخواني هو اللي ورا مدبحة الجنود في سينا

August 25, 2013 · Cairo 

· مقتل-25-جنديا-مصريا-بكمين-بسيناء

الفلولي : عسكري اخواني كان معاهم هو اللي بلغ عن باقي العساكر اللي اتقتلوا في سينا .. كلهم اتقتلوا وهو ماتصابش اصلا

البزرميط : هي معلومة عايزة تتصحح هو فعلا بلغ عنهم بس هو اتصاب في رجله وهو بيهرب كانوا عاوزين يخلصوا عليه 

August 22, 2013 · Cairo · 

و دي كانت نتيجة دخول الموظفين للفيس بوك

المديرة : شوفتو ام ايمن بتقول ايه علي السعودية علشان ضد الاخوان ..بتقول ان الكعبة نصها بيوت دعارة .. و ان مكه مليانه بيوت دعارة الناس علي الفيس بوك شتموها شتايم جامدة و قالولها انتي رحتي مكة كام مرة و شوفي بقي اتعمل فيكي ايه هناك — 

August 20, 2013 · Cairo · 

المديرة : شوفتوا اللي حصل ابن بديع طلع مماتش 

....

عن البرادعي

ام الفلول : ده سافر النمسا و هيجتمع النهارده مع الاخوان في بروكسل

الصعيدي : ده طلع علي قناة تركية و قال ان كل الشعب متخلف .. و بيتكلم عن رابعه ده ساب الناس في العراق تموت و هو بيشرب ويسكي