البرادعي عايز تأييد الاخوان لما يترشح للرئاسة و البلتاجي كان شغال تمرجي

August 3, 2013 · Cairo · 

- و لسه معتصمين عند النهضة

الفلولي : انا اللي مستغربله اهالي بين السرايات دول مجرمين ساكتين عليهم ليه ؟ دول يخلصوها في ساعتين

August 3, 2013 · Cairo · 

الموظفين عن البرادعي 

العايقة : اصله عايز تأييد الاخوان لما يترشح في انتخابات الرئاسة

ام الفلول : ده حتي ابراهيم عيسي اللي بيموت فيه بينتقده

الموظف المفتي : ده عميل

August 3, 2013 · Cairo · 

ام الفلول : مينفعش نسيب الاعتصام اكتر من كده ..ابراهيم عيسي جايب فيديو من جنوب افريقيا لاعتصام ضربوهم بالرشاشات موتوا ييجي 100 واحد و فضوا الاعتصام

...........

التابع للفلول : البتاجي ده مش دكتور ده كان شغال تمرجي عند حماه

الثانوية العامة ..شهادة طبعا ..طب بكالريوس تجارة ؟

July 30, 2013 near Cairo

من المواضيع المعقدة جدا عند الموظفين .. موضوع عايزين نلم فلوس لفلان الموضوع بيبتدي بالجواز و المرض و الولادة وصولا للحج و العمرة و النجاح في الدراسة و بيدخل فيه برضه استلطاف فلان لفلان او انه ده دفعله و ده مدفعش

برغم ان الفلولي كان اشترك في الدفع لزميلتين ولادهم نجحوا في ثانوية عامة الا انه لما قالوا هنلم علشان ابن فلانة خد بكالريوس تجارة قال مش هادفع 

الفلولي : اصل المفروض اننا ندفع في الشهادات بس

الموظفين : ما هي دي شهادة ده بكالريوس

الفلولي : لاء اصل الثانوية عامة شهادة لكن ما دام دخل الجامعة كده كده هيتخرج و بعدين البكالريوس ده ملوش فايدة ماهو هياخده و يقعد في البيت 

*معلومة  الفلولي حاصل علي بكالريوس تجارة 

صاروخ مضاد للطائرات في رابعة ..و بعد ما يموتوا الاخوان يمكن اتعاطف معاهم

انتاج مشترك للفلولي و العايقة و الصعيدي

و بتوع رابعة دول عندهم انابيب بوتاجاز محضرينها علشان لو حصل اقتحام

و جايبين صورة و 15 واحد شايلين علم كبير 

- ده مش معقول يكون فيه واحد ميت

- ده فيه قذيفة هاون

-يا جماعة ده فيه صاروخ مضاد للطائرات — 

July 27, 2013 near Cairo

العايقة :اه و الاغنية اللي فيها خالد عجاج و مصطفي كامل و كل واحد جايب فيها ابنه ...حلوة

.........................

الفلولي : بعد ما يموتوا كل اللي في رابعة و اللي في النهضة .. يمكن اتعاطف مع الاخوان 

......

الفلولي كان بيسمع الخطاب بتاع السيسي النهارده في الراديو و قال لازم ننزل كلنا دي اول مرة السيسي يطلبها مننا بنفسه اننا ننزل 

مفيش واحدة محترمة تنزل مظاهرة ..و أمريكا عاوزة تقتل مرسي

July 24, 2013 near Cairo

ام العريف : الستات بتوع المنصورة الاخوان هما اللي قتلوهم منهم فيهم

العايقة : معقولة ؟

ام العريف : ماهو اللي هيضربهم ده هيقولك مش هما قابضين فلوس 

July 21, 2013 near Cairo

الفلولي : و هي امريكا عاوزه تعرف مكان مرسي ليه .. ماهو علشان تقتله زي ما قتلت صدام حسين لانه كان معاه المستندات اللي بينه و بين امريكا —

July 20, 2013 near Cairo

مقتل سيدات في المنصورة

خبر جه في رسالة ع الموبايل عن وفاة 3 في احداث امبارح

البزرميط : اه دول 3 ستات من الاخوان 

المديرة : و هما ايه اللي ينزلهم مظاهرة او مسيرة مع الاخوان مفيش واحده محترمة تنزل مظاهرات 

البزرميط : يبقي الستات اللي بتنزل مظاهرات التحرير و الاتحادية مش محترمين

المديرة : اه مش محترمين

العايقة باستنكار : ازاي يعني ؟ 

July 16, 2013 near Cairo

ام العريف : دول معترضين علي كمال ابو عيطة بتاع القوي العاملة بيقولوا كان بيشتغل مأذون

أم أيمن فرطت في عرضها ..و المفروض الجيش يبيد رفح و العريش

July 15, 2013 near Cairo

الفلولي : عزة الجرف اللي هي ام ايمن جوزها طلقها .. اصلها  قالت فيه 3 عساكر من الحرس الجمهوري اغتصبوني .. قام جوزها قالها انتي فرطتي في عرضك و طلقها

...................................

الموظفة الصعيدية : دول عايزين يعملوا امارة اسلامية في رابعة

July 13, 2013 near Cairo

ده الطيارات بتاعة الجيش وصلت غزة و بيضربوا جبل الحلال

ام الفلول : المفروض يشيلوا سكان رفح و العريش دول خونة كلهم 

.................................

الفلولي (ابوه فوق ال 70 سنه ) : ابويا عنده القلب و بيقولي الدكتور قاله صوم ..بس انا مش مصدقه

التابع للفلول : الصيام كويس للمرضي

الفلولي : بس مش للسن ده

التابع للفلول مؤكدا : للسن ده 

July 9, 2013 near Cairo

ام العيال : و مرسي اللي كان بيقول انه ساكن بالايجار يلاقوا في حسابه 2 مليار

الموظفة الصعيدية : 2 مليار ايه دول لقوا في حساب ابنه بره 11 مليار 

السكس تحت الحجاب ..و تبادل الزوجات عند الشيعة

July 5, 2013 near Cairo

حدث في يوم 2\7

الموظفة اللي معانا في القسم بس من اوضة تانية بعد ما ابدت فرحها بانه مرسي خلاص هيمشي :

شوفتوا حسن شحاتة الشيعي اللي مات ..ده مات موتة يستاهلها

العايقة : بس مينفعش حد يموت حد علشان مختلف معاه في الدين (خايفة علي نفسها )

الموظفة : طب هو ينفع في اي ديانة يبقي فيه تبادل زوجات ؟ ده الموته دي شوية عليه

July 4, 2013 near Cairo

واحدة جت وقفت علي الباب وشاورت ل (ام العريف) علشان تطلعلها بره الاوضة .. هي محجبة بس طالع من تحت الايشارب قصة طويلة مصبوغة اصفر مخلية الحجاب شيء رمزي

ام العريف طالعالها بره الاوضة فجت جنب العايقة اللي مصمصت شفايفها و هي مستغربة و مستنكرة 

العايقة : و ده من ايه ده ؟

ام العريف و هي مبتسمة : السكس 

مزاد الاخوان علي الخمور..و الكهربا يتتهرب لغزة عن طريق الانفاق

July 3, 2013 near Cairo

-الجيش قافل كل الانفاق مع غزة

الموظفة الصعيدية : اه علشان كده اتحلت ازمة البنزين و الكهربا مبقيتش تقطع

ام العريف : اه الكهربا كانت بتقطع عندنا و شوفتي لما كانوا بيحتفلوا بمحمد مسعود اللي فاز

العايقة : اسمه محمد عساف 

July 3, 2013 near Cairo

المديرة : .... (الفلولي ) كلمني دلوقتي و قالي انه رايح عند وزارةالدفاع ولو السيسي مخدش قرار النهارده هيحرقوا وزارة الدفاع ! 

July 2, 2013 near Cairo

الفلولي :علشان تعرفوا لما باقولكم حاجه .. لما دخلوا مكتب الارشاد لقوا ورق فيه اسماء محفوظ ووائل غنيم انهم واخدين فلوس من قطر

................................

الفلولي : و احنا ماشيين في المسيرة و كنا معديين من عند الكلية الفنية العسكرية .. شاب من بتوع 6 ابريل راح يكتب يسقط حكم العسكر علي حيطة الكلية .. جبناه من تحت ايد الناس كانوا هيموتوه 

July 2, 2013 near Cairo

ام العريف : شوفتوا الاخوان عملوا ايه.. اخدوا الخمور من المحلات اللي بتبيعها و عملوا عليها مزاد و خدوا الفلوس بتاعتها 

................

الفلولي : عارفين مرسي فين .. ده قاعد في يخت علشان يهرب علي طول

ام العريف : اه في الغردقة