هيودوا جوزها المشرحة ..و لو مش عايز تخلف بنات قول

March 22, 2013 near Cairo

الفلولي : و كنت مع مراتي عند الدكتورة فلما شافت السونار قالتلها ان المولود بنت ..فمراتي بصيت لي كده خايفة اكون زعلت او حاجه

العايقة : ايه هترجعها يعني؟

March 19, 2013 near Cairo

الصبح جالنا الخبر انه زوج الموظفة الثورية توفي ..هو كان نقلوه المستشفي من اسبوع بعد تدهور حالته الصحية ,,جاله تليف في انسجة الرئة وهو مدخن شره من زمان ( .. و كنا عارفين انه كان في مستشفي النزهه الدولي بس قالوا انهم هينقلوه من مستشفي الجلاء ..لمسجد الرحمن الرحيم علشان يصلوا عليه

- هما مش كانوا قالوا انه كان في مستشفي النزهة

ام العريف : يبقي نقلوه منها علشان مفيهاش مشرحة

التابع للفلول مقدرش يستحمل :مشرحة ايه يا حاجه ؟ ده هو هيتحط في تلاجه و كل المستشفيات فيها تلاجات

العايقة (متوترة) : مش عارفة اجمع الارقام اللي في الكشف

التابع للفلول وهو بيبص ناحية ام الفلول : ده هي اللي مش عارفه تجمع —

أم أبو اسلام بتدوق بول أبوه ازاي ؟ للكبار فقط

March 17, 2013 near Cairo

ام الفلول : ده الناس دلوقتي عايزه مبارك يرجع تاني

العايقة : تفتكري صحته تخليه يقدر ؟ 

March 16, 2013 near Cairo

للكبار فقط

المديرة : ده امبارح جابوا ع النت فيديو ل ابو اسلام و هو بيقول ان مامته كانت بتدوق بول ابوه علشان تعرف فيه سكر ولا لاء

و خرج البزرميط و معاه اتنين من الزملاء بره المكتب للتعليق علي الموضوع

بعد ما رجع

العايقة  : كنتوا بتقولو ايه بره ؟

البزرميط : كنت باقول انه شافهم بيعملوا حاجه تانيه بس هو افتكرها كده 

الاخوان بيتاجروا في الحشيش ..و العايقة في اليوم العالمي للنسوان

March 11, 2013 near Cairo

المديرة : امبارح ابني و هو رايح الشغل لقي ناس موقفين الطريق و مبيخلوش عربية تعدي غير لما تدفع 100 جنيه يا اما يكسروا القزاز و العربية و كانوا بيشتموا الناس بيقولوهم بقي انتوا بتركبوا عربيات بميت الف جنيه و احنا مش لاقيين ناكل

و بنته (حفيدة المديرة) اتعورت امبارح كانت في باص المدرسة و كانوا بيوقفوا العربيات و السواق بتاع الباص هرب منهم و هو بيهرب فيه ولاد وقعوا علي الارض و المشرفه اتعورت بطوبة اتحدفت عليهم 

*******

العايقة و هي بتتصفح الفيس بوك بتاعها علي التليفون : مصورين ابن مرسي و هو بيشرب جوزه ..يا تري بيشرب فيها ايه؟

ام العريف : حتي لو فيها حشيش ماهو الحشيش عندهم حلال ..هي علاقاتهم بافغانستان ليه ماهو علشان تجارة الحشيش ..امال هما جايبين فلوسهم دي كلها منين؟ 

March 9, 2013 near Cairo

العايقة : امبارح كان اليوم العالمي للنسوان ..كان نفسي انزل بس جوزي قالي لاء

الموظف المفتي : بس انتي مبتحبيش الحاجات اللي كلها ستات دي

العايقة : لاء ماهو هيبقي فيه رجاله هاروح جنبهم —

March 9, 2013 near Cairo

 "بعد رد فعل الالتراس علي الجكم في قضية مذبحة بورسعيد "  

المديره :و هما ليه يروحوا يحرقوا نادي الشرطة و اتحاد الكورة ما يروحوا الاتحادية عند مرسي

ام الفلول : و علي فكرة الاخوان هما اللي ورا مذبحة بورسعيد 

المسيحيات عرايا و مصر بتصدر غاز لاستراليا

February 28, 2013 near Cairo

ام العريف :كانوا جايبين واحد امبارح في التليفزيون بيقول قطر ايه دي اللي مدينها اهتمام ..تيجي ايه فلوس قطر مع شماختنا ؟ — 

February 25, 2013 near Cairo

- ده النهارده قضية ابو اسلام

= مش ده اللي قال علي المسيحيات عرايا ؟

-= بيقولوا انه كان مسيحي و اسلم 

البزرميط : اه ماهو علشان كده عارفهم 

February 23, 2013 near Cairo

المديره : منه لله طنطاوي هو السبب في اللي احنا فيه دلوقتي

ام الفلول : ده هو كان متفق مع الاخوان علي كده من قبل الثورة اصلا

February 19, 2013 near Cairo

الفلولي : امبارح جاتلي فاتورة الغاز زيادة 18 جنيه

ام العريف : يعني هما يغلوا علينا و يدوا الغاز لاسرائيل و الاردن و استراليا برخص التراب ؟ —

انا مبسوط انهم اتحرشوا بالدكتورة ..و ابن الجيران في البلكونة

February 15, 2013 near Cairo

في الخلفية فيروز بتغني في راديو العايقة

العايقة : فيرو ز بتفكرني بزمان بايام ابن الجيران في البلكونه

ام العيال : كنتي شقية ؟

العايقة : ده انا كنت خط الصعيد 

February 14, 2013 near Cairo

الموظفة الثورية سابقا (الاخوانجية حاليا) : وزير العدل قال انا قاعد لحد عيد الفطر بئتوا او اشأتوا 

شئتم أم أبيتم‏." ‏‏ "

February 9, 2013 near Cairo

- شفتوا موضوع التحرش اللي في التحرير ده؟

التابع للفلول : بس انا فرحان في الدكتورة اللي بتيجي مع محمود سعد (منال عمر) انهم اتحرشوا بيها

ام الفلول : دي اللي كانت بتدعو لانتخاب مرسي لما قالت لمحمود سعد بيخوفوا من البعبع يا محمود .. و احنا هنختار البعبع

February 3, 2013 near Cairo

تعليقا علي حمادة المسحول اما قصر الاتحادية اللي رجع في كلامه عن تعامل الشرطة معاه

الموظف الثوري سابقا الاخواني حاليا و بعد ما قال في وسط كلامه الكلمة الاثيرة ..و هو ايه اللي وداه هناك ..اختتم الموضوع بقوله " يعني انتوا هتبقوا احن عليه منه ؟ " 

ممدوح حمزة وراء تنظيم البلاك بلوك .. و يا رب المسيحيين يغطسوا في عيدهم

January 29, 2013 near Cairo

البزرميط بيملي العايقة اسم تكتبه 

البزرميط : عُمُر   

العايقة : بالواو ؟

January 27, 2013 near Cairo

بعد ما حكي الفلولي عن مسيرة يوم الجمعه اللي كانت من شبرا و انه شاف احمد ابو دومه و جيهان فاضل و ابوه اللي عنده القلب اللي مشي في النص علشان تعب 

الفلولي : انا هاقولكم مين اللي ورا البلاك بلوك دول اللي وراهم هو ممدوح حمزة .. انا شفته و هو بيديهم تعليمات و هما بيأمنوا مسيرة شبرا ووقت ما كان بيديهم التعليمات كانوا بيمنعوا ان اي حد يصور

ملحوظة : الفلولي مؤيد للبلاك بلوك و شايف انهم بيحرقوا المؤسسات اللي الاخوان استولوا عليها و ان ده صح

*****

 :الفلولي   

في دمياط

 اقتحموا المجلس المحلي 

و بورسعيد رفعوا علمهم علي المباني

ام العريف : و اسكندرية استقالت امبارح 

January 24, 2013 near Cairo

العايقه دخلت الفيس بوك و من الموبايل

العايقة : يعني انا دلوقتي المفروض اعمل ايه ؟

الثورية : انا بعتلك طلب اننا نبقي اصحاب ممكن بقي تقبلي او نرفضي او تشتمي

العايقة : لاء انا لسه مش فاهمه الفيس بوك كويس لما افهمه هاشتم 

January 19, 2013 near Cairo

التابع للفلول : هي العايقة مجاتش ليه ؟

- : عندهم عيد الغطاس

التابع للفلول : الهي يغطسوا ما يقبوا 

الحمامة الجاسوسة جاية من ايران ..و العساكر لازم تنضرب بالكرباج

January 17, 2013 near Cairo

ام العيال :ده انا يوم ما كنا بننقل العفش لبيتنا نزلت لقيت كل العربيات مشيت فركبت فوق عربية العفش 

January 16, 2013 near Cairo

الموظفة الصامتة : بس العساكر دول كانوا بيتكلموا امبارح و بيقولوا انهم بيضربوهم دول غلابه

ام العريف :ماهو لازم يعاملوهم كده

الصامتة : بس دول غلابه

الفلولي : هما غلابة ماديا بس في السلوك لازم اللي يتعامل معاهم يكون اوسخ منهم انا لما كنت في الجيش كنت باسمع صوتهم من بعيد و هما بيصحوهم بالكرباج 

January 15, 2013 near Cairo

- شوفتوا حصل حادثة قطر حربي في البدرشين و مات 19 واحد

ام العريف : دي مقصودة

الثورية :ازاي مقصوده ؟

ام العريف : الاخوان عايزين يخلصوا من الجيش و من الامن المركزي 

January 14, 2013 near Cairo

 الموظفين و الحمامة

الجاسوسة

الفلولي :معتقدش يكون فيها حاجه

ام العريف : لاء دي ممكن تكون جايالك من ايران

الصعيدية : هيودوها الاذاعة و التليفزيون و مش هيقولونا ايه اللي فيها