أمريكا قتلت عمر سليمان ..و قواعد عسكرية لاسرائيل في السودان

November 20, 2012 near Cairo

الموظفة الصعيدية : حد قرا الدستور الجديد ؟

- صمت من الموظفين بمعني لاء

الصعيدية : بيقولوا فيه ماده تخلي مرسي ممكن يبيع حتة من مصر 

November 18, 2012 near Cairo

الموظف التابع للفلول : نحارب اسرائيل ! .. اسرائيل عندها قواعد في السودان و في ليبيا هننضرب من هنا و 

هناك

November 17, 2012 near Cairo

الفلولي : سبب الضرب اللي في غزة ان اسرائيل عارفه ان مرسي مش هيطول .. فعايزة تودي الفلسطينيين سينا قبل ما يمشي 

November 1, 2012 near Cairo

الفلولي : وهو مين اللي موت عمر سليمان ؟ امريكا جندت ناس في سوريا فجروه .. هو حد

   !من عيلته عرف يشوف جثته 

البنات هي اللي بتتحرش بالرجالة ..و الخرفان بتطير من فوق السطوح

October 30, 2012 near Cairo

التابع للفلول :ده انا امبارح عربيتي وقع عليها خروف السقف بتاعها اتدمر

الموظف المفتي : خروف ..ازاي ؟

التابع للفلول : صاحب الخروف مكانش رابطه كويس قام فلت و نط من فوق السطوح..و بعد كل ده الخروف مماتش

October 30, 2012 near Cairo

- شفتوا الاعصار بتاع امريكا ؟

الموظفة الصعيدية : احسن .. عقبال ما تختفي كلها

الفلولي : يا رب 

October 28, 2012 near Cairo

الموظف البزرميط : دلوقتي التحرش بيبقي بالرجالة .. عدد البنات 8 اضعاف الرجالة .. انا اهو

لا شعري اصفر ولا عنيا خضرا امبارح 3 بنات كانوا بيتحرشوا بيا 

October 26, 2012 near Cairo

العايقة : كنت طالعة من الشغل بالعربية و كان فيه واحد في عربية بيعاكسني فبيقولي يا

بخته اللي في البيت .. قولتله لااء تعالي اما اقولك ..قعد يضحك 

و كمان عايز الموظفين ييجوا في الميعاد ..واحد سوري بيتكلم اسرائيلي

October 25, 2012 near Cairo

في المكان اللي باشتغل فيه المواعيد علي الورق المفروض تكون من 8 و نص الصبح ل 2 و نص الضهر لكن في الواقع ميعاد الانصراف واحده و نص الضهر و ميعاد الحضور اتزحزح ل 9 و ربع و فيه ناس بتيجي 9 و نص و لغاية عشرة الا ربع ساعات .. لكن مع قدوم رئيس جديد للمكان قام خلا الناس تلتزم بميعاد 8 و نص الصبح و ساب الانصراف زي ما هو و ده طبعا اثار غضب الموظفين ولأنه الوزير اللي احنا تبعه محسوب علي الاخوان فسمعت التفسير ده

ام العيال : دول عاملين المواعيد دي علشان يطفشونا و يجيبوا بدالنا موظفين من الاخوان

October 24, 2012 near Cairo

ام العريف : امبارح واحد ورايا في الاوتوبيس سوري كان بيكلم ناس جايبين بضاعة من غزة جاية من اسرائيل و بعدين ابتدي يكلم ناس باليهودي .. بالاسرائيلي —

احنا اللي زرعنا الفلفل الاسود في الجيش و حاكمنا بشار في مصر

October 18, 2012 near Cairo

ام العيال : حلو قوي الفلفل الاخضر في اصفر ده

الصعيدية : اه بيقولوا الفلفل الالوان ده مفيد قوي

الموظف البزرميط : لاء بس اللي افيد فعلا هو الفلفل الاسود

الصعيدية : الاسود انهي ؟

البزرميط : انا لما كنت في الجيش كنا بنزرع فلفل اسود ده افيد حاجة بس هو مبينزلش السوق هنا بيبقي للتصدير بس 

October 14, 2012 near Cairo

ام الفلول : و يقولك انه بشار قال انه مستعد يسيب سوريا و طلب انه يتحاكم في مصر بيكدبوا علي الناس .. يعني انتي شايفة انه بشار اصلا و مرسي ضد بعض .. ازاي هيتحاكم في مصر الاخوان دول بيكدبوا

الموظفة الثورية : ده ع الفيس بوك يا جماعة

الفلولي : طب يورونا بقي الفيديو اللي اتقال فيه الكلام ده

الموظفة الثورية و الموظف الصعيدي (في صوت واحد) : دي نكتة يا جدعان —

الاخوان بيطبطبوا علي المسيحيين ..و الشاذلي قال للسادات عايز ابقي الريس

October 11, 2012 near Cairo

منتهز فرصة عدم وجود العايقة

الفلولي وهو مستاء : و بعد كل ده الاخوان بيطبطبوا علي المسيحيين .. طبعا ماهو ده من ضمن اتفاقهم مع امريكا 

October 8, 2012 near Cairo

ام العريف متحدثة عن مرسي في الاستاد : ابو شعر ناعم اللي معاه ده شكله (بكسرة تحت الشين) قطري .. انا شفته في الوفد القطري ..ده الوصي عليه

October 8, 2012 near Cairo

الفلولي : ما ينفعش مرسي يكرم السادات و الشاذلي دول كانوا ضد بعض .. اصل الجيش بالاقدمية و الشاذلي قال انا اقدم و عاوز ابقي الريس 

تركيا هتدخل الاسلام ..و هي فاطمة مسيحية ؟ و المفروض نولع سفارات امريكا

September 18, 2012 near Cairo

الصعيديه : اهو بسبب الفيلم ده في تركيا اسلموا كتير

التابع للفلول : تركيا كلها مسلمين اصلا

الموظف المفتي : الهجمات كتير علي الاسلام في الدول زي الدانمارك و النرويج لان الاسلام هناك بيتزايد بشكل مش طبيعي 

September 17, 2012 near Cairo

العايقه :و كانت هالة سرحان جايبة واحد سلفي بيهاجم فاطمة ناعوت علشان بتعمل ندوات في الكنيسة

الموظفة الثورية : هي فاطمة ناعوت دي مسيحية ؟ !

September 16, 2012 near Cairo

الموظفة الثورية : الفيلم ده اصلا ولا كان حد مهتم بيه ولا عارفه .. عارفين مين اللي خلا الناس تعرفه في مصر ؟

الموظفة الصعيدية : اقباط المهجر ؟

الثورية : لاء خالد عبد الله هو اللي سخن الناس هنا

الصعيدية : اصلا ده المفروض كانوا يولعوا في كل سفارات امريكا اللي في الدول العربية —

قطر و البحرين و اليهود متفقين مع مرسي .. و نخنوخ كان بيسجل اتفاقاته مع البلتاجي

September 14, 2012 near Cairo
بعد ما جه رئيس جديد للمكان اللي احنا فيه 

الفلولي : ده راجل كويس جدا ده اجتمع بالناس و قالهم انا معاكم و انا عارف ان اللي اشتغل هنا بقاله 30 سنه من حقه يعين ولاده قدمولي الطلبات و انا هاعينهم 
September 14, 2012 near Cairo
ام العيال : امبارح كنت باكلم جوزي و فضل ما يردش علي فقولتله

- ربنا خد كل البرود اللي في الدنيا و حطه فيك انت و عيالك

جوزها : ما تحترمي نفسك 


September 13, 2012 near Cairo

ام العريف : طب ليه قطر هتعمل مرسي اليخوت دلوقتي في الساحل الشمالي و كمان هيبقوا في شرق التفريعه و قناة السويس

الصعيدي : و البحيرة هتدخل في الموضوع

ام العريف : ايوه البحرين

الصعيدي : لاء البحيرة علشان مولد ابو حصيرة اليهود بيشتروا هناك اماكن 
September 12, 2012 near Cairo

الموظف الصعيدي : نخنوخ قدم  سي دي (اسطوانه ) البلتاجي اتفق معاه علي قتل المتظاهرين في التحرير اصله كان كل اتفاق بيعمله بيسجله .. ده كمان بيقولوا ان كل حوادث قتل المسيحيين هو اللي عملها