احنا اللي زرعنا الفلفل الاسود في الجيش و حاكمنا بشار في مصر

October 18, 2012 near Cairo

ام العيال : حلو قوي الفلفل الاخضر في اصفر ده

الصعيدية : اه بيقولوا الفلفل الالوان ده مفيد قوي

الموظف البزرميط : لاء بس اللي افيد فعلا هو الفلفل الاسود

الصعيدية : الاسود انهي ؟

البزرميط : انا لما كنت في الجيش كنا بنزرع فلفل اسود ده افيد حاجة بس هو مبينزلش السوق هنا بيبقي للتصدير بس 

October 14, 2012 near Cairo

ام الفلول : و يقولك انه بشار قال انه مستعد يسيب سوريا و طلب انه يتحاكم في مصر بيكدبوا علي الناس .. يعني انتي شايفة انه بشار اصلا و مرسي ضد بعض .. ازاي هيتحاكم في مصر الاخوان دول بيكدبوا

الموظفة الثورية : ده ع الفيس بوك يا جماعة

الفلولي : طب يورونا بقي الفيديو اللي اتقال فيه الكلام ده

الموظفة الثورية و الموظف الصعيدي (في صوت واحد) : دي نكتة يا جدعان —

الاخوان بيطبطبوا علي المسيحيين ..و الشاذلي قال للسادات عايز ابقي الريس

October 11, 2012 near Cairo

منتهز فرصة عدم وجود العايقة

الفلولي وهو مستاء : و بعد كل ده الاخوان بيطبطبوا علي المسيحيين .. طبعا ماهو ده من ضمن اتفاقهم مع امريكا 

October 8, 2012 near Cairo

ام العريف متحدثة عن مرسي في الاستاد : ابو شعر ناعم اللي معاه ده شكله (بكسرة تحت الشين) قطري .. انا شفته في الوفد القطري ..ده الوصي عليه

October 8, 2012 near Cairo

الفلولي : ما ينفعش مرسي يكرم السادات و الشاذلي دول كانوا ضد بعض .. اصل الجيش بالاقدمية و الشاذلي قال انا اقدم و عاوز ابقي الريس 

تركيا هتدخل الاسلام ..و هي فاطمة مسيحية ؟ و المفروض نولع سفارات امريكا

September 18, 2012 near Cairo

الصعيديه : اهو بسبب الفيلم ده في تركيا اسلموا كتير

التابع للفلول : تركيا كلها مسلمين اصلا

الموظف المفتي : الهجمات كتير علي الاسلام في الدول زي الدانمارك و النرويج لان الاسلام هناك بيتزايد بشكل مش طبيعي 

September 17, 2012 near Cairo

العايقه :و كانت هالة سرحان جايبة واحد سلفي بيهاجم فاطمة ناعوت علشان بتعمل ندوات في الكنيسة

الموظفة الثورية : هي فاطمة ناعوت دي مسيحية ؟ !

September 16, 2012 near Cairo

الموظفة الثورية : الفيلم ده اصلا ولا كان حد مهتم بيه ولا عارفه .. عارفين مين اللي خلا الناس تعرفه في مصر ؟

الموظفة الصعيدية : اقباط المهجر ؟

الثورية : لاء خالد عبد الله هو اللي سخن الناس هنا

الصعيدية : اصلا ده المفروض كانوا يولعوا في كل سفارات امريكا اللي في الدول العربية —

قطر و البحرين و اليهود متفقين مع مرسي .. و نخنوخ كان بيسجل اتفاقاته مع البلتاجي

September 14, 2012 near Cairo
بعد ما جه رئيس جديد للمكان اللي احنا فيه 

الفلولي : ده راجل كويس جدا ده اجتمع بالناس و قالهم انا معاكم و انا عارف ان اللي اشتغل هنا بقاله 30 سنه من حقه يعين ولاده قدمولي الطلبات و انا هاعينهم 
September 14, 2012 near Cairo
ام العيال : امبارح كنت باكلم جوزي و فضل ما يردش علي فقولتله

- ربنا خد كل البرود اللي في الدنيا و حطه فيك انت و عيالك

جوزها : ما تحترمي نفسك 


September 13, 2012 near Cairo

ام العريف : طب ليه قطر هتعمل مرسي اليخوت دلوقتي في الساحل الشمالي و كمان هيبقوا في شرق التفريعه و قناة السويس

الصعيدي : و البحيرة هتدخل في الموضوع

ام العريف : ايوه البحرين

الصعيدي : لاء البحيرة علشان مولد ابو حصيرة اليهود بيشتروا هناك اماكن 
September 12, 2012 near Cairo

الموظف الصعيدي : نخنوخ قدم  سي دي (اسطوانه ) البلتاجي اتفق معاه علي قتل المتظاهرين في التحرير اصله كان كل اتفاق بيعمله بيسجله .. ده كمان بيقولوا ان كل حوادث قتل المسيحيين هو اللي عملها 

مصنع خيرت الشاطر للبكيني و الخمور ..و اللي هتكشف شعرها هتتحط في الزيت المغلي

September 10, 2012 near Cairo

ام العريف : شوفتوا خيرت الشاطر طلع عنده مصنع بكيني و مصنع خمور

التابع للفلول :لاء مش مظبوط الكلام ده

ام العريف : دي مكتوبة في الاهرام (ثم علي الطريقة الفلاحي ) يووه 

September 9, 2012 near Cairo

الفلولي : شوفتوا شفيق امبارح .. احنا خسرنا الراجل ده فعلا

المديره : بس معجبنيش لما قال و ايه يعني لما اخصص اراضي لعلاء و جمال

الفلولي: يا مدام يعني انتي المديره و دخلت واحده بتبيع حاجات و 

اشتريتي منها .. ايه المشكله ؟ 

—

September 7, 2012 near Cairo

المديرة : اصل حفيدتي (6 سنين) بتحب تلبس عريان فلما شافت البنات لابسه كده في الفرح قام واحد قريبنا قالها

: اهو كل دول هيتاخدوا من شعورهم و يتحطوا في الزيت المغلي

الحفيده : بس كان شكلهم حلو .. انا مش هاتحجب دلوقتي 

رقص و قلة أدب في الفرح ..ماتيجوا نشوف

September 6, 2012 near Cairo

المديره : رحت فرح امبارح ايه البنات لابساه ده ؟ و قعدوا يرقصوا رقص حاجه قلة ادب .. و مامت العروسة دي ولا فيفي عبده هي اتحجبت بس علشان بنتها لما اتحجبت قالتلها مش هينفع اكون انا محجبة و انتي لاء.. ده ابني ودا وشه الناحيه التانيه و قعد نص ساعه و مشي

......................
اليوم التالي

موسيقي اغنية حبيبي يا عيني ماليه المكتب و موظف و موظفة قاعدين بيفرجوا علي فيديو للبنات اللي كانت بترقص في الفرح علي موبايل المديره

المديره : بكره اجيبلكم اللي صورته بنتي ده هي شاطرة في التصوير 

البنت كان كل لبسها عريان

September 5, 2012 near Cairo

الموظف الفلولي اللي خطب حوالي 7 مرات  :

: معظم اللي خطبتهم كانوا لما بيعرفوا ان ابويا تاجر بيطمعوا ..   مرة خطبت واحده من مصر الجديده كانت زميلتي لما كنت باشتغل في القطاع الخاص .. رحنا نسأل عليها هناك مش زي الاحياء الشعبيه محدش عارف حاجه عن حد .. بعد ما سألنا كتير حد قالنا هو ابوها غلبان و اخوها كويس .. اما الام فبدون تعليق .. عرفنا بعد كده ان ابوها كان مسافر السعودية عشر سنين و كان بيحول لمراته الفلوس و هي كانت بتجدد الشقه كل سنه .. و بعدين جاله القلب هناك فلما رجع علشان يتعالج هنا لقاها حطت الفلوس كلها في حسابها .. البنت كان كل لبسها عريان (و شاور علي كتفه) .. مامتها كانت بتضربها لو لبست حشمة !