يوميات مكتب

السبت، 4 يناير 2014

ممكن الفرارجي المسيحي يخمك ..و عمر سليمان مات في سوريا ..

July 31, 2012 near Cairo

الموظفة الثورية : انا باتعامل مع المكوجي بتاعنا و هو مسيحي و راجل ذوق و اخلاق جدا

ام العريف : انا رجعت الفراخ للفرارجي لما عرفت انه مسيحي .. لازم الدبيحه يتكبر عليها

الفلولي :هو فيه بيكبروا بس متضمنيش ممكن ياكل حرف
July 30, 2012 near Cairo
الموظف الصعيدي : ده الاخوان ناويين يقطعوا الميه و الكهربا ساعتين في اليوم

الموظفه الصعيديه (بجدية و استياء) : ده بيقولوا انها عايزين يرجعونا نشرب من القله

July 30, 2012 near Cairo

الموظف الفلولي في يقين : ايوه عمر سليمان مات مصاب فعلا كان هو و باقي بتوع المخابرات التانيين في سوريا .. الوحيد اللي اتصاب و عرفوا يلموا الموضوع بتاعه رئيس المخابرات السعوديه

الخميس، 2 يناير 2014

أبو نضارة يقابل أمين المخزن (اسماعيل ياسين يقابل ريا و سكينة )

July 29, 2012 near Cairo

أبو نضارة يدخل المكتب .. امين المخزن قاعد علي مكتب المديره اللي راحت تحضر دفنة جوز زميلتها

امين .المخزن ماسك كتاب عن الحضارات من سلسلة عالم المعرفة كنت سايبه علي المكتب : يا عم سيبك من الشغل و قولي بقي ايه الحكاية .. ايه اللي بتقراه ده ؟

أبو نضارة : ده كتاب عن الحضارات

الامين : و انت ليه تقرا الحاجات دي دي بتوجع الدماغ

أبو نضارة : ماهو لما تقرا فيها ممكن دماغك متوجعكش

الامين : بس اللي كتب الكتاب ده مش وسطي

أبو نضارة : ده اسمه بيتر ماهو مش مسلم اصلا

الامين : مش قصدي .. قصدي انه ممكن يكون نازي او صهيوني

الأربعاء، 25 ديسمبر 2013

واحد عايز يبوس في نهار رمضان ..و التاني بيتفرج بس مدكن

July 29, 2012 near Cairo

الموظفة الثورية : هو مسلسل الزوجة الرابعة بييجي امتي؟

ام الفلول : ده بييجي علي طول في كل القنوات

الفلولي : بس مينفعش يجييوا مسلسل زي كده في رمضان

ام الفلول : خلاص احنا هنتفرج و انت انزل صلي التراويح

موظفة : طلقها امبارح

الفلولي :طلق البت ؟

ام الفلول : مانت بتتفرج اهو

July 28, 2012 near Cairo

بعد ما واحدة سلمت علي العايقة و باستها علشان رجعت من المصيف

البزرميط : معنديش مشكلة ابوس ( و عدة من ايام اخر) او اطعام مسكين .. و شاور علي التابع للفلول .. اهو

الأحد، 22 ديسمبر 2013

حمام سباحة محمد مرسي ب12 مليون جنيه ..و الموظفة الامبراطورة

July 28, 2012 near Cairo

العايقة : كنت باصيف و كان معانا اهل جوزي كانوا مسمينني الامبراطورة .. الامبراطورة راحت الامبراطورة جت

July 25, 2012 near Cairo

الموظف الصعيدي : ده حمام السباحة اللي هيعمله مرسي في القصر هيتكلف 12 مليون

جنيه .. ده كمان جايب مدربين خيول عالميين لولاده الاتنين علشان يركبوا الحصانين اللي كان بيركبهم جمال و علاء

الخميس، 19 ديسمبر 2013

يعني ضد عبد الناصر و بوهيمي و ايه كمان ..اعترف

24, 2012 near Cairo

بعد مديح مطول من الموظف الصعيدي لعبد الناصر

الموظف الصعيدي : و انت بقي من اللي هما ضد عبد الناصر

أبو نضارة يبتسم

الصعيدي : انت ضد عبد الناصر و السادات و كل الناس مش فاهملك انت مع مين

الموظف المفتي : يا عم ده بوهيمي

الصعيدي : بهائي ؟

الثلاثاء، 17 ديسمبر 2013

صورة علاء عبد الفتاح وهو ماسك مدفع .. و الموظفة كانت بتعط

July 23, 2012 near Cairo

موظفة : كنتي فين جيتي متأخر ؟

العايقة : كنت باعط

......................

الصعيدي : ده لو خيرت الشاطر مسك رئيس وزرا هيبقي اغني رجل في العالم زي بيل جيتس

.....................

الفلولي : الجيش هيلم الناس دي بس لسه مش دلوقتي .. ده الواحد يبقي متصور ماسك

مدفع علي دبابه و يقولك طلعوه زي علاء عبد الفتاح كده

الأحد، 15 ديسمبر 2013

الاخوان قتلوا عمر سليمان في أمريكا ..و قصر الظواهري في القاهرة

July 21, 2012 near Cairo

الموظف صديق الفلولي ده بيعتبر الفلولي مثله الاعلي بس هو مش معانا في المكتب فبيظهر قليل يعني النهارده كان بيقنع الفلولي انه الاخوان قتلوا عمر سلميان في امريكا و الفلولي يقوله لاء مش للدرجة دي

صديق الفلولي : اصل بتوع الجماعة الاسلامية دول معاهم فلوس كتيرة قوي ده ابن ايمن الظواهري جاب منين فلوس عنده قصر في التجمع الخامس و اسمه قصر منيف