في المكان اللي باشتغل فيه، اكتشفت ان واحدة من الموظفات تحولت لتيك توكر مشهورة، وده رغم انها لا تتمتع بأي مقومات أو مؤهلات لجذب الناس، كل اللي كانت بتتمتع بيه انها كانت كثيرة الخناق مع الموظفين، وانها كانت بتحاول تطلع بأي مصلحة لما كانت بتشتغل صرافة.
الفكرة بالنسبالي في تعامل باقي الموظفين معاها، واللي بيتراوح بين الحسد والاستنكار، وفي نفس الوقت جزء كبير من الموظفين حريص على متابعتها علشان يعرف أخبارها وينم عليها، ويشوف هي اتخانقت مع مين وردحت لمين، وقابلت مين من المشاهير.
ويمكن ده بيلخص علاقة الناس بمشاهير التيك توك، انه المشاهير دي من الناس العادية بيعرضوا حياتهم الشخصية في مقابل انهم يكسبوا من رغبة الناس في التلصص عليهم وانتقادهم والكلام عنهم، بينما الناس اللي بتعتقد انها بتنتقدهم هما ببساطة بيساعدوهم في جمع الفلوس والانتشار وبيشبعوا رغبتهم في الاعتقاد انهم أفضل من التيك توكرز أخلاقيا، لأنهم مش بيبعوا نفسهم وحياتهم الشخصية على الشاشات.
