قبضوا علي شريف في شقة مفروشة بتهمة الشذوذ

February 24, 2014 · Cairo ·

الفلولي : قبضوا علي شريف اول امبارح في شقة مفروشة بتهمة الشذوذ

أم العيال : شريف عامر ولا مين ؟

أم العريف : لاء شريف بتاع ساعة مع شريف

الموظفة الاخوانية : اه الخبر موجود في كل مواقع النت

أم العريف : و قبضوا عليه في مصر الجديدة ؟ ده من عيلة كبيرة ده جده يبقي المشير أحمد اسماعيل

أم العيال : هو الواد ده تحسي انه مش مظبوط كده

..فالعايقة قامت حطت ايدها علي بقها من الجنب و بصت ل أم العريف و سألتها بتحريك الشفايف بس من غير ما تطلع صوت و من غير ما تاخد بالها اني شايفها

: شريف الخ.. ؟

مظاهرات في قطر ..و صافيناز مرات أبوكي!

February 21, 2014 · Cairo ·

الفلولي : عرفتوا اخر خبر ..كان فيه مظاهرات امبارح في قطر ..و المارينز ضربوا عليهم نار و موتوا منهم ناس

..

العايقة بعد ما ادت التابلت Tablet بتاعها ل ام العريف ( اللي كان فيه صورة من علي الفيس بوك ل دينا (الراقصة ) و صافينار \صافيناز بتعمل مقارنة بينهم

أم العريف : لاء فيه فرق ده بلدي و ده مستورد ..بس دي مش صافيناز

العايقة : و انتي عارفاها منين ..مرات ابوكي ؟

نعمل السيسي فرعون ..و نربط الحامل بالكلابشات

February 15, 2014 · Cairo ·

التابع للفلول : ده بيقولو احنا كده هنعمل من السيسي فرعون

الفلولي : فرعون احسن من طرطور

أم الفلول : و ايه يعني لما نعمل فرعون

...

أم الفلول : و جايبين صورة واحدة مربوطة بكلابش و هي حامل ..و ايه يعني لما يربطوها بكلابش ماهو ده من حق النيابة .. و بيتكلموا عن التعذيب ..ما يتعذبوا علشان يجيبوا قرارهم

انا أعرف واحد قتل مراته ..متتعامليش مع أحاسيس تاني

February 12, 2014 · Cairo ·

و لما انفتح موضوع ضرب الزوج لزوجته دي كانت أهم الاراء

الفلولي : اللي يضرب مراته ده ميبقاش راجل

أم العريف : ممكن هي تكون عملت حاجة تستاهل بسببها الضرب

الموظف المفتي : فيه ستات ممكن تستفز اجوازها جدا ده انا اعرف واحد قتل مراته

February 11, 2014 · Cairo ·

أم العيال بتشتكي من وزنها الزائد جدا و في نفس الوقت مش بتعمل الحاجات المنطقية علشان تقلله ..بتاكل كتير و تشرب بيبسي و تتحرك قليل ..بس بتحاول تخففه عن طريق الأعشاب و كانت بتتكلم علي أعشاب "دكتور حساسين " اللي ابتدت الحكومه تطارده مؤخرا

انفتحت سيرة الوزن تاني

أم العريف :اللي اسمه أحاسيس ده متتعامليش معاه تاني

لحظة صمت

أم العيال :احاسيس مين ..قصدك حساسين

الشرطة لبسته تهمة ظلم فعلا ..بس هو اللي غلطان

February 9, 2014 · Cairo ·

الموظف المفتي : انا برضه سألت وكيل النيابة اللي كنت معاه في الانتخابات فحكالي انه كان فيه واحد في أحداث الأزهر هو كان شايف كلامه غير الباقيين و مكانش عايز يديه حبس بس رئيس النيابة رفض و قاله كله ياخد 15 يوم

الفلولي : أيوه فيه ناس اتاخدت في الرجلين و اتاخدوا ظلم بس هما اللي غلطانين ..كان فيه واحد شوفته معاه عربية نص نقل و ملوش دعوة بالمسيرة بتاعة الاخوان و بعدين لما الشرطة جت قبضت عليه ..لاء و العربية كان فيها رخام فلبس تهمةأنه الرخام ده بيستخدموه يكسروه و يحدفوه ع الناس ..طب انت لقيت الشرطة جاية اجري ايه اللي موقفك ؟

طيارة الجيش في سينا اتضربت بصاروخ ستلا

February 8, 2014 · Cairo ·

العايقة : انا مش قادرة أفهم الموضوع بتاع أحمد عز و زينة ده

الفلولي : ماهو هيطلع زي أحمد الفيشاوي و يعمل تحليل ال DNT

(المقصود تحليل DNA ) الحمض النووي

..

الفلولي : الطيارة اللي وقعت في سينا دي اتضربت بصاروخ ستللا

(المقصود صاروخ ستريلا )

..

البزرميط : الأسبوع اللي فات الشرطة و الجيش ضربوا الاخوان في الالف مسكن بمدافع جريفون *

 ( المقصود مدافع جرينوف )

مبروك .. الموظف حامل

February 6, 2014 · Cairo ·

مقدمة عن حوامل المكتب

عندنا في المكتب اتنين شابات حوامل ..الاولانية لسه متجوزة من شهور و ده اول طفل ليها و الموظفة التانية تبقي مرات (زوجة ) الموظف الصعيدي و علي الرغم من ان القانون بيمنع وجود قرايب في نفس القسم بس طبعا مبيتطبقش

كان حد بيسأل علي الاولانية مجاتش ليه فقالوا انها تعبانة و الدكتور قالها نامي علي ضهرك

و بعد شوية جت الموظفة الحامل مرات الموظف الصعيدي اللي كان أجازة

العايقة : هو جوزك مجاش ليه ؟

مرات الصعيدي : يعني تعبان شوية

العايقة : ايه الدكتور قاله نام علي ضهرك ؟

يعني ايه يبقي فيه بطاقة مكتوب عليها السيسي و الناس تشتريها ؟

February 4, 2014 · Cairo ·

امبارح بنت من قسم تاني تقريبا في اواخر العشرينات واضح انه الموظفين شافوها بتكتب كلام غريب شوية ع الفيس بوك فلما دخلت المكتب عندنا طلبوا منها توضيح

البنت : أنا مش مع الاخوان و مع 30 يونيو بس انا شايفه حاجات بتحصل دلوقتي زي اللي كانت بتحصل أيام الاخوان يعني أيام الاخوان اللي يقول لاء يبقي كافر و دلوقتي اللي يقول لاء علي الدستور يبقي ضد الديموقراطية ..ليه تقولي انزل و قول نعم ما تسيبني انا اختار ..احنا اللي بنعمل من الحاكم اله يعني ايه يبقي فيه بطايق مكتوب عليها السيسي و الناس تشتريها ؟

موظفة : أصل ده حب من الناس

الموظفة الثورية سابقا \اخوانية حاليا : ما تسيبوها تتكلم هاجمين عليها كده ليه ؟

أحمد دومة هو اللي سحل البنت في التحرير ..و الواد جوه التلاجه

February 2, 2014 · Cairo ·

أم العيال :امبارح يا اختي بابص ع الواد ابني لقيت راسه كلها جوه التلاجة ..لقيته بياكل جوه ..حاطط طبق فيه جبنة و جنبيها رغيف عيش و بياكل

February 1, 2014 · Cairo ·

الموظف المفتي : ده فيه صفحة للمخابرات علي الفيس بوك ..فاكرين البنت اللي جابولها صورة انه عساكر قلعوها العباية ..دي طلعت مش مصرية طلعت سورية

أم الفلول : اه هي عملت كده علشان توقع المجلس العسكري و عملت حاجات قبلها في سوريا و الاردن علشان توقعهم

العايقة : و اللي لابس الكوتشي ده كان احمد ابو دومة

التابع للفلول : و كان لابس لبس عسكري ده المفروض يتحاكم علشان لبس عسكري

عمر سليمان عايش و هيرجع ؟ أه ممكن ..طبعا لاء

January 29, 2014 · Cairo ·

في أول الاسبوع

أم الفلول (بعدم اقتناع) : ده فيه ناس ع الفيس بوك بيقولوا عمر سليمان عايش و هيرجع

الفلولي (في شك ) : اللي مشككني ان اهله مش باين عليهم أي مظاهر حزن ..ده مخليني مش مقتنع قوي انه مات

..

بعد كام يوم

التابع للفلول : تفتكروا عمر سليمان لسه عايش ؟

العايقة : ده بيقولوا انهم شافوه في سيتي ستارز

التابع للفلول : لاء طبعا عمر سليمان مات الله يرحمه

وكيل النيابة : عندي تعليمات أي حد مقبوض عليه يتحبس 15 يوم حتي لو بريء

January 26, 2014 · Cairo ·

الموظف المفتي : انا لما كنت في الانتخابات بتاعة الاستفتاء كان معانا وكيل نيابة قالنا انه عنده تعليمات من رئيس النيابة بانه اي حد مقبوض عليه في اي احداث ياخد 15 يوم في 15 يوم في 45 ...بعد كده لو لقوا ان ملوش علاقة بالموضوع يخرج .. ساعات هو بيبقي شايف انه فيه ناس باين انهم ملهمش دعوة بالموضوع بيبقي باين ان كلامهم مختلف عن الباقيين و بيبقي عايز بفرج عنهم بس مبيقدرش علشان التعليمات

—