سبب تدهور المنتخب القومي

January 17, 2016 · Cairo·

تدخل واحدة المكتب تسلم علي العايقة بحرارة و تبوسها ..

أول ما تخرج

الفلولي (بضحك ): ايه ده أول مرة واحدة ست تسلم عليكي.. كل اللي بييجوا بيبقوا رجالة

العايقة : اومال لو شفت و انا مروحة قاعدين يسلموا عليا و انا حتي مش فاكرة مين دول

الفلولي : حرام عليكي ده انتي سبب تدهور المنتخب القومي (افيه فيلم غريب في بيتي "

قامت راقعة بالصوت في الكنيسة

January 7, 2016 ·

أم الفلول للعايقة : في الشركة اللي كنت شغالة فيها..المدير مات و رحنا كلنا الكنيسة ووسط ما بيصلوا عليه واحدة معانا بتشتغل زي الساعي اللي عندنا كده ..قامت راقعة بالصوت ..بقينا في نص هدومنا مش عارفين نعمل ايه

لمشاهدة فيديو عن البوست

العلاج بالنيون و السكر

December 19, 2015 ·

أم الفلول : و بنتك عاملة ايه (مولودة حديثا)

الموظف المفتي : الصفرا زيادة عندها

أم الفلول : شغل لها اللمبة النيون و اديها ميه بسكر هتبقي كويسة

فاكرة لما الشرطة فرمت السودانيين ؟

December 7, 2015 

· العايقة : البشير بيقولك عايز حلايب و شلاتين

أم الفلول (بفخر ) : فاكرة لما الشرطة فرمتهم و شالتهم في مصطفي محمود ؟

العايقة : آه ..حبة

سود معفنين

وهاجمت القوات، المعتصمين بالميدان – وبينهم نساء واطفال ومسنين – وبدايةً فتحت عليهم خراطيم مياه سيارات الإطفاء، ثم الغاز المسيل للدموع، والضرب بالهروات والعصي والعصي الكهربية. وأدي الاعتداء الوحشي لقوات الأمن المصرية علي اللاجئين الي مقتل (27) بحسب بيان الداخلية المصرية، لكن منظمات حقوقية مصرية وصحف ذكرت ان عدد القتلي بلع الـ(50) قتيلا، واصابة نحو (300) بإصابات بالغة وجروح وكسور

لماذا قامت الموظفة بتهريب ..الوزة ؟

December 6, 2015 ·

التابع للفلول : ايه الموضوع بتاع الوزة ده ؟

الموظفة الصامتة (تبتسم و تحكي ): الناس اللي في العمارة اللي ورانا اللي كانوا قبل كده خلوا الصرف بتاع الحمام عندهم ينزل علي عمارتنا لدرجة ان الصرف اثر علي سلم البيت و لمينا عشرتلاف جنيه علشان نعمل سلم جديد لما يوميها مجيتش الشغل علشان كانوا بيعملوه ..من قريب ابتدوا يربوا طيور علي السطح عندهم وز و بط و فراخ و كل يوم اصوات الطيور دي في الفجر تعمل دوشة و ازعاج غير المخلفات بتاعتها اللي بتنزل ع السلم عندنا ..من كام يوم و انا نازلة بدري علشان الشغل لقيت وزة طارت من عندهم و جات السلم عندنا ..قمت واخداها لحد أول الشارع و سبتها هناك ..جم بعديها يسألوا عليها قولنالهم منعرفش حاجة و ملقوهاش بعدها بيومين وزة تانية برضه عملت فيها نفس الموضوع ..قاموا عملوا سور خشب علشان مفيش حاجة تقع عندنا ..ما كان من الأول

مجلس شعب بشراء الأصوات

November 26, 2015 ·

الفلولي: الظاهرة اللي واضحة فعلا المرة دي ظاهرة المال السياسي ..أول يوم عندنا (روض الفرج و الساحل) الصوت وصل 300 جنيه تاني يوم وصل 600 و 700

مجلس الشعب انتخاب عشوائي

November 22, 2015 ·

‫"انتخابات مجلس الشعب 2015 "

التابع للفلول : و انت هتنتخب ؟

الموظف الصعيدي(ساكن في فيصل ) : انا مرحلة أولي رحت انتخبت ..كنت راجع من الشغل باليل .. قعدت مش عارف اختار مين و انا جوه اللجنة.. ماانا معرفش حد و بعدين اخترت اتنين واحد دكتور و التاني مهندس و القايمة اخترت "في حب مصر "

أم الفلول : آه بتاعة السيسي

تابع صفحة "يوميات مكتب" ..اضغط هنا