مرسي هو اللي قتل الجنود في رفح .. لاء ده الجيش هو اللي عملها

August 7, 2012 near Cairo

(عن مذبحة الجنود في رمضان )

ام الفلول : اللي هربوا من السجون هما اللي عملوا العملية دي بالاتفاق مع مرسي

البزرميط : ده الجيش هو اللي عاملها 

August 6, 2012 near Cairo

تذكر : ام العيال مخلفة 5 عيال

ابو العريف : ام العيال بتضحك مع جوزها في الموبايل .. ايه انتوا مبتضحكوش في البيت ؟

العايقه : هيضحكوا ازاي هو فيه مكان ؟ 

August 6, 2012 near Cairo

http://www.masrawy.com/news/egypt/politics/2012/August/3/5231982.aspx

بعد حادث فندق فيرمونت 

ام الفلول : البلطجي بتاع الكورنيش اللي مات ده مرسي كان مديله عفو و طلع من السجن علشان حسن سير و سلوك

ده رجال الاعمال بيخلوا البلطجيه يحموهم و عرف بيدولهم ايه 

عربية مرسيدس و ميتين الف جنيه لكل واحد 

و كان السؤال في المكتب ..مش عايزين اندر وير Underwear ؟

August 6, 2012 near Cairo

الموظف الصعيدي: الفلسطنيين الخونة اللي باعوا ارضهم

ام الفلول : قال و مرسي يقولك نفتح المعابر ؟ نفتح المعابر نديهم اكل و ييجوا يموتونا 

August 6, 2012 near Cairo

ثم دخلت البائعة السبعينية التي تبيع الحلوي و الاقلام و كروت المحمول ثم سألت : مش عايزين اندر وير   "ملابس داخلية " ؟ 

August 5, 2012 near Cairo

العايقة : و الله انت لو جالك حاجه مراتك هتبعتلنا جواب شكر

الفلولي:ده معظم الستات هتبعت جوابات شكر لو خلصوا من اجوازهم

العايقه :يللا ربنا ياخده

 الفلولي : اهو شفتي   (قصده علي جوزها )

العايقه: لاء انا باقول علي مرسي

أمن الدولة دخل البيت من الشبابيك ..و ربنا بيغير الجو في رمضان

August 2, 2012 near Cairo

الموظف الصعيدي : ده امن الدولة مره خد ناس جنبنا .. مخبطوش علي الباب دخلولهم من الشبابيك .. قرايبهم قعدوا 8 سنين مش عارفين هما فين

ام العريف : كل الدول العربية كده .. اصل ده نظام دولة 

August 2, 2012 near Cairo

موظفة مسالمه : مسلسل خطوط حمرا بتاع احمد السقا  ده حلو قوي .. امبارح دبحوله مراته و هي حامل — 

August 2, 2012 near Cairo

موظف : ده رمضان السنة دي هيبقي صعب قوي جاي في اغسطس

ام العريف : لاء ربنا هيخلي الجو حلو في رمضان 

ممكن الفرارجي المسيحي يخمك ..و عمر سليمان مات في سوريا ..

July 31, 2012 near Cairo

الموظفة الثورية : انا باتعامل مع المكوجي بتاعنا و هو مسيحي و راجل ذوق و اخلاق جدا

ام العريف : انا رجعت الفراخ للفرارجي لما عرفت انه مسيحي .. لازم الدبيحه يتكبر عليها

الفلولي :هو فيه بيكبروا بس متضمنيش ممكن ياكل حرف 
July 30, 2012 near Cairo
الموظف الصعيدي : ده الاخوان ناويين يقطعوا الميه و الكهربا ساعتين في اليوم

الموظفه الصعيديه (بجدية و استياء) : ده بيقولوا انها عايزين يرجعونا نشرب من القله 


July 30, 2012 near Cairo

الموظف الفلولي في يقين : ايوه عمر سليمان مات مصاب فعلا كان هو و باقي بتوع المخابرات التانيين في سوريا .. الوحيد اللي اتصاب و عرفوا يلموا الموضوع بتاعه رئيس المخابرات السعوديه 

أبو نضارة يقابل أمين المخزن (اسماعيل ياسين يقابل ريا و سكينة )

July 29, 2012 near Cairo

أبو نضارة يدخل المكتب .. امين المخزن قاعد علي مكتب المديره اللي راحت تحضر دفنة جوز زميلتها 

امين .المخزن ماسك كتاب عن الحضارات من  سلسلة عالم المعرفة كنت سايبه علي المكتب : يا عم سيبك من الشغل و قولي بقي ايه الحكاية .. ايه اللي بتقراه ده ؟

أبو نضارة : ده كتاب عن الحضارات

الامين : و انت ليه تقرا الحاجات دي دي بتوجع الدماغ

أبو نضارة : ماهو لما تقرا فيها ممكن دماغك متوجعكش

الامين : بس اللي كتب الكتاب ده مش وسطي

أبو نضارة : ده اسمه بيتر ماهو مش مسلم اصلا

الامين : مش قصدي .. قصدي انه ممكن يكون نازي او صهيوني 

واحد عايز يبوس في نهار رمضان ..و التاني بيتفرج بس مدكن

July 29, 2012 near Cairo

الموظفة الثورية : هو مسلسل الزوجة الرابعة بييجي امتي؟

ام الفلول : ده بييجي علي طول في كل القنوات

الفلولي : بس مينفعش يجييوا مسلسل زي كده في رمضان

ام الفلول : خلاص احنا هنتفرج و انت انزل صلي التراويح

موظفة : طلقها امبارح

الفلولي :طلق البت ؟

ام الفلول : مانت بتتفرج اهو

July 28, 2012 near Cairo

بعد ما واحدة سلمت علي العايقة و باستها علشان رجعت من المصيف

البزرميط : معنديش مشكلة ابوس ( و عدة من ايام اخر) او اطعام مسكين .. و شاور علي التابع للفلول .. اهو

حمام سباحة محمد مرسي ب12 مليون جنيه ..و الموظفة الامبراطورة

July 28, 2012 near Cairo

العايقة : كنت باصيف و كان معانا اهل جوزي كانوا مسمينني الامبراطورة .. الامبراطورة راحت الامبراطورة جت 

July 25, 2012 near Cairo

الموظف الصعيدي : ده حمام السباحة اللي هيعمله مرسي في القصر هيتكلف 12 مليون

جنيه .. ده كمان جايب مدربين خيول عالميين لولاده الاتنين علشان يركبوا الحصانين اللي كان بيركبهم جمال و علاء