الأربعاء، 8 مارس 2017

فاتورة كهربا ب ثلاثة آلاف جنيه


الموظفة الخائفة من شيء ما : يرجعولنا بقي مرتباتنا بالزيادة 10 % علي القانون القديم ..قال مش عايزين يدونا الزيادة علشان يوفروا للدولة فلوس
أم الفلول : ما هي الفلوس دي علشان يعملوا بيها المشاريع
الفلولي : يعني هما ملقوش غير الموظف الغلبان ياخدوا منه ؟

العايقة : ما هم الوزرا دول مش حاسين بحاجة بياكلوا و يشربوا و ياخدوا فلوس علي حساب الحكومة


العايقة النهارده جايه و مش طايقة نفسها ..علشان جاتلها فاتورة الكهربا ب 3000 جنيه ثلاثة آلالف ..طلع ان العداد عندهم فيه مشكلة في القراية بقالها سنين و كانوا ممكن يدفعوا في شهر 6 جنيه مثلا و جالهم ناس تفتش تشوفوهم سارقين كهربا ولا ايه و جوزها راح الشركة قال ان عنده مشكلة و محدش استجاب ..لحد ما جات الفاتورة دي و الراجل بيقولهم لسه فيه 1500 كمان جايين ..و بالعافية قبلوا انهم يدفعوا 1500 و يقسطوا النص التاني

الجمعة، 3 فبراير 2017

سبب تدهور المنتخب القومي

January 17, 2016 · Cairo·
تدخل واحدة المكتب تسلم علي العايقة بحرارة و تبوسها ..
أول ما تخرج
الفلولي (بضحك ): ايه ده أول مرة واحدة ست تسلم عليكي.. كل اللي بييجوا بيبقوا رجالة
العايقة : اومال لو شفت و انا مروحة قاعدين يسلموا عليا و انا حتي مش فاكرة مين دول

الفلولي : حرام عليكي ده انتي سبب تدهور المنتخب القومي (افيه فيلم غريب في بيتي "

الخميس، 12 يناير 2017

قامت راقعة بالصوت في الكنيسة




أم الفلول للعايقة : في الشركة اللي كنت شغالة فيها..المدير مات و رحنا كلنا الكنيسة ووسط ما بيصلوا عليه واحدة معانا بتشتغل زي الساعي اللي عندنا كده ..قامت راقعة بالصوت ..بقينا في نص هدومنا مش عارفين نعمل ايه

الخميس، 5 يناير 2017

العلاج بالنيون و السكر



أم الفلول : و بنتك عاملة ايه (مولودة حديثا)
الموظف المفتي : الصفرا زيادة عندها

أم الفلول : شغلها اللمبة النيون و اديها ميه بسكر هتبقي كويسة

Facebook Comments