صباح بترقص دبكة في جهنم

December 12, 2014 · Cairo ·

‫#‏يوميات_مكتب‬

تاني يوم جنازة صباح

الفلولي : شوفتوا الولية المجنونة امبارح ..انا قاعد في المحل و مشغل cbc اكسترا علشان بتنقل لو فيه احداث و الاقيهم جايبين جنازة صباح.. طب هي ولية بنت مجنونة ازاي هما يطاوعوها و يجيبوا دبكة و فرقة رقص في الجنازة

العايقة : ولو دي برضه وصيتها و لازم تتنفذ

الفلولي : دي مجنونة

التابع للفلول : زمانها بترقص دبكة في جهنم دلوقتي

...

العايقة فضلت باقي اليوم قافشة و متضايقة من المكتب بسبب الحوار ده

سامي يوسف سويدي ..و ميكروفيلم سفير قطر

December 12, 2014 · Cairo ·

معلومة من الموظف الصعيدي

"سامي يوسف اللي بيغني اغاني دينية .. سويدي من اصل لبناني "

December 2, 2014  · Cairo ·

" قال مصدر أمني بمطار القاهرة الدولي، إن حذاء السفير القطري 

بمصر، حمد سيف بوعينين، تسبب في أزمة بالمطار، بعد أن 

رفض خلعه والخضوع لإجراءات التفتيش الخاصة بالمطارات، 

خلال إنهاء إجراءات سفره إلى الخرطوم "

أم العريف : شوفتوا جزمة سفير قطر

العايقة : آه ابن الجزمة

أم العريف : أكيد كان فيها ميكروفيلم علشان كده راح غيرها بجزمة تانية و سافر

العنتيل السلفي خلي منظرنا وحش قدام المسيحيين و بيحصل في الكنيسة أكتر من كده

November 18, 2014 · Cairo · ·

في غياب العايقة

الفلولي بيشتكي من موظفين الضرايب المسيحيين اللي بيراجعوا علي محل ابوه

التابع للفلول بيتكلم عن المسيحيين ولاد ال .. اللي بيشتروا الاراضي في شبرا

الموظف الصعيدي متضايق من العنتيل السلفي لانه بيكسفنا قدام المسيحيين بينما بيحصل في الكنيسة اكتر من كده

موظفين مؤيدين النظام ..مع 30 يونيو و السيسي و بيشتموا الاخوان و السلفيين و داعش بس موقفهم من المسيحيين مبيتغيرش

ركنت عربيتي جنب القسم ..اتسرقت

November 17, 2014 · Cairo ·

الموظف الاسمراني الشاب لسه جاي القسم جديد بس في اوضة تانية..

هو لما بييجي الشغل بيركن عربيته (هوندا سيفيك موديل 92 ) في شارع جانبي يعتبر ورا قسم الوايلي يوم الخميس طلع من الشغل علشان ياخدها لقي عربيته اتسرقت ..و كان غايب امبارح جه النهارده بيسألوه ايه الاخبار

الاسمراني : ده و انا بالف في المنطقة انا و صحابي مسكنا واحد سارق عربية يعني لو فيه حد بيلف من القسم هيمسكوا الحرامية

الفلولي (اخوه ظابط شرطة ) : روح للكبير بتاع المنطقة ( علي طريقة فيلم آخر الرجال المحترمين )

الاسمراني :ما هو ده اللي باعمله

موظفة اسمها بطيخة ..و القداس القبطي.. بالهيروغليفي

November 17, 2014 · Cairo · 

النهاردة من ضمن الاسامي في كشوف موظفين واحدة اسمها .. بطيخة و جدها اسمه محارب

November 14, 2014 · Cairo · 

 في غياب العايقة انفتح الكلام عن القداس المسيحي

أم العيال :محدش فاهم هما بيقولوا ايه ؟

أم العريف : لما كنت في فرح زميلتنا (المسيحية المتزمتة ) خليت ابني يسأل فعرفت ان ده ايطالي

الموظف المفتي : لاء ده هيروغليفي مع اللغة المصري القديمة

الخمرة ..قتلت معالي زايد

November 11, 2014 · Cairo 

· 

العايقة و هي بتشوف الاخبار ع التابليت : معالي زايد ماتت ؟

أم العريف : أه نفس مرض أحمد زكي كانسر  (سرطان )علي الصدر ..من السجاير و الخمرة

المديرة الجديدة : آه الخمرة

انا عايزة أضرب بالرشاش اللي واقف يتفرج علي المظاهرة

November 8, 2014 · Cairo · 

بعد حكايات عن استمرار المظاهرات في "عين شمس " حيث تسكن العايقة و في "فيصل حيث تسكن أم الفلول و انه فيه حد مات في عين شمس مش عارفين برصاص الشرطة ولا برصاص الاخوان

أم الفلول :انا لو عليا امسك رشاش و اضرب بيه كل اللي في المظاهرة و كل اللي ليه دعوة و اللي ملوش دعوة و اللي واقف يتفرج كمان

October 27, 2014 · Cairo · 

البزرميط اتحفنا بمعلوماته العامة اللي كان ابرزها ان القمر نجم

لو الواد الصغير حط صباع رجله في بقه يبقي ..

October 2, 2014 · Cairo · 

بعد حوار طويل  بين "أم العيال " عندها 5 اطفال و الموظف الصعيدي متجوز من حوالي 3 سنين و عنده ولدين ..اشتمل الحوار علي عبارات " العيال عزوة " و "كل عيل بييجي برزقه " و "ربنا يرزق الناس بالعيال " كان ختامه

الصعيدي : فعلا .. ده انا لقيت ابني وهو صغير بيحط صباع رجله في بقه (فمه ) و يمصه ..سألت.. قالولنا ده كده هيجيله أخ ... و فعلا بعديها ربنا رزقنا بالتاني

عرض قوي من جيمس كاميرون للسيسي

September 29, 2014 · Cairo · 

و بعد مديح للسيسي و خطابه في الأمم المتحدة

أم الفلول : ده الراجل بتاع بريطانيا

الفلولي : آه كاميرون

أم الفلول : آه.. عرض علي السيسي الانضمام للاتحاد الاوروبي