الجمعة، 29 مايو 2015

مسيحية بتقول الرسول عليه الصلاة و السلام !

August 7, 2014 · Cairo ·
الموضوع كان عن شهر رمضان و عبد الباسط عبد الصمد و الشيخ محمد رفعت لحد ما وصل لفوازير آمال فهمي (العايقة مكانتش موجودة )
أم العريف : آمال فهمي مسيحية
الفلولي : انا مرة سمعتها في لقاء بتقول الرسول عليه الصلاة و السلام انا شاكك في المعلومة دي ..عرفتيها منين؟
أم العريف : حد قالها ..
الفلولي : مين ؟
أم العريف : حد قالها في التليفزيون
الفلولي : طب ابقي اتأكديلنا من المعلومة دي
أم العريف : هاتأكد منها ازاي هاشوف بطاقتها ؟

الخميس، 28 مايو 2015

واضح إن فيه .. توء سفاهم

النقاش كان بين البزرميط و أم العريف وهو كان بيقول ان البنوك زودت الفايدة علي القروض و قللت فايدة الايداع ..المهم و هما بيتناقشوا البزرميط قال جملة و كملها عادي و هي كانت بترد عليه عادي لولا اني وقفت الكلام و قولتله ثانية واحدة ايه اللي انت بتقوله ده ..الجملة كانت
" لاء ماهي الزايدة فادت علي القروض "

الأحد، 24 مايو 2015

المستشارة الألمانية أنجيلا ماكريل


العايقة بعد ما خلصت تليفون ضايقها شوية تبتدي تدندن بصوت مسموع للمكتب
" بعدين و يااكي ..احييه في هوااكي "

" عن نهائي كأس العالم 2014 "
الفلولي : و بوتين كان موجود في النهائي امبارح

أم العريف : ايوه ماهي روسيا اللي هتنظم الدورة اللي جاية كان هو و رئيسة المانيا.. ماكريل

الجمعة، 22 مايو 2015

هو اللي مات مسيحي ..عقبال الباقي

تدحل" أم العريف" المكتب ..تلاحظ أن العايقة (مسيحية ) ترتدي اللون الاسود ..تنتظر حتي خروجها ثم تسأل :هو مين اللي مات لها ؟
تأتي الاجابة : جوز أختها
ترد علي الفور : عقبال الباقي

الخميس، 21 مايو 2015

بنتي بتقولي انت مش انتخبت السيسي ..اشرب

July 7, 2014 · Cairo ·
الموظفين و البنزين (3)
بتاريخ الخامس من يوليو 2014
الفلولي : انا كنت ناوي اتبرع بمبلغ في آخر رمضان لحساب تحيا مصر بس بعد الزيادة دي هادي المبلغ ده لأي حد تاني محتاج ماهي الحكومة خدت فلوسها خلاص
التابع للفلول : انا بنتي عندها 6 سنين بتقولي انت مش انتخبت السيسي ..اشرب

الاثنين، 18 مايو 2015

أنا أي حاجة يقولها السيسي موافقة عليها

July 6, 2014 · Cairo ·
الموظفين و البنزين (2)
أم العيال : امبارح الست بتقولي السيسي غلي الحاجة انا ندمانه اني انتخبته ..معرفتش ارد عليها
أم العريف : قوليلها احنا دلوقتي محتاجين فلوس فبدل ما ناخد قرض من البنك و ندفع فوايد بنعمل جمعية أصل دي مش هتفهم لو قولتيلها الاقتصاد
أم العيال : اه حلوة دي أصل مكنتش فاهمة القرار بس أنا أي حاجة يقولها السيسي موافقة عليها

الأحد، 17 مايو 2015

ماذا حدث للموظفين عند زيادة اسعار البنزين ؟

July 5, 2014 · Cairo ·
الموظفين و البنزين (1)
النهارده داخل المكتب لقيت الموظف الفلولي بيشتكي من ان الميكروباص اللي بييجي بيه الشغل زاد و ان كل حاجة هتغلي بعديه الموظف المفتي نفس الشكوي بعديهم جه الموظف (التابع للفلول ) منفجر من زيادة الاسعار بنزين و سولار و فراخ و بيض و لسه اوتوبيس المدرسة و امبارح كان مروح قعد ساعتين علشان كل ما حول الاتحادية مقفول و انقسم المكتب الي
الموظفين التابع للفلول و المفتي ضد قرار الزيادة و انه كده الفقير هو اللي هيتضر و ان كده السيسي بيفقد شعبيته
أم الفلول و المديرة الجديدة ..دي ظروف بلدنا و الحالة بايظة بقالها 3 سنين و الواحد يحمد ربنا و يبص للي اقل منه

و الفلولي في النص شوية يقول ده ضروري علشان نقف قدام امريكا و شوية يقول بس كده الدنيا هتبقي صعبة جدا

الخميس، 14 مايو 2015

هاعمل عملية البواسير و خايف معرفش اعاكسك تاني

الموظف المفتي هيعمل عملية البواسير و ده طبعا كان مثار تعليقات كتير ..اهمها تعليق العايقة
الموظف المفتي : انا خايف يكون فيه آثار جانبية للموضوع
العايقة : لا ان شاء الله تقوم كويس
المفتي : زي يعني اني مش هاعرف اعاكسك تاني
العايقة : ليه هو انت كنت بتعاكسني من انهي ناحية ؟

(ضحك جماعي في المكتب )

الأربعاء، 13 مايو 2015

دكتور جامعة اعرفه واحد كان ملفق له قضية تهديد لميس الحديدي

الفلولي : كنت اجازة امبارح أصلي كنت باقدم لابني في المدرسة الموضوع كان صعب بس اللي ساعدني فيه دكتور جامعة اعرفه اللي قولتلك كانوا متهمينه في قضية تهديد لميس الحديدي ..طلع ان واحد كان ملفقها له علشان "يستبزه "
العايقة : يستفزه ؟

الفلولي : لاء يستبزه ..يعني يطلب منه فلوس

الاثنين، 11 مايو 2015

و اللي حاولوا يغتصبوها في التحرير دي اخوان و واخدة فلوس

التابع للفلول : بس الصراحة موضوع الاحتفالات ده كان كتير قوي ما كفاية مرة واحدة و خلاص
أم العريف : الموضوع ده الاخوان اللي وراه
التابع للفلول : طب منديهمش فرصة بقي ..و بعدين هو فيه واحدة تقلع ملط في الشارع ؟
العايقة : و هي يعني قلعت بمزاجها ؟!
أم العريف : ماهي مقصودة ماهي معاهم و واخدة فلوس

الفلولي : الاخوان هما اللي ورا الموضوع ده

السبت، 9 مايو 2015

كنا بنزور الانتخابات أيام الحزب الوطني

الموظفة الصعيدية : جاتلنا واحدة في الانتخابات و قالتلنا عايزة انتخب بس ماحطش صباعي في الحبر الفسفوري علشان جوزي ميعرفش اني انتخبت قولنالها لاء مينفعش
الفلولي :الحركة اللي كنا بنعملها زمان ايام الحزب الوطني بقي كنا نحط جلسرين علي صباعنا قبل ما نخش فالحبر ميلزقش في ايدنا و نصوت تاني

معلومة : خال الموظف الفلولي كان عضو مجلس شعب عن الحزب الوطني

الخميس، 7 مايو 2015

لو مش هتنتخب السيسي يبقي يا الدفع يا الحبس

أم العريف : ده ايه المُح ده ؟
العايقة : اسمه ايه ؟

أم العريف : مُح !!
العايقة : اسمه مُحن ..مُحن السيد كُهن مسمعتيهاش دي ؟

أم الفلول (من سكان فيصل ) امبارح : و مشوفتش اي حد من الاحزاب في الشارع الوحيدين اللي شوفتهم بصراحة يعني كانت العربيات بتاعة حزب النور اللي كانت بتدعو الناس علشان ينتخبوا السيسي
المديرة الجديدة : لاء المرة دي في غرامة 500 جنيه و هتتطبق بجد
: ما كل مرة بيقولوا كده و يخوفوا الناس
أم العريف :لاء هتتطبق انا مره غرموا ابو جوزي 100 جنيه جاله استدعاء علي القسم و قالوله يا الدفع يا الحبس ..الكلام ده كان مش قريب كان قبل مبارك



الثلاثاء، 5 مايو 2015

لو مش هتنزل تنتخب السيسي تبقي شيوعي و اخوان

يوم الانتخابات الرئاسية
May 25, 2014 · Cairo ·
ام العيال :انت سلبي
ام العريف : انت غلط
الصعيدي:انت شيوعي
المديرة الجديدة :انت اخوان
الاخوانية : سيبوه براحته
دي كانت تعليقات الموظفين لما قولتلهم اني مش نازل انتخب في الانتخابات الرئاسية

أم العريف : ابو الفتوح ده استاذ علوم و هو اللي عاملهم خلطة "الكنابل "
الفلولي قال حكمة اليوم " سيبوا الناس تفرح ولو بالكدب "

الأحد، 3 مايو 2015

البلح و الخفاش سبب الاصابة بفيروس كورونا

ام الفلول : الجمعة اللي فاتت اختي كانت في الشارع و بعدين الاخوان ضربوا نار عشوائي فدخلت استخبت جوه محل
ام العريف (59 سنة ) : فكرتيني ساعة احداث الامن المركزي (1986) كنت انا ساعتها في ثانوية عامة
أبو نضارة باستغراب : ثانوية عامة !!
التابع للفلول بصوت مش مسموع لأم العريف : دي كانت ايام النكسة مش الامن المركزي
موظفة : ربنا يستر من كورونا ده مع موسم العمرة و الحج .. جه منين ده بيقولوا من الجمال ؟
التابع للفلول : كورونا ده جه بسبب انه في السعودية الخفاش بينام فوق النخلة و بيتبول علي البلح و هما بياكلوه مش مغسول

Facebook Comments