ابراهيم عيسي معفن و لميس الحديدي حيوانة

May 8, 2014 · Cairo ·

معلومات مهمة عن الموظفين

الفلولي وقت الجزء الاول من حوار السيسي مع ابراهيم و لميس كان بيتفرج علي ماتش الزمالك و بني سويف ( بقالي 40 سنة باتفرج ع الزمالك أول مرة يجيب جون في آخر دقيقة "

..

العايقة عندها رنتين للموبايل بتاعها

الاولانية : حط ايده ياه للفنانة بوسي

التانية : أغنية حكيم بتاعة فيلم "حلاوة روح " اللي هي مؤيدة انه يتمنع

May 7, 2014 · Cairo ·

شوفتوا حوار السيسي امبارح

العايقة : آه كان حلو بس ولاد الوسخة الاتنين

أم العريف : ابراهيم عيسي ده بيتفذلك و خلاص

الفلولي : و الحيوانة لميس

العايقة : و التاني زفت البرك (جمع بركة ) المعفن (ابراهيم عيسي )

****

عادل امام : احنا معندناش آنسات في الوسط الفني

April 30, 2014 · Cairo · 

الموظف المفتي : أصل انا لما اشتغلت صحفي كان فيه ناس معايا ليهم علاقة بالوسط الفني كانوا بيحكولي علي بلاوي ..ده عادل امام مرة بيسألوه في لقاء عن الآنسة ليلي علوي..قالهم احنا معندناش آنسات

أم العريف : أيوه صح ده انا شوفت نرمين الفقي قالت في حوار أنا غلطت كتير علشان أوصل

 —

انا أكلت فسيخ يوم الجمعة علشان مخالفة المسيحيين

April 27, 2014 · Cairo · 

- ده كان فيه مظاهرات عند الاتحادية امبارح

العايقة : عايزين يخربوا البلد

أم العريف :اللي وراها صباحي كان فيها بتوع التيار الشعبي

الفلولي : لاء مش صباحي اللي وراها ..اللي وراها جون كيري لما قال تصريح ان 25 ينايردي ثورة شباب مش اخوان ..قاموا نزلوا

مسيرة الى “الاتحادية” للمطالبة بالافراج عن المعتقلين واسقاط 

قانون التظاهر

April 20, 2014 · Cairo · 

التابع للفلول :انا كلت فسيخ يوم الجمعه علشان اخالفهم (المسيحيين )

الموظف المفتي : بس شم النسيم ده عيد فرعوني

البائع (الازهري ) : ده المسيحيين قالوا شممنا نفسنا يوم وفاة محمد

قطر و البشير و الطرف التالت و مرسي سبب اشتباكات أسوان

April 8, 2014 · Cairo · 
الموظفين و اسوان

الصعيدية : ده لقوا نفس الخط في اللي مكتوب ع الحيطان في الناحيتين
أم العريف : النوبيين طيبين بس ساعة ما بيتعصبوا ..
الموظفة الصامتة : فيه حد تالت
الصعيدية : اه طرف تالت جاي من السودان هو البشير بتاع السودان
التابع للفلول : الله يخرب بيتك يا مرسي
....
الموظف الصعيدي  : هو الكلب بتاع قطر من يومين راح السودان وولعها

مصر.. الاشتباكات القبلية في أسوان تحصد 26 قتيلاً

احنا مبسوطين قوي ان الكهربا بتقطع

April 3, 2014 · Cairo · 

الموظفين عندنا بيتبعوا3 نظريات في موضوع الكهربا اللي بتقطع

الاولانية (الموظفة الصعيدية مثلا ) : ده الاخوان سايبين ناس تبعهم في وزارة الكهربا هما اللي بيخلوها تقطع 

التانية (التابع للفلول مثلا ) : الاول كنا متضايقين علشان بيودي الكهربا غزة لكن دلوقتي يبقي دي ظروف بلدنا 

التالته (أم العريف مثلا ) : الكهربا بتقطع و ايه يعني علي قلبنا زي العسل 

انا انتخبت مرتضي منصور ..و باسم يوسف طلب اللجوء السياسي

March 29, 2014 · Cairo ·

ام الفلول (الاهلوية ) باستنكار : و بتوع الزمالك انتخبوا مرتضي منصور

الفلولي "عضو في نادي الزمالك " (و هو متضرر ): اه مانا رحت انا و ابويا النادي و انتخبناه .. هنعمل ايه طيب ؟

...

الفلولي : عرفتوا آخر خبر ..باسم يوسف قدم طلب لجوء سياسي لامريكا اول امبارح و قبلوه

أم الفلول : و يطلب لجوء سياسي ليه ماهو ممكن يروح عادي

الولاوله الحمرا : باسم يوسف بطل قومي

March 22, 2014 · Cairo ·

عن حلقة باسم يوسف امبارح

الفلولي "باستياء" : ده بيقول انه مفيش مؤامرة

أم الفلول : مش طلع سارق المقالة

الفلولي : اه و قاعد يتريق علي الموضوع ..عارفة عادل امام لما قالوا ده بوظ جيل بحاله من ساعة مدرسة المشاغبين و بعد كده لما كان يطلع حرامي قالوله انت حببت الناس في السرقة

الموظف المفتي "وهو بيبص ناحيتي " : ده بتوع الولاوله الحمرا * معتبرينه بطل قومي

* الولاوله الحمرا : هو الاسم اللي اطلقه سمير غانم علي منظمة الألوية الحمراء اليسارية الايطالية اللي كانت موجودة في السبعينات و التمانينات ..راجع فيلم (تجيبها كده تجيلها كده )

باسم يوسف بيشوش علي نفسه بس هو يستاهل

March 15, 2014 · Cairo ·

الفلولي :قناة ال mbc هي اللي شوشت علي البرنامج علشان تعمل دعاية .. انا شفت الحلقة ..المفروض فعلا يتشوش عليها .. (باستنكار قوي )ده بيتريق علي عدلي منصور و بيقولك أول رئيس متصل و بيتريق علي حاجات أمن قومي زي موضوع سد النهضة

الخبر

 "أكد مدير محطة mbc مصر، محمد عبدالمتعال، أن المحطة تعرضت، ليلة الجمعة، لعمليات تشويش متعمدة خلال بث برنامج "البرنامج" للإعلامي الساخر باسم يوسف.

وقال إن التشويش حدث خلال بث الفقرة الثانية من برنامج "البرنامج"، بواقع 5 أو 6 مرات، واستمرت المرة الواحدة حوالي 30 ثانية.

وخلال عملية التشويش، انقطعت الصورة والصوت، وبدت الشاشة سوداء تماما. "

مش البابا غنوج دي بطاطس.. و جلابية ماما في المكتب

March 14, 2014 · Cairo · 

أم العريف قالت تتولي هي كتابة الورقة اللي بيدوها للساعي علشان يجيب السندويتشات ..ابتدت تكتب واحدة.. قالتلها بطاطس من غير سلطة وواحدة عايزة بسلطة

الفلولي : و انا واحد فول و واحد بابا غنوج

أم العريف : البابا غنوج بسلطة ولا من غير ؟

الفلولي: ما هي بابا غنوج سلطة

أم العريف : مش البابا غنوج دي بطاطس ؟

March 13, 2014 · Cairo · 

كان فيه دبان في المكتب ..و مش عايز يخرج قاموا طفوا النور و علشان يخرج أم العيال ادت الفلولي قماشه يهش بيه الدبان ..بعد ماهش الدبان و هو بيديلها

أم العيال : دي كم جلابية ماما

يعني ايه ليبرالي يا اختي ؟

March 9, 2014 · Cairo ·

الفلولي : شوفتوا القاعدة العسكرية المصرية اللي عملناها في الامارات

أم العريف : اه خلاص بقي ..عليا و علي أعدائي

March 6, 2014 · Cairo ·

أم العيال : اللي هو يعني ايه ليبرالي يا اختي ؟

الفلولي : الليبرالي هو اللي بيطالب بفصل الدين عن الدولة

أبو نضارة : طب و العلماني؟

الفلولي : هو زيه بس علي اسخم

ازاي باسم يوسف يشكك في جهاز الكفتة و مؤسسة الجيش ؟

March 2, 2014 · Cairo ·

(بعد سخرية باسم يوسف من عبد العاطي و جهاز الكفتة )

التابع للفلول : ازاي يعني باسم يوسف يشكك في مؤسسة زي الجيش

الفلولي (مستنكرا ) : لاء و مستشار عدلي منصور بيتكلم و ناس بتتريق ..أصل في حاجة اسمها mavia (نطقها كده ) شركات الأدوية دول بيطلعوا يقولوا تصريحات علشان يحاربوا الاختراعات دي زي المسلسل بتاع الواد احمد عيد ده اللي اسمه (سكر )

أم الفلول : اه و مسلسل (الاصدقاء )

انا مستخسرة السيسي في الشعب المصري

March 2, 2014 · Cairo ·

( بعد القبض علي نجل محمد مرسي بتهمة حيازة حشيش في سيارة صديقه )

الفلولي : مش متلفقة طبعا ماهو ده الواد ابن مرسي اللي كان جايب حاجة و سبعين في الثانوية العامة ..اللي صوروه و هو بيشرب شيشة ايام ما كان مرسي ماسك

الاخوانية : وهو يعني اللي يشرب شيشة يبقي بيحشش؟

الفلولي : اه اللي يشرب شيشة في السن ده يشرب حشيش

ملحوظة صغيرة .. الفلولي بيشرب شيشة بس معرفش ابتدي في سن كام

...

أم الفلول : انا مش عايزه السيسي يمسك مستخسراه في الشعب ده

الفلولي : بس لو محصلش و جه واحد تبقي الناس كاها معاه يبقي قدام البلد دي قرن ولا قرنين علي بال ما تقوم

الشعب المصري المتخلف بيشكك في جهاز الكفتة و عبد العاطي دكتور و عالم و مفكر

March 1, 2014 · Cairo ·

الموظف البزرميط : هو فيه جهاز يعالج كل الفيروسات و يعالج الكانسر ؟

التابع للفلول : و هو الكانسر ده فيروس يا جاهل ؟

البزرميط : اديك رديت علي نفسك

التابع للفلول : يا ابني الجيش مش هيعلن عن جهاز الا لو كانوا عالجوا الناس فعلا

العايقة للبزرميط : و انت ايش فهمك .. ده اللي اعلن عنه دكتور و عالم و مفكر .. و كان معاه 72 دكتور في فريق البحث

أم الفلول (بانفعال) : لاء مش هو بس اللي بيشكك ده فيه ناس كتير زيه كده ..شعب متخلف