أمريكا قتلت عمر سليمان ..و نعم لضرب مظاهرات الاخوان بالرصاص الحي

December 24, 2013 · Cairo · 

العايقة ماسكة التابلت بتاعها و بتقرا من الفيس بوك سؤال في استفتاء بصوت عالي ..

- هل توافق علي ضرب مظاهرات الاخوان بالرصاص الحي ؟

تجيب في ثقة : اه طبعا

December 19, 2013 · Cairo · 

أم العيال (عن مشكلة وزنها الزائد ) : وقلت لجوزي ممكن اعمل عملية شفط دهون بس دي هتتكلف ستاشر الف جنيه ..قالي لاء خليكي زي ما انتي

December 19, 2013 · Cairo · 

الفلولي : عمر سليمان كان هيخلص موضوع سوريا في يومين و علشان كده أمريكا قتلته

December 17, 2013 · Cairo · 

الموظف الفلولي اللي كان بيقول انه الاخوان بيتاجروا الدين و بيستغلوا الدين علشان مصالح سياسية ..مبسوط قوي من كلام علي جمعة بتاع امبارح اللي بيقول فيه للناس تروح تقول نعم في الاستفتاء علي الدستور و بيتنبأ انه هيكون في المكانة اللي بعد الشيخ الشعراوي علي طول

كل ما يمكن أن تأكله في مكتب حكومي من الكشري للبيض و الرمُان

 —

December 10, 2013 · Cairo ·

من خلال مشاهدتي الفعلية اليكم قائمة بما شاهدته من أكل في مكان العمل

-السندوتشات بانواعها من فول و طعمية و بطاطس و باذنجان و بابا غنوج و جمبري

- أو عيش من الفرن بلدي او فينو و معاه طعمية سايبة أو عجة

- أو فطير من الفرن و معاه جبنة قديمة (بيتي ) تقوم باحضارها احدي الموظفات

-أو كشري و ده مش بيبقي كتير

_أو بيض مسلوق

-وجبة استثنائية تتوفر بعد العيد الكبير (سندوتشات لحمة) بتعملها واحدة من الموظفات

-وجبة استثنائية تتوفر بعد عقيقة عند موظفة ..نصيب كل موظف من الرز و اللحمة في علبة بلاستيك

= عند الاحتفال بمناسبة عند حد من الموظفين بيجيب جاتوه و حاجة ساقعة و في بعض الأحيان معاه باتون ساليه

= مكملات للاكل مخللات من جزر و خيار و باذنجان أو طماطم و خيار و يتم تقطيعهم في المكتب

- الحلو ..ممكن يكون كيكة موظفة عاملاها أو ممكن فطير بسكر و مرة فيه موظفة جابتلنا عاشورا

-الفاكهة ممكن تفاح (مصري طبعا ) أو جوافة ..و مؤخرا أم العيال جابت رمان متفرط في علبة بلاستيك

-المشروبات ..شاي و نيسكافيه و قرفة و جنزبيل و كاكاو و كابتشينو .. كله بيتم عمله بالاستعانة بالبراد اللي بيشتغل بالكهربا

المدمنين بيجيبوا المخدرات من الاخوان .. و دخلت علشان ازور للسيسي معرفتش

December 7, 2013 · Cairo · 
الفلولي : اه مانا دخلت صوتت للسيسي في استفتاء التايم ..بس جيت اصوت تاني الموقع قالي لاء مينفعش


December 7, 2013 · Cairo · 
الفلولي : الاخوان دول كلاب فلوس . الناس متخليش مدرس اخواني يدي لعيالهم دروس مش علشان فكره بس علشان كلاب فلوس ..و بعدين العيال المدمنة اللي بتجيب الأدوية و تاخدها مخدرات بيجيبوها منين مش من الصيادلة اللي معظمهم اخوان


December 7, 2013 · Cairo · 
أم الفلول : و كانوا عاملين مظاهرات كبيرة عند الجامعة امبارح
أم العريف : لاء ده دلوقتي عقوبتها 7 سنين و من غير محاكمة

December 2, 2013 · Cairo · 
الموظفة الثورية |اخوانية : ماهم هيعملوا البنزين بكوبونات و الانابيب علي البطاقة يعني زي ما كان باسم عودة هيعمل
أم العريف : لاء ماهو الكلام ده مش من أيام باسم عودة ده من أيام
باسم جودة..
كامل جودة 
"ده اسم موظف معانا بس في ادارة تانية "
جودة عبد الخالق

وزير التموين "

مراتي يعني الخدامة اللي جابتهالي أمي

November 30, 2013 · Cairo · 

مصر: إفراج مشروط عن مجموعة "فتيات 7 الصبح"
أم الفلول و العايقة و الباشمهندسة يشعرون بالاستياء من وجود أخبار عن تفكير عدلي منصور في منح عفو رئاسي لفتيات 
 اسكندرية
....
الفلولي : و ايه (عبد الرحيم علي ) ده كمان .. مينفعش مذيع ده الدغ في كل الحروف 

November 30, 2013 · Cairo · 

بعد ما الموظف المفتي طلب حاجة من أم العيال
أم العيال : ما تعملها انت هو انا الخدامة اللي جابتهالك والدتك ؟
الموظف المفتي : لاء الخدامة اللي جابتهالي والدتي في البيت

يا طنط هنوقع البلد و الشرطة و ناخد تمويل 100 جنيه

November 29, 2013 · Cairo · 

أم العيال : انا مجيتش امبارح اصلي كنت بازور اولياء الله الصالحين ..قالولنا علشان البنت الصغيرة شكلها محسوده خدتها و رحنا السيدة عيشة و السيدة نفيسة و السيدة زينب و بير الخضيري

- ايه بير الخضيري ده ؟

- ده بير موجود في مقام الخضيري جنب ابن طولون كنت باروحه و انا صغيرة ..خدت البنت و غسلت وشها و رجلها بمية البير

November 28, 2013 · Cairo · 

ام الفلول : ديموقراطية ايه اللي تطبقها في عقول مختلفة ده عامل و ده جاهل

November 27, 2013 · Cairo · 

ام العريف : انا امبارح كنت في ميدان طلعت حرب و بعدين دخلت في حته استخبي من الميه (استخدام الشرطة لخراطيم المياه ) فلقيت واحد من اللي كانوا في المظاهرة فباقوله انتوا بتعملوا كده ليه قالي ..يا طنط احنا حطوا اسامينا في لسته (قايمة ) و كل واحد فينا هياخد 100 جنيه ..قولتله و ينفع كده توقعوا البلد و الشرطة ..قالي ماهم هيدوا كل واحد 100 جنيه

موظفة : ماهو زياد بهاء الدين جاله ملايين الدولارات و بيوزعهم

انا باحترم هتلر ..و الاخوان دفعوا 150 الف جنيه لواحد علشان يعمل أزمة في البطاطس

November 25, 2013 · Cairo 

بعد كلام كتير ل ام الفلول طالبت فيه بتهجير كل اهالي رفح و وصفت فيه البدو (اهالي سيناء ) بانهم كلهم خونة و انه مش مناسب تطبيق الديموقراطية دلوقتي في مصر و بدأت تضرب امثلة بمصايب عملوها بره في اوروبا و امريكا اللي جايين يطالبونا بالديموقراطية

ام الفلول : مثلا هتلر عمل ايه موت 6 مليون يهودي قال دول جنس أدني

الموظف المفتي : الصراحة الراجل ده انا باحترمه

November 24, 2013 · Cairo · 

الفلولي مخاطبا العايقه : انتي لو دخلتي عندي هتلاقي فيديو لواحد معترف ان الاخوان ادوله 150 الف جنيه علشان يشتري بيهم بطاطس و يعمل ازمة في المنطقة عنده و مديينه 300 الف جنيه هو و ناس تانيين علشان يخلوا سواقين الميكروباصات يغلوا الاجرة

ماهي حاطة صورة للسيسي في أوضة النوم !

November 21, 2013 · Cairo · 

بعد 30 يونيو و تعبيرا عن تأييد اغلب الموظفين ل السيسي  الفلولي و ام العيال كل واحد فيهم جاب بوستر للسيسي و حطوه علي الحيطة مع بوستر قديم كان الفلولي حاطه لعبد الناصر من جرنال الوطن تحت عنوان "احنا اسفين يا زعيم "  من حوالي اسبوعين جه تفتيش من الوزارة و لما شافوا الحاجات دي امروا بانها تتشال "هنا مكان للشغل بس " و اتشالت فعلا

الموظف المفتي : ده انا قولت انتي اخدتي البوستر ده و حطيتيه عندك في البيت
العايقه : ماهي حاطه صورة للسيسي في اوضة النوم
أم العيال : لاء انا حاطه صورة السيسي في الصالون ..بس لو حطيتها في اوضة النوم جوزي مش هيعترض

صالح سليم اتعمي من كتر شرب الخمرة .

November 20, 2013 · Cairo · 

ام العيال بعد ما قعدت تشغل تسلم الايادي علشان تاخد منها حتة مختلفة تخليها رنتها

ام العيال : انت بتخش ع النت

الصعيدي : ايوه

ام العيال : عايزاك تجيبلي كل الاغاني اللي عن السيسي

November 13, 2013 · Cairo · 

الحوار اللي جاي ده بين ان موضوع الفلول و الاخوان و كل القصص دي ما هي الا انتماء شكلي للمصريين ..الانتماء الحقيقي 

هو الاهلي و الزمالك

 بعد

.. نقاش و مكايدة عن الاهلي و الزمالك بين الفلولي و ام الفلول     اتهم فيه الفلولي حسن حمدي انه حرامي ..و هي كانت بتعايره بالبلطجة بتاعة مرتضي منصور  وصولا  للحوار التالي

الفلولي : عارفه مين آخر واحد زار صالح سليم في لندن .؟

ام الفلول : لاء معرفش

الفلولي : كان حمادة امام و قال ان صالح سليم اتعمي من كتر شرب الخمرة ..الفلولي مستكملا ..ده وصل بيه انه كان بيشرب صندوق خمره و ميسكرش

انا مؤيد للسيسي و خايف قناصة أمريكان يقتلوا مرسي بكره

November 11, 2013 · Cairo · 
في لحظة معينة كان فيه 4 موظفات في المكتب في نفس الركن ماسكين ما بين تابليت و سمارت فون و بيبصوا فيه
الفلولي : ايه يا عم ده ؟
أبو نضارة : دي الحكومة الاليكترونية


November 4, 2013 · Cairo · 
الموظفة الصامتة المتابعه لتوفيق عكاشه : المخابرات المصرية هي اللي كشفت انه امريكا بتتجسس علي دول العالم ..و احنا الدولة الوحيدة اللي مقدروش يتجسسوا علينا
الفلولي : و الكلام ده كان بمساعدة مرسي بحيث انه يبقي قريب من اوروبا
 —

November 3, 2013 · Cairo · 
الفلولي : الخوف بكره مش من الاخوان ..الخوف من قناصة امريكان او امريكا مأجراهم علشان يقتلوا مرسي علشان ميقولش علي اسرار اتفاقه مع امريكا

السيسي جاب الببلاوي علشان صديق البرادعي و فاشل

October 29, 2013 · Cairo · 
العايقة : عدلي منصور ده راجل كويس و هو عارف انه مؤقت فمش هيعمل حاجات كتير ..لكن اللي فاشل و ملوش لازمة هو التاني ده اللي اسمه الببلاوي انا مش فاهمه هو ليه لسه قاعد ده فاشل
الفلولي : انا اقولك السيسي ليه مخلي الببلاوي ..هو اصلا جاب الببلاوي ليه علشان يرضي الغرب ..مين اكتر اتنين اصحاب الببلاوي و بيسمع كلامهم ..احمد كمال ابو المجد بتاع المصالحة و البرادعي ..فالسيسي سايب الببلاوي علشان يفشل و الشعب يقول مش عاوزينه ساعتها يمشيه و يجيب حد بداله