الثلاثاء، 26 أغسطس 2014

مرسي هيهرب لاثيوبيا ..و قطع الميه و الكهربا هيقضي علي الشعب

June 27, 2013 near Cairo

ام الفلول : الاخوان قاطعين عننا الكهربا و الميه و مفيش بنزين

الموظفة الصعيدية : عايزين يقضوا علي الشعب و تيجي حماس تاخد بيوتنا و اماكنا و شغلنا

العايقة : و رجالتنا 
June 26, 2013 near Cairo
الفلولي : بيقولوا يمكن مرسي يهرب علي اديس ابابا 

.................

 دول جايبين فيديو لفضل شاكر و هو ماسك سلاح 

ام العريف : ايوه ده انضم لحزب الله 

June 25, 2013 near Cairo

الموظف الصعيدي : ام حازم ابو اسماعيل تبقي اخت ابو ايمن نور يعني عمة ايمن نور

ام الفلول : اصلا ابو حازم ابو اسماعيل ده كان في الحزب الوطني و كان من ضمن نواب القروض
.........................

الموظف المفتي : جواهر اللي بتغني تبقي بنت احمد منيب 


الأحد، 17 أغسطس 2014

السلفيين يقتلوا الوهابيين احسن ..و الفريق محمد صبحي بدل مرسي

June 24, 2013 near Cairo

بعد حوار بين ام العريف و ام الفلول اتفقوا فيه علي ادانة قتل السلفيين للشيعة امبارح - خلي بالك ان الادانة دي هي كرها في السلفيين مش حبا في التسامح _ ده كان ختامه

ام العريف : طب يروحوا يضربوا الوهابيين دول لا مله ولا دين

..لحظات من الصمت و عدم الفهم..


الموظف المفتي : قصدك البهائيين ..الوهابيين دول السلفيين


June 23, 2013 near Cairo


الموظف الصعيدي : المحكمة حكمت بعزل محمد مرسي

- :عرفت منين ؟

الصعيدي : كنت في الدور اللي فوق وواحد كلموه من البيت قالوله شافوها في التليفزيون 

June 18, 2013 near Cairo

ام العيال : يا سلام لو شفيق برجع و يلمهم

التابع للفلول : شفيق مينفعش

ام العريف : لازم واحد عسكري من الجيش

الصعيدي : العين دلوقتي علي رئيس الاركان

ام العريف : اه محمد صبحي .. صبحي صالح 

الصعيدي : صدقي صبحي 

الثلاثاء، 12 أغسطس 2014

أحمد شفيق هو اللي عامل حركة تمرد ..و الاخوان هيحرقوا جوامع


June 17, 2013 near Cairo
الفلولي مخاطبا المديرة بعد ما شاف خبر علي موبايله : مش انا قولتلك ان اللي نازلين 30 يونيو الحزب الوطني .. اهو امبارح اتصاب 30 واحد في الفيوم اشتبكوا مع الاخوان من الحزب الوطني 

...................

الفلولي : امبارح احمد ماهر بتاع 6 ابريل كاتب حاجة علي النت الناس كاتباله انتو عملا الاخوان و بتاخدوا فلوس من امريكا .. الناس خلاص كرهت العالم دي 6 ابريل و غيرهم — 

June 15, 2013 near Cairo


الفلولي : هاقولك بقي علي سر حركة تمرد اللي عاملها .... احمد شفيق .. و اللي هيمسك البلد بعد مرسي هيكون عسكري و هيكون ديكتاتوري

التابع للفلول : مينفعش غير ديكتاتوري

الفلولي : لازم واحد يلم الليلة

ام الفلول : و ياخد الجهاديين المعتقلات 

June 15, 2013 near Cairo

الفلولي متحدثا كعالم ببواطن الامور : الاخوان هيحرقوا جوامع علشان يعملوا فتنة 

>>>>>>>>>>>>>>>>>>>>

ام الفلول : و العريفي بيتكلم امبارح عن الجهاد في سوريا .. لكن دم المسلم علي مسلم حرام

العايقة : اه لكن لو علي دم مسيحي في داهية —

الجمعة، 8 أغسطس 2014

امتحان العربي من أسباب ثورة 30 يونيو ..و الاخوان باعوا توشكي

June 10, 2013 near Cairo
ام العريف : امبارح كانوا جايبين الراجل بتاع الوثائق اللي الاخوان شالوه .. هما كده معاهم كل وثائق البلد و الخرايط بتاعتها

ام الفلول : اه ممكن يقولولك ان سينا مش تبعنا

ام العريف  او خرايط مفيهاش توشكي 
June 8, 2013 near Cairo

بعد ما بنت العايقة كلمتها و كانت في حالة هيستيرية بسبب امتحان  العربي
(ثانوية عامة )
الفلولي : احسن علشان اولياء الامور تغضب من مرسي و تنزل في 30 يونيو 

June 6, 2013 near Cairo

الفلولي : ماهما لما دوروا لقوا ملف السد بتاع اثيوبيا عند مبارك و لقوا انه كان ناوي يعمل قاعدة عسكرية جنوب السودان علشان لو اثيوبيا عملت السد يضربهم منها — 

الجمعة، 1 أغسطس 2014

التكفير الذاتي للمسيحيين المصريين



May 31, 2013 near Cairo

: العايقة و حماتها بينهم خلافات قديمة وصلت لانه حاليا لانهم مبيدخلوش لبعض بيت و ممعاهمش موبايلات بعض .. الاتصال الوحيد بينهم ان العايقة بتروح تاخد التموين من عند حماتها كل شهرين من علي الباب .. وعرفت انه العايقة و جوزها من ملتين مختلفتين .. هي العايقة ارثوذوكس بس معرفش جوزها ايه 

كانت العايقة معزومة عند اخت جوزها في عيد القيامة اللي فاتت و فوجئت ان حماتها هناك  .....     وهما قاعدين ياكلوا 
اخت جوزها حطت قدامها مكرونة بشاميل و فراخ و اكل تاني

العايقة : ايه كل ده ؟

اخت جوزها : كلي مانتي كنتي صايمة 

حماتها (للعايقة) : ما كلكم داخلين النار 


Facebook Comments