الموظف الحنين يلسع ابنه بالمعلقة

January 16, 2012 near Cairo

ام العريف : ماهو كل الحاجات بتاعة قطع الطريق و الناس دول بتبقي مترتبة يعني سواقين التريللا اللي قاطعين الطريق دول تلاقي موظف منهم هو اللي ورا الموضوع

January 11, 2012 near Cairo

الموظفة الصعيدية  بنرفزة : و لما بالاقي الواد ابني بيغلط برضه بالسعه بالمعلقة
 التابع للفلول : يهز راسه متفهما
الموظفة الصعيدية : و ساعات باضربه علي وشه
 التابع للفلول : لاء بلاش الضرب ع الوش علشان ممكن يعلم في وشه

January 11, 2012 near Cairo

 التابع للفلول : الجيش مفيهوش فساد
الموظف المفتي : انا في مشروع حرب وكلونا اكل منتهي الصلاحية
الموظف البزرميط :  اللي دخل الجيش: كان بيجيبولنا الاكل حمضان
الموظف الفلولي : و هو الجندي المصري مميز ليه علي مستوي العالم علشان بيتحمل الظروف دي
التابع للفلول : الفساد في كل مكان في العالم

ارانب بترعص و ناقصات عقل و دين و مرشح جنتل

January 11, 2012

الموظف البزرميط : و علي رأي المثل اللي بيقول ان الستات دول ناقصات عقل و دين 

January 10, 2012 near Cairo

الموظف الفلولي : احنا هننتخب شفيق
العايقة : هو ذوق ذوق و .... جنتل

January 9, 2012 near Cairo
 الموظفة الصعيدية  : مبحبش اكل الارانب و انا صغيرة في الصعيد كنت باشوفها بترعص في الحلة

موظفة  : بترقص ازاي ؟

الموظفة الصعيدية : لاء بترعص يعني بتنبض

ام الفلول : اصل الارانب روحها طويلة

اجانب بدم ازرق و سد عالي في العباسية

January 2, 2012

الموظفة الصعيدية : شفت تحت واحدة لابسة صيفي في البرد ده

 

العايقة  : و ايه يعني ما الاجانب بيبقوا لابسين صيفي في عز البرد

 

ام الفلول  : لاء اصل الاجانب دول دمهم ازرق مبيحسوش بالبرد 

 

 

........................

January 8, 2012

 موظف : امبارح كان فيه انهيار ارضي

 
الموظفة الثورية: اه زي اللي حصل في العباسية هو ده ايه سببه ؟

 
موظفة  : دي بتبقي مياه جوفية

  

 ام العريف : السبب في الموضوع ده لما بنوا السد العالي الميه اتجمعت تحتيه و انتشرت في البلد 

متقفش مع مسيحيين كتير .. خللي بالك من الفرزخ

December 27, 2011
الموظفة الثورية : بس مدير الادارة قالي ما اقفش مع" العايقة" (مسيحية) كتير .. هو  قالي اني لو مت و انا واقفة معاها هاخش النار علشان كده باقلل من كلامي معاها
........................
 

December 29, 2011

 

الفلولي : انا بعد وفاة اخويا ابتديت اسأل في الدين كتير عن الموت و ما بعده و عن حياة البرزخ

 

ام العريف : ايه الفرزخ ده؟

السنجة في البسلة

December 21, 2011

  بعد ما ام العريف شتمت فيها  بتوع الثورة  و قالت انهم عايزين يخربوا البلد و يوقفوا حالها  .. قعدت تفصص  البسلة تحت المكتب


December 21, 2011 
 
التابع للفلول : انا عرفت بقي قصة البنت .. دي واحدة منقبة اصلا و كان معاها سنجة و قطعت بيها رجل المجند فعملوا فيها كده

اثيوبيا و اسرائيل و النيل عايشين لبعضيهم

ديسمبر 2011

الموظف الفلولي :  بعد ما عرف وزير الداخلية الجديد
- يقول و هو معجب ايوه الراجل ده كويس ده هو بتاع فض اعتصام السودانيين انا شفت العساكر بنفسي كانوا بيرفعهوم لفوق و بعدين ينزلوهم علي ركبهم فضهره ينكسر

..................
 

December 19, 2011

 

ام العريف : اسرائيل بتعمل صلات مع جنوب السودان و اثيوبيا علشان يمنعوا عننا النيل

 التابع للفلول: اه بس احنا لينا حصة المشكلة انها مبقتش تكفي

ام العريف : مش بس يقللوا الميه اللي جايلانا لاء ده اسرائيل هتاخد فرع من النيل

التابع للفلول : ازاي؟

  ام العريف: هيعملوا فرع للنيل من اثيوبيا لاسرائيل

 

 

عن مؤامرة البلاك بيري وفوتو شوب البنت اللي اتسحلت

December 15, 2011

 الموظف الفلولي :
- البلاك بيري رخص و بقي ب 300 جنيه ما هو ده من ضمن المؤامرة علشان محدش يقدر يراقب الرسايل .. المؤامرة دي موجودة من زمان من ساعة حاسب لكل بيت بس مبارك مكانش قادر يوقفها

 .....................

December 18, 2011 

.. فيه واحد جاب جرنال التحرير و كانت التعليفات عن صورة البنت كالاتي كالاتي
- احسن
- تستاهل
- ماهي اللي عايزة كده
- ايش صمنك ان دي صورة بنت مش راجل
- بيجيبوا صور من بلاد تانية و يقولوا انها عندنا
اما بالنسبة للشيخ و الطالب الدكتور
فبيسألوهم سؤال مهم ايه اللي وداهم هناك

و رفض الموظف هدم بيوت الدعارة و طلب استمرار ملاهي شارع الهرم

(انتخابات مجلس الشعب )

   ديسمبر  2011

الدكتور اللي بيدي الاجازات المرضي للموظفين جه قعد مع موظف عندنا يعرفه .. هو من سوهاج و انفتح الكلام عن الانتخابات الموظف الصعيدي مؤيد الاخوان: انتخبت الحرية و العدالة طبعا ,

  الدكتور عمل محاضرة كبيرة عن فصل الدين و الدولة و انه مش صح ندخل الدين في تلوث السياسة و عن انه الاخوان ولاءهم للجماعة و المرشد مش للوطن و انه الاسلاميين ركبوا ع الثورة قالك  هاتلي صورة لسلفي من شهداء الثورة و  انه  السلفيين عندهم عقدة من المرأة و استشهد بفاطمة ناعوت في المصري اليوم

  الموظف الصعيدي : ده في تونس الاسلاميين اول حاجة هدموا بيوت الدعاره هناك 
 الدكتور : ده غلط و بدل ما الفساد ليه اماكن محددة هيبقي موجود في البيوت مستخبي 
 المديرة اللي انتخبت الاخوان  : و الله الراجل ده كلامه مظبوط  .
. الموظفة الثورية : ده بيتكلم زي جوزي بالظبط

و انتخب الموظف الاخوان بسبب مسلسل الريان

  ديسمبر 2011 قبل انتخابات البرلمان

 

بعد عرض مسلسل الريان

 

الموظف الصعيدي: يا جماعة متخافوش من الاخوان دول مش هيتدخلوا في عقيدة حد

  

ولا هيتدخلوا في اللبس احنا المهم دلوقتي الناحية الاقتصادية علشان البلد تقوم ( قلت
 
 
 كويس و الله واحد مؤيد للاخوان بس عنده منطق عملي و بيطمن الناس) .. قام مكمل
 
 ..
 هما يقدروا يحلوا المشاكل الاقتصادية يعني شوفوا الريان مثلا و المشروعات اللي
 
 كان عاملها

صيع التحرير نضربهم بالنار

نوفمبر 2011

احداث محمد محمود

 

المديرة : كل اللي في الميدان دول صيع
التابع للفلول  : المفروض يضربوهم بالالي و ياخدوا عاطل علي باطل
موظف  : مش قوي كده 
التابع للفلول : اصل حتي اللي واقف يتفرج ده واقف ليه ؟
الموظفة الصعيدية  : انا سمعت واحدة بتقول انهم بياخدوا فلوس من قناة الجزيرة و العربية و القنوات الاجنبية —

الشيكات لاء

موظفة في مكتب جنبنا  كانت جايبه معاها ابنها و ده شيء معتاد بيحصل كتير  انه لو 

واحدة اتزنقت ولا حاجة ممكن تجيب معاها ابنها بداية من طفل رضيع لغاية

اعدادي  و انا كنت في الاوضة عندهم و هو كان فاتح درج مكتبها و هي قامت قايلة

 

  لاء ما تلعبش في الشيكات .. انا هاجيبلك ورقة تشخبط فيها

لو نزلت مظاهرة تبقي مش محترم و تستحق تتدهس

11 اكتوبر 2011 بعد مذبحة ماسبيرو

الموظفة الثورية : بس غلط ان المدرعات تدهس المسيحيين بكره هتدهس المسلمين برضه و نبقي رجعنا لايام العادلي"
التابع للفلول : احسن خليها تدهسهم و بعدين مادام الواحد محترم و مش في مظاهرة محدش هيدهسه "

 

اغسطس 2011
صراف في الخزنة واحد نصب عليه و قبض 10 الاف جنيه و اداله نمرة بطاقة مضروبه ..فجت مديرة الادارة علي طريقة تبرع يا مؤمن و ادوله اي حاجه .. باعتباري شريك مخالف فانا مدفعتش باعتبار ان الموضوع مش تبرعات

الموظف الصعيدي : يا اخي فك كربة اخوك المسلم

العايقه (باستنكار): يعني لو مش مسلم مش هتساعده؟

الصعيدي (بتراجع) : لاء يا استاذه طبعا كلنا زملا —